فى ظل الأزمة الراهنة اللى بتمر بيها مصرنا الحبيبة
وفى ظل تضارب وجهات النظر نحو السيناريو الأصلح للفترة المقبلة تحديدا
حاولت من خلال وجهة نظرى افسر وجهة نظر كل الآراء اللى شوفتها
قد تكون دى حاجة تخلينا اكتر تقاربا واحساسا ببعض
او بمعنى تانى نحاول نعرف كل واحد بنى وجهة نظرة بناء على اية
ونشوف لو كنا مكانة وفـ نفس ظروفة كانت هتبقى وجهة نظرنا نفس وجهة نظرة ولا هتختلف
طبعا الموضوع اللى احنا مختلفين فية واضح ومعروف
وهو
تنحى الرئيس المصرى حسنى مبارك فورا
تعالوا نعرض مع بعض كدة وجهات النظر
وجهة النظر الاولى
بتقول لازم حسنى مبارك يمشى دلوقتى قبل بكرة
ودى انا اعتقد ان اللى بيقولها فئتين
الفئة الاولى .. فئة بتتعامل مع الموضوع كأنة ثأر شخصى وهدى امثلة
واحدة فقدت ابنها لانة كان مصاب اصابة بسيطة ولكنة اتعامل باستهتار فى المستشفى فـ مات
او شخص متغرب سمع كلمة اهانة ومقدرش يرد فرجع بالاسباب لقى انة اضطر يسيب بلدة (اللى مش موفرة لية لقمة العيش) ويتغرب ويعانى فى غربتة ...فنشب فى قلبة نوع من الغل والحقد
او شاب عدى ال 30 ولا عارف يشتغل ولا عارف يتجوز ...حياتة واقفة
وغيرها من الامثلة اللى على نحو هذا القبيل
كل الشخصيات جسدت كل آلامها وعنائها وظلمها و .. و .. و ... فى شخص الرئيس حسنى مبارك
باعتبارة المسؤل الاول عن كل المعانى السيئة دى
وشافت ان رحيلة دلوقتى وبالصورة دى اقل عقاب لية
وفى فئة تانية
عندها وجهة النظر دى لانها شايفة ان دة بيخدم اهدافها ومصالحها بشكل كبير
اول مثال .. الاخوان المسلمين ... اصرارهم على عدم التحاور بحجة التردد
ومطالبتهم بالرحيل فورا...رغم ان الحوار مع الحكومة اعتراف رسمى من الحكومة بوجودهم وعمل كيان ليهم
دة بيدل بالتأكيد ان رحيل الرئيس فى مصلحة ابعد واكبر من كدة
تانى مثال ...اشخاص مأجورة
يمكن يكون فى اشخاص واقفة حاليا فى ميدان التحرير بتاخد فلوس نظير الوقفة دى والشعارات دى
ودة مش اختلاق للأمور ...دة تردد فى وسائل الاعلام ..وبـغض النظر عن الصح او الغلط انا بفترض كل الاحتمالات
وجهة النظر التانية
بتقول .. مبارك يرحل اة ...لكن دلوقتى لا
اعتقادا منهم ان الرحيل دلوقتى هينتج عنة فوضى و هيأدى الى نتائج وخيمة
(و دى وجهة نظرى)
ودى تقريبا وجهة نظر معظم فئات المجتمع المصرى
اللى بيقول يعم مصالحنا هتقف والبلد هتبقى فوضى.
واللى بيقول الوزارة الجديدة هتعمل حاجة مع الفريق احمد شفيق.
واللى بيقول (لآ) ..مش هناخد اوامر احنا من القوى الخارجية زى امريكا واللى هتقولنا علية هنعملة.
واللى بيقول ان الرئيس كدة كدة ماشى بعد كم شهر بشكل سلمى .
واللى بيقول الرئيس صاحب الضربة الجوية الاولى فى 73 و زى ما عمل حاجات وحشة عمل حاجات حلوة .. وكرامتة من كرامتنا ولازم يخرج بشياكة .
وجهة النظر التالتة
هى وجهة نظر بتقول نعم لمبارك قبل كدة ودلوقتى وفى المستقبل
هى فئة عايشة فى مصر اخرى ...اعتقد انهم بيفتقدوا لمعنى الاحساس بالغير
يعنى فئة مقابلتهاش مشاكل كتير...لم تعانى من شئ فى عهد حسنى مبارك
فبيحسوا ان دة فى افتراء وظلم واقع على الرئيس حسنى مبارك
لانهم فعلا كأشخاص ماشافوش منة اى حاجة وحشة
اعتقد ان دول ال 3 وجهات نظر الاساسيين دلوقتى
المفروض
ان اى حد مصرى اتولد على ارض مصر واكل من خيرها لازم بحكم المنطق وبحكم الانتماء وبحكم الدين يتمنى الخير لبلدة
فى فئات داخل وجهات النظر اللى طرحتها للأسف لا تعترف بالمعنى دة
واهم حاجة عندها هى مصلحتها..لازم نكون شايفينهم وكاشفنهم عشان فى المستقبل نعرف نتعامل معاهم بالشكل المطلوب
ملحوظة اخيرة : تحليل وجهات النظر دى من وجهة نظرى ...قد يختلف البعض معايا ودة امر وارد جدا
..
..