يوميات عريس وعروسه
يسعد مساكم او يسعد صباحكم المهم أنه يسعد وخلاص :vb12::vb12:
فاكرين أول أيام جوازكم ولا انتم لسه علي البر :hayth1:
طيب لما تكونوا هتشوفوا ايه اللي بيحصل
ومع تجربه عشان تتعلموا يا بنات وتعرفوا ولا اتجوزا شافوا وياما هيشوفوا
تعالوا نعرف منها يا اختي يومياتها ... طيب انا لما كنت لسه عروسه جديدة وزي القمر أكيد أكيد 
:Sh_077:
أكيد أكيد
في أول جوازك حصل منك مواقف كتيرررر منها اللي بيضحك
ومنها االي بيخليكي تقولي علي نفسك أيه اللي أنا كنت بعمله ده
النهاردة بقى قلت احكيلكم على بعض من المواقف ..........
اللي ممكن تحصل
في أول ايام الجواز
طبعا الواحدة اول ما بتتجوز بتكون لسه عروسة ننوسة عسوله بالرورب مشغوله والمكياج مهوسه بنوتة كده مدلعة وايديها ناعمة ولسه متعرفش يعنى ايه جواز... ولا شغل بيت... ولا مسئولية ... ولا اى حاجة من الشغل ده نهائي شوية تلاقى المطبخ... وشوية تلاقى مسح ...وغسيل ...ومواعين ...وهدة حيل يعني بتبقي السكينة سارقها ..... فبتفوق كده وتصحصح وتبقى فريش وتعرف انها كانت مطلعة عين مامتها وباباها وقاعدة حاطه رجل على رجل ولا هى هنا المهم ان الواحدة لما بتفتكر بتقعد تترحم على الايام الخوالى واي عروسة وكده بتحاول اى والنعمة بتحاول جاهدة انها تعمل اى حاجة فى البيت ... علشان يقول عليها شاطرة وست بيت تمام
عشان كده عيواكم تتخيلوا معايا الموقف
دي اللي أكيد أكيد بتحصل
لكتير مننا في أول الجواز
** أول حاجة عملتها كان جوزي بيحب العصير أوي
وأنا بقول كان لاني معتقدش أنه بعد الموقف
ده لسه بيحب العصير.... المهم
كنت اعمل عصير يكفى مصر والدول الشقيقة
والمجاورة كلها
واحطه فى التلاجة
وكنت اقول يلا علشان معملش كل يوم وهو يعنى هيجراله ايه؟؟
وكان يقعد بالأيام في التلاجة واروح اقول لزوجي
العزيز وانا برقق صوتى زى الضفدعة.
انا : اجيبلك يا حبيبى العصير اللى فى التلاجة تشربه؟
هو كان يزغرلى بعينيه ويقولى عصير هو فين العصير ده يا امى ؟؟
ده بقى مخلل وحمض وعفن وريحته طلعت ...
.انتى فكرانى البلاعة اللى بيدلقوا فيها بواقى الاكل
طيب اعزمى على بحاجة عدلة مش عفنت وماتت من شهور
انا : لا يا حبى على فكرة هى لسه ما ماتتش والا كنت دفنتها
هو : يا مثبت العقل فى الراس يارب
** قلت طيب اطلع الموهبة المدفونة ... واعمله اكله محصلتش رحت اشتريت فرخة وخدت غطس فى الحلة وبعدين طلعتها
نشفتلها علشان متخدش برد ... وحطيتها فى الشواية بتاعت الفرن لكن للاسف طلعت فار مسلوخ واول ما شافها زوجي العزيز اتخض وطبعا سألني أيه دي
انا : دي فراخ يا حياتى ... هو بصلى وبص للفرخة وقال... هى تقريبا كانت فرخة بس شكلها اتحولت لكائن غريب
انتى عملتيها ازاى يا روحى جتك قصف روحك.. وحش رقبتك
عادى انا سلقتها شوية وخليتها تبلبط فى الميه وبعدين دخلتها شواية الفرن .... وغزتها بالسيخ المحمى فى صرصور ودنها
وكل دقيقة كنت بفتح الفرن الاقيها واقفة مكانها مش بتلف.... ولما زهقت قعدت الفها بايدى لحد ما بقت كده ... ايه مش حلوة؟؟ هو : بتلفى السيخ يا ماما ده بيلف لوحده..... وبعدين السيخ فيه ماسكتين بيتقفلوا عليها وتلف لوحدها
ايه اللى هببتيه ده؟؟ يا فلوسي وجيبى اللى اتخرب
انا : يا حبيبى وانا اقفل عليها ليه وهى كانت هتهرب ؟؟ يعني مش كفاية كان مقفول عليها القفص وهي عند الفرارجي كمان هنقفل عليها الفرن بعد موتها هو : يا دماغى .. هتموتينى .. مش مهم الفرخة... فين الشوربة بقى ؟؟
انا : شوربة ..!ودى بتتعمل ازاى؟؟ انا معرفش
هو : يا خرابى الشوربة ..الميه اللى سلقتى فيها الفرخة ... الشوربة السخنة الملهلطة دى؟؟
انا : اه انت تقصد الميه اللى الفرخة خدت فيها غطس
اه بس انا رميتها... لقيتها مش حلوة ودسمة خفت علي صحتنا لما نشربها فرميتها هو انت كنت عايز منها حاجة؟؟
هو : صابرني يارب
فى يوم صحى من النوم مفزوع ....
وانا عمالة اصرخ وبجرى عليه
انا : الحق ...الحق الغسالة ... بتزمر وهتقع وهتوقع البيت
هو : ايه فى ايه ؟؟ ايه الصوت ده ؟؟ رعبتينى ... وقلقتى منامى ..
انا : مش عارفة انا حطيت الهدوم علشان تتغسل ولقيت الغسالة
بتجرى من مكانها وبتزمر
هو : اقول عليكى ايه ؟؟ كل ده غسيل حاطاه فيها ؟؟
دى بتشيل خمسة كيلو ....مش 150 اخ يا نارى منك ...
اعمل فيكى ايه؟؟ فزعتينى
انا : هاتلى غسالة اكبر بتشيل كتير... لحسن دى اظاهر ان ايدها بتوجعها وبتصوت لما الغسيل بيتقل
شكلها غسالة صحتها على ادها
هو : ماحدش يحوشنى ...ما حدش يمسكنى هموتها .. طراخ
يوم تانى لقيته واقف ادام باب الدولاب .... ومتنح ووشه اصفر ومبيتكلمش انا : مالك انت لقيت عفريت فى الدولاب ولا ايه؟؟
مالك متسمر مكانك كده ليه؟؟
هو : ايه ده هدومى كلها بقت ملونة كده ليه كل
حتة ميت لون ؟؟
انا : ايه يا حبيبى مهدومك نضيفة وزى الفل
اهى وريحتها برفيوم واخر دلع
انا بس لقيتهم وسخين فخدتهم نقعتهم تلاتة ايام
....وحطيت عليهم كلور
هو : يا مصيبتى يا هدومى يا عشرة عمرى كله... كلور يا شحتفة قلبى
طيب وهدومى وقمصانى حبايبى البيض اللى مابقاش حيلتى غيرهم... هما فين؟؟
اوعى تقولى نقعتيهم في جاز ولا حطيتى عليهم شوية زفت ومازوت... ما انتى مهفوفة وتعمليها؟؟
انا : ليه وانت شايفنى عبيطة ولا هبلة؟؟
انا اصلى لقيتهم وسخين ووحشين ... وقعدت اغسلهم لحد لما تعبت
زهقت رحت حطيتهم مع الفوط في الغسالة وشغلتهم علي السخن
وطلع لونهم كده ... يالا أهو تغير
هو : يا خرابى يا هدومى اعمل ايه انا دلوقتى؟؟
اروح الشغل بلبوص ...ولا انزل بالطقم الداخلى ؟؟
منك لله يا شيخة والله لخلى ليلتك بمبى زى لون الهدوم
انا : ايه يا حبيبى بمبى ايه وبتاع ايه ؟؟
الربيع لسه مجاش
هو : الحقونى يا هوو قبل ما ارتكب جناية واروح ابو زعبل
يوم دخلت لقيته مبهدل الاوضة وجايب عاليها واطيها وعمال يكلم نفسه زى المجانين .....ويرمى ورق شمال و يمين
انا : ايه يا حياتى انت بتعمل ايه ؟؟ انا لسه مروقه حرام عليك
هو : اه يبقى انتى مفيش غيرك
انا : طبعا يا حياتى وهو فى حد فى حياتك غيرى؟؟
هو : قوليلى فين الورقة اللى كانت هنا على
المكتب جنب الكمبيوتر ؟؟
أنا : ورقة أيه يا حبي
اه... افتكرت انا لقيت الدنيا مكركبة فقلت اروق
ورميت كام ورقة كده فى الزبالة روح دور بقى
هو : هاقتلك وهطلع فى خلف الأسوار .. الزبالة يا مفترية ؟؟
انا : يلا ده انت حظك حلو انى لسه مطلعتهاش للزبال ... اجرى دور بقى
هو : اخ يا عالم يا هوو... حد يخدها من ادامى
انا : ايه يا روحى كل ده علشان قلتلك دور فى الزبالة
معلش لو زعلان علشان ايديك هتتوسخ.... ابقى اغسلها وحط برفيوم مفيش مشكلة
هو : لا سيبونى عليها بقى
فى يوم واقفة بكوى الهدوم.... فشم ريحة شياط
هو : الريحة دى من عند الجيران ولا ايه ... البيت شكله بيولع بينا انا : اهىء... اهىء لا.... بس وانا بكوى هدومك يا حبي لقيت المكوة لزقت وطمعت فى حتة من القميص .. فسيبتهالها لحسن عينيها تكون فيها
هو : ايه.. هدومى اتحرقت يا لهوى يا امه... تعالى شوفى هدوم ابنك
القادرة المفترية حرقتلى هدومى... اروح فين يا ناس ؟؟
انا : ما تروح مطرح ما انت عايز ...ومال طنط ومالنا دلوقتى؟؟ زمانها نامت وبتاكل رز مع الملايكة
وبعدين لو زعلان على الهدوم مش مهم ... الموضة السنة دى المقطع والمشرشب
يلا يا سيدى بقيت على الموضة ادعيلى بقى
هو : "بيعيط" ربنا ......... سميع ..عليم ..مجيب وعالم بحالي وقادر علي كل شئ
كان راجع من الشغل.... واول ما فتحت الباب
هو : ايه ريحة الحريقة دى فى حاجة بتولع
ومالك مسودة ووشك مهبب كده ليه؟؟
اوعى تكون بتكوى تانى .. وناوية تخلصى على بقية هدومى؟؟
انا : لا يا روحى انا بس كنت عملالك مفاجاه وباظت
هو : مفاجأه... يبقى استر يارب
انا : لا بس اصلى كنت عايزة اشوى لحمة على الفحم ... كنت عايزة اعملك باربكيو
وولعت الفحم مرضيش يولع ... رحت بذكائى الخارق جبت شوية بنزين ودلقتهم عليه فولعت فى البلكونة والشواية واللحمة
اهى ...اه... اه
هو : يا نهارك اسود... ولعتى الفحم بالبنزين؟؟
اخ.... يا نفوخى اللى ولع ...رشوا على
راسي شوية ميه ولعت من ذكائها الخارق
انا : لا يا حبيبى متخافش مراتك شاطرة بردوا
وبذكائى الخارق طفيته بطفاية الحريق بتاعة العربية ...
شفت انا شاطرة ازاى؟؟
هو : ذكائك تانى؟؟ اه ابقى شميت مش شفت ....
يارب الصبر من عندك
انا : انا كنت بغسل الحيطة بسلكة المواعين
وقلت اما اغسل الفيش كمان ....اصلهم كانوا مبقعين مطرح صوابعنا
هو : ايه غسلتى الحيطة بالسلكة والصابون
وكمان الفيش ؟؟
طيب اما اموت بقى ... واعدلونى على القبلة
انا : يا روحى ما تخافش .. وانت ليه
تمسك الفيشة وهى مبلولة ؟؟
عموما متخافش ...مش هتتكهرب بس انت
البس شبشب فى رجلك ... او لما تتكهرب
ابقى امسك الخشب
هو : انا همسك الخشب اكسره على نفوخك
انتى يا مجنونة يا خريجة السرايا الصفرا
انا : لا يا حبيبى انت نسيت ولا ايه؟؟ انا خريجة
تربية مش السرايا الصفرا
دى اكيد شهادة تانية مش بتاعتى
هو : انا عملت ايه بس في دنيتي يا ربي
يومين كده ....ودخل جوزي العزيز على المطبخ
وكنت واقفة بغسل المواعين... وانا عمالة اغنى وفجاه دخل خضنى ووقف متنح
هو: فين الحلل التيفال يا هانم؟؟
انا :" تى فال "... انا مش بعرف الا ..." تى شاى "
هو : انتى هتهرجى معايا ولا ايه؟؟
انا اقصد الحلل اللى قعرها اسود دى ...
اللى الحاجة مش بتلزق فيها
عملتى فيها ايه؟؟ انا مش شايف ولا حلة واحدة
...احنا كان عندنا طقم بحاله
انا : اه طيب ما انا غسلتها يا حبيبى ....
ودعكتها اوى بسلكة المواعين لحد ما خليتها بتبرق من اللمعان... حتى شوف مرايه
هو : بيعيط.. ايه غسلتيها .. غسلتى الحلل التيفال بالسلكة يا مفترية ؟؟
دى بقت حلل المونيوم... منك لله .. الماذون .. ودونى للماذون
انا : ايه انت زعلان علشان انا نضيفة ومش بسيب الحاجة وسخة وخلتها زى الفل ؟؟
وبعدين وهو الاكل هيلزق فى الحلل ليه هى الحلل فيها لبانة ؟؟
هو : حسبى الله ونعم الوكيل
انا كشفت راسى... ودعيت عليكى بعدد شعر
صدرى اللهم امين أنا كنت قاعد في بيتنا مرتاح
البال ايه اللي خلاني أنتص في نظري وفي عقلي
والله الحق على .....انى اتجوزتك اصلا
اهىء اااااااه .. اهىء ااااااااه .....الحقينى يا مامى ...تعالى خدينى يا مامى ...انا بعيط يا مامى ... بليز هلب مى مامى بليز
اهىء... اهىء ...اهىء