[Dr.nour]

بسم الله الرحمن الرحيم









بصيت من فوق برج عالى واديه بترجف ،،

ومسكت بعزم ما فيه ،، فى الشرفه الجوانيه

ميلت برأسى لتحت ،، ودققت بعنيه

بصيت ولقيت ناس ماشيه وعالم دايخ من فوق لتحت ،،

لا الماشى بيفضل ماشى ولا المرتاح هيدوم راحته ..

بصيت ولقيت ::


شيخ كريم ،، للعالم فهيم ، ماشى ينصح نصح الحكيم

شايل دقنه قدامه مترين ،، وعامل بيها فوطه وقت اللزوم والحين

كل من شافه قال ده حكيم ،، كريم

لا بينطق غير بأسم الله ،، ولا يعرف يحكى فى حق الغير

والناس شايفينه شيخ مزبوط ،، وعلى وشه الطاع والقبول


شفته بيقابل رقاصه من خلف جدار ..

قولت اكيد دا ناصح ضد الرقص والاومار .

ولقيته ف الاخر شيخ مزمار ،،

بيحب يبان من ورا الستار على انه شيخ مغوار

ويا ويله من ربه ،، يوم الحكم على عبده



ـــــــــــــــــــــــ


ولقيت بنوته جميله وشيك ،،

باين عليها من بيت مماليك

ماسكالك شنطه فرنسيه ،، ولابسالك مينى جيب

وفى نفس اللحظه الاقيها ،، بتعلق شاب على الناصيه

وبتسرق منه محفظته ،، وكمان منديله وكرفته

اصل ابن الناس ،، كان بيدور على بنت يقضى معاها اليوم

وكمان اهو منه يتسلى من غير ما يفكر ف اخته ف يوم

وبباه مديله عربيه ،، مصروفه الشهرى يآآآآآآآآكل بيه ميه

وفى لحظه لقيت راسى لفت وعنيه تدور ،،

مش فاهمه ليه الانانيه ،، والناس الدون


ــــــــــــــــــــــــ


لفيت ع الشارع الورانى ولقيتلك واحده

نايمه على جنب الشارع زى الفرخه الدايخه

وشويه وقامت م النوم عماله تدور

بتدور على لقمه حاف فى بقايا الناس

مهى اصلا كانت نايمه على جنب رصيف ويا السله

دا صحيح كان فى سله فيها زباله

مليانه بواقى من ناس مش فاهمه القصه ..

ودى كانت قصه طويله وممله

كل اما احكى للناس ع الفرخه الدايخه

يقولولى سيبك يا حاجه ،،

دى صحيح ناس فاضيه

وبقيت اغنى فوق البرج من غير احساس ،،

وكأنى شاربه كوبايه مليانه ازاز عمال بيقطع فى جوفى ،،

ال شايله الهم على الناس ،،

ولقتها فجأه بتغيم من فوق راسى

والشمس بتغرب من ظهرى

والدونيا فجأه بقت سوده من فوق راسى

و .............

<< قوم ولعلك شمعه >>