[مصطفى خفاجة]

حرقوا قلبي عليك .. إلهي تحرق قلوبهم
يارب مش كتير عليك .. تسلط عليهم ذنوبهم
وراك رجاله يا خالد . صوتهم بس بيرعبهم
يارب .. قويني وأشوف فيهم يوم
يارب . ضنايا فى حماك مات مظلوم
قلب الأم . الحزن دايمآ جواه مكتوم
اصحى يا خالد نومتك دي بتعذبني
شوفت غيابك كبرني ازاى عن سني
علشان خاطرى رد عليا .. يابني
نفسي تضحك في وشي زي زمان يا كبدي
مش عارفه ليه البخت والنصيب واقفين ضدي
مال عنيك حزينه كده . يا عيون خالد عليا ردي
مش ده شكلك .. ولا دي ملامحك
قلبي دايمآ راضي عنك ومسامحك
إلهي يحرق قلب اللى جـــــرحــك
كان نفسي أفرح بيك وأختارلك عروستك
كان نفسي تنام في حضني وتفرحني بوستك
قلبي موجوع يابني ومش عاوزه تفارقني صورتك
يارب ما تكتبها على حد ويشوفوا اللى شوفته
يارب ما تحرم أم من ضناها وإكرم خالد في نومته
وإنتقم من اللى ظلموه وناري هاتبرد لما يتشانقوا
وذلهم يارب .. دول بيقولوا عليه بتاع البانجو
حبايبك مش ساكتين يا خالد ومن الظلم اتخانقوا
قوم يا حبيبي .. شوف البلد كلها في ثورة
قوم .. دول كانوا عاملنها عزبة وبيعه وشروه
حاسه بيك يا حبيبي ولسه ما بردتش نارك
لازم يرجعوا الحق لاصحابه ويعدموا مبارك
وبكره هترتاح والليل في قلبك يتحول لـ نهارك
ايوه افرح يا شهيد .. انت نايم دلوقتي على حرير
ربنا يرحم شبابنا اللى ضحى بحياته في التحرير
ويقوي اخواتك اللى دايمآ بينادوا بالعداله والتغيير
أنا يابني خلاص .. احتسبتك عند الله شهيد
شايفاك في منامي .. ملاك بيبتسم وسعيد


إهــــداء إلى روح / خالد سعيد
بمناسبة مرور عام على وفاته
ويصبر والدته .. آمين يارب