[P R ! M O]

ما هو رأى حماقى فى اللى بيحصل فى البلد؟

هو دخل بنفسة على الفيس بوك للتعبير عن اللى بيحصل فى البلد دلوقت عشان نوصل مع بعض لوجهة نظر نتفق كلنا عليها ونحاول على قد ما نقدر نوصلها لأى حد نعرفه فالتحرير وحماقى فعلا وصل وجهة نظره لكل اللى يعرفهم.
فالتحرير بس احنا بنتمنى المشاركة تكون مننا كلنا عشان نقدر نوصل وجهة نظرنا لأكبر عدد من الناس وكمان حماقى هيبقا موجود فى برنامج مصر النهارده ان شاء الله عشان يتكلم على الهوا ويوضح للناس وجهة نظره وأول ما يتحدد معاد الحلقة هنعلن عنها علطول.

هذا هو رأى حماقى عبر صفحتة على الفيس بوك
مساء الخير عليكوا كلكوا
أولا انا لازم أبدى إعجابى وتأييدى للشباب الرائع بتوع 25 يناير
ولكن كمان عايز اقول إنى خايف لا الحلم الجميل يتحول كابوس وعايزين نوصل لوجهة نظر إننا إزاى نحقق المطالب بتاعتنا من غير ما نخسر حاجة.
خلينا نمشى واحده واحده
1- أكيد مطالب الشباب دى هيا مطالبنا كلنا وكمان هيا مطالب مشروعة تبدأ بالثورة وتنتهى على مائدة الحوار يعنى تبدأ بالثورة وتنتهى بالسياسة.
وبعدين لما نكون بنتكلم عن عهد جديد وحرية يبقا لازم نكون أول ناس نلتزم بيها يعنى لازم نحترم الرئيس حتى لو مش عايزينه.
2- المشكلة دلوقتى ان الناس بتقول إن مابقاش عندهم ثقة فى إن الريس هينفذ اللى قاله .. ماشى.
أنا معاهم إن الكلام ده حصل فى غرف مغلقة بس الريس أعلن فى بيان رسمى بنفسه صوت وصورة إنه مش هيترشح تانى وكمان إنه هينفذ كل المطالب وكده الموضوع بقى أمام الرأى العام الدولى يبقا مافيش مجال للخوف.
مافيش شك إن كلنا قلبنا بيتقطع على الشهداء اللى ماتوا ولكن عندنا فرصة إننا مانخليش الشهداء يزيدوا وكمان حق الشهداء دول علينا هوا نجاح الثورة اللى ماتوا من أجلها
وموضوع الثقة المفقودة عايز اقول لم يعد للرئيس مبارك أهداف فالسلطة والحكم لإن بعد أن فقد الشرعية أمام العالم كله ووضح إن الشعب لم يعد يريده وكمان حلم التوريث تبخر لم يعد للرئيس إلا أن يختتم ولايته بشىء يذكره الشعب والتاريخ بالخير
انا مع التغيير وكمان مع شباب 25 يناير علشان يكون ده واضح
بس شايف إن دور ميدان التحرير خلص بعد خطاب الرئيس اللى وافق فيه على المطالب ودلوقتى بييجى دور ناس تانية فالتفاوض على كيفية تحقيقها ناس عندها خبرة سياسية نثق فيها ويتحملوا مسؤولية التفاوض.
يعنى أديكوا مثال
احنا فى حرب أكتوبر كسبنا الضربة الأولى اللى بان منها للعالم كله إننا انتصرنا وكان عندنا حاجة من الإتنين دول:
1- نقف ونتفاوض على مكسبنا
2- نكمل ونطمع إننا نوصل لأبعد نقطة فإسرائيل
اعتقد لو كنا طمعنا فالحاجة التانية كنا ممكن نخسر أنتصارنا .. يا ريت تكونوا فهمتوا قصدى
يعنى لما إتاخدت مننا سينا حددنا مطلبنا وهوا رجوع سينا وبالتفاوض بعد النجاح فالضربة الأولى اللى العالم كله شافها واقتنع بيها عرفنا ناخدها من اليهود اللى طبعا ماعندناش أى ثقة فيهم.
ما بالكوا أن حقنا دلوقت فى إيد الراجل المصرى اللى حارب علشاننا سواء بنحبه أو لأ.