[حلا على]

شبشب الهنا
____

اه يا شبشب جبته بايديا


وعزمت وقلت عليه نيه


لو تطلع يوم مش على أدى


راح اشوطك والله برجليا


اه يا شبشب لونك ليه فاقع


فى كلامك لف وبتلاوع


لو تطلع يوم تلعب بيا


راح اخلى نهار امك ضايع


اه يا شبشب يركب مرجيحه


ويخزن دهبه فى صفيحه


ويسن اسنانه وياكلنى


والخيبة ليا وزحليقه


اه يا شبشب صيتك بيلالى


والتقوى شعارك يا ضلالى


ولهفت الدور كله لوحدك


والخيبة قاعده وبقيالى


اه يا شبشب فيلا وعربية


وفاكرنى ولاية مع تكية


ماتلم الدور بس يا خفه


دى فضيحتك عالية مدوية


اه يا شبشب وكسة على حوسه


دى الريحه قرع مع الكوسه


ومناصب تبرق لحبايب


وهات لى الرق يا ننوسه


اه يا شبشب جبته يفرحنى


من اول لبسه يمررنى


اخرتها هقولك من تانى


حرمت أشوفك توعدنى


اياكشى فاكرنى محتاسه


خط وبتخطه فى كراسه


اياك تستهر بجنابى


انا سيبت خلاص النخاسه

قلم حلا على