[SiLver Spectra]

اقتباس المشاركة الأصلية كتبت بواسطة Iѕlαм Ч 3αlαм ف السريع كده أولا ياطارق انت اهتميت بعيوب الدكتور حازم فى نقطتين النقطة الاولى ممكن تقولى المعلومات الخاطئة اللى قالها بالدليل تانى حاجة موضوع الكاريزما ده موضوع ضعيف اوى ومايعتبرش عيب من عيوب الشخصية لانه مالهوش لازمة صوته تخين ولا رفيع مش ده موضوعنا وده اللى هانمسك فيه ونخليه عيب اهم حاجة الرؤية والقرار ودى الشروط العالمية لأى رئيس فى العالم بس احنا عشان دول عالم تالت فنظرتنا للرئيس بنظرة متخلفة عندك ديسلفا رئيس البرازيل السابق اللى كان بيتكلم باسم العمال وأوباما اللى كان بيتهموه بقلة الخبرة السياسية بالنسبة لنقطتين تانيين النقطة الاولى عبد الله استدل ليك بحديث ماتجيش انت تستدل بواقع عايز اقولك حاجة الدين الاسلامى صالح لكل زمان ومكان ومادام النبى صلى الله عليه وسلم قال ما أفلح قوم ولوا أمرهم امرأة يبقى ما أفلح قوم ولوا أمرهم امرأة لان هناك فروق بين الرجل والمرأة فى الطبيعة واعتقد دى مستمرة من بداية الخلقة الى نهايتها مش هايجى يعنى ف يوم من الايام المرأة تبقى زى الرجل اعمل نسبة وتناسب بين النساء والرجال ع مستوى العالم وشوف مين عددهم اكتر فى منصب الرئاسة ولو انت بستشهد دائما بامريكا شوف كام واحدة مسكت رئاسة امريكا اعتقد صفر حسب معلوماتى إن شاء الله مش عشان واحدة او اتنين نحجت يبقى خلاص الدنيا بقت زيطة وعايز اقولك حاجة ان بدى ليك ان المرأة نجحت ان شاء الله الدولة اللى ترأسها امرأة هاتفشل مصداقا للذى لا ينطق عن الهوى النقطة الثانية بما انك بتقول وغيرك من الناس مجلس الشعب ما عملش حاجة لغاية دلوقتى بداية كده ممكن تقولى ايه وظيفة مجلس الشعب؟ ( مع العلم انه سلطة تشريعية مش تنفيذية ) وبعدين هو فساد 30 سنة هايتعدل فى شهور ...!!! بالنسبة لعبد المنعم أبو الفتوح احترم وجهة نظركـ لانتخابه لكن فين رؤيته الاصلاحية؟ الراجل محترم لكن مش بالاحترام تُقام الدول حد يقولى ليه الناس بتنتخبه يمكن انا مش واخد بالى؟ ع العموم الحلقة مميزة تسلم يا أخ خالد ع الحلقة بالتوفيق

انت داخل زعلان أوي يا اسلام هههه
هي وجهات نظر , انت شايف ابو اسماعيل كويس و انا مش قولت اني مش بحترمه لكن وضحت بعض نقاط الي مش عجبتني فيه
دا فيديو اتمنى تسمعه



طبعا مش عايزك تمسك على الكلام الي الشخص كاتبه بقدر ما تشوف رد الشيخ حازم و تعليقه
ما عبجنيش و حسيت فيه تعالي شوية عن ذكر انه كان خاطئ
موضوع كلمة بيبسي اصلها ايه اعتقد فيها جهل شوية
بس انا بقر ان عقلية حازم ابو اسماعيل اتغيرت بعد ما شارك في السياسة
أو زي ما بيقولوا اتودك شوية , لكن دا برضو ما يسقطش الكلام الي صرح بيه في الفيديو عن كلمة بيبسي

بالنسبة لمجلس الشعب فانا ذكرت احداث بعينها و المجلس مسؤول عن المحاسبه
زي التمويل الاجنبي , دا فيه سقطة للقضاء و تداخل في السلطات التنفيذية و القضائية
و انت عارف ان الفساد دايما بيتواجد في وسط مافيش فيه فصل بين السلطات
و المجلس بتقع عليه مسؤولية المحاسبة و هما عارفين ان العسكر الي مسؤول عن رفع حظر السفر عنهم و تهريبهم و ماحدش فيهم نطق ضده غير انهم بيضربوا في البردعة (الجنزوري)
الوحيدين الي نطقوا بشجاعة هما اصحاب الفكر الليبرالي و دول انت عارف انهم اقلية

بالنسبة للحديث الي ذكره عبد الله , فانت بتاخد الكلمه و بطبقها بدون تفكير
أنا مش كدا ,, المقاييس بتختلف و دا مش امر عقائدي او تشريع عبادي عشان تلزمني بيه
الرئيس مش مطلوب منه دلوقتي يركب خيل و يشيل رمح و سيف
الفروسية و القتال كان من أهم عوامل القيادة سابقا
أما دلوقتي فالعملية بقت كلها اقتصادية
و فكرة اني اقول ممنوع الست تترشح فدا عنصرية
في فرق بين انك مش تصوت لست و بين انك تمنع الست انها تترشح
و أنا شخصيا مش ببص لا للدقن و لا لخلفية المرشح السياسية و لا لجنسه و لا لعرقه بقدر ما بشوف مدى قوة عقليته سياسيا و اقتصاديا

انت مقياسك بقى مبني على الجنس فدي وجهة نظرك
أنا وجهة نظري تترفع عن اي شكل من اشكال العنصرية
ابو الفتوح دا ماهو في الاصل اخواني و أنا فكري مش اخواني و بنتقد الاخوان في كثير من المواقف
بس أنا زي ما قولتلك مقياسي بيترفع عن اي خلفية و اي جنس و عرق
مقياسي على البرنامج و مواقف الشخص فقط

انت عندك ستات بيدرسوا في الجامعات محترمين و كفاءة و كل حاجه
مش عايز اقولك كمان ان في الكلية عندنا مثلا بتلاقي البنات عندهم اهتمام اكبر و بيتلزموا اكثر و دايما بيحضروا معاهم كل ادواتهم و بيهتموا بالتفاصيل و غيره ,,
مقدرش احرمها و اقولها و الله اصل الحديث بيقول كذا فأنا هعين رئيس القسم راجل أو عميد الكلية راجل
دا بحد ذاته ظلم و فساد و الدين فرض لرفع الظلم و المساواة

و أعتقد المقياس بيختلف و دا مش عيب اننا نقر بيه و لا هو كفر لانه مش تشريع سماوي
زي لو قولتلك دلوقتي مافيش جواري ,,ممكن اقولك طب ازاي الجواري و شراء الرقيق الي محرم دلوقتي دوليا حتى مش بس اسلاميا ,,ازاي الرسول كان عنده جاريتين و كانوا الصحابه عندهم جواري و مش حرموا حاجه زي كدا؟
هقوللك المقاييس اختلفت دلوقتي بكل المقاييس الضوابط
برضو فكرة انك تتجوز بنت اقل من عشر سنين ,,دلوقتي صعب لان المقاييس تختلف
معيشتك دلوقتي مش هي معيشة الانسان من الف سنة
و الا لو انت مش بتحترم مقاييس الزمان يبقى انا من بكرا هروح اشتري بنت من السوق و انام معاهاو اقولك كانوا زمان بيعملوا كدا , و احط ضوابطهم في الجواري الي هو لو خلفت منك تبقى مراتك و لما تشتريها تبقى بتاعتك بس لحاد ما تبيعها و غيره!!
أنا لو لغيت عقلي ومش حطيت معايير الزمن و الوضع الي انا عايش فيه ابقى مجنون

اعمال العقل أوصانا بيه الكتاب في ذكره دايما كلمه (افلا تعقلون)
و مش لازم تفهم كلمه مقاييس يعني ايه دا هنهد الدين!! لا يا اخي مش تبقى يمين اوي او شمال اوي
الدين صالح لكل زمان لانه دين مرن و بيحترم مقاييس المجتمع و بيقدرها بدليل انه مش حرم الجواري و لا حرم الزواج من بنت اقل من عشر سنين في عهد الرسول لان مجتمعهم كان بالنسباله دي اشياء عادية و مشروعه

و عامة دا رأيك انت حر فيه
زي ما أنا راي ان الشخص الي بينظر للجنس و العرق في القرن الحادي و العشرين فهو عنصري


و دا برنامج مصغر لابو الفتوح

اقتباس البرنامج يرتكز على أربعة محاور هيالأول تعزيز الحريات في مصر، ويشمل ذلك حق المواطنين في إنشاء نقاباتهم ومنظماتهم المدنية وحقهم في التعبير عن آرائهم بالوسائل المختلفة. الثاني إعلاء قيمة العدل في المجتمع المصري، وذلك عن طريق قضاء مستقل له كادر خاص يحفظ للقضاة كرامتهم واستقلالهم. الثالث محور التعليم والبحث العلمي، إن أي دولة لا يمكن أن تتقدم بدون الاهتمام بالتعليم. الرابع يتمثل في فتح أبواب الاستثمار في مصر أمام الدول العربية بصفة خاصة، وجميع المستثمرين بصفة عامة. هذا ما ورد على لسان الدكتور عبد المنعم أبو الفتوح بالإضافة إلى تنمية السياحة ووضع خطة شاملة للوصول إلى 200 مليون سائح سنويا وهو بالفعل الرقم الطبيعي التي تستحقه مصر في النشاط السياحي وقارن ذلك بعدد السائحين الذين يزورون دولة تونس الشقيقة والذين يتعدوا ال 25 مليون سائح سنوياً وهذه هي الركائز الاساسية للبرنامج وليست البرنامج كاملاً اما ما نطلبه ونريده وسنشارك فيه جميعا لتحقيقه, لأن أي برنامج بدون شعب يعمل على تحقيقه والحفاظ عليه وتنميته لن يتحقق مهما كان هذا البرنامج: - العدل والامن والحريات - انشاء نظام تعليمي ينمي موهبة وذكاء الفرد - التوسع الافقي فنحن نعيش في 4% من مساحة مصر - الصحة ومنع الزراعة بالكيماويات والتربية بالهرمونات - الاستغلال الامثل لمصر كدولة سياحية - استغلال خامات مصر لتجعلها اكبر الدول الصناعية - تنمية الشعب ككل من النشىء إلى الكبار - حل مشكلة البلطجية وأطفال الشوارع و الأحداث - رعاية الأيتام بما يحفظ كرامتهم

نقاط باختصار لو بحثت هتلاقي نقاط أكثر
و بالمناسبة انا بحضر مؤتمرات لابو الفتوح و لحازم ابو اسماعيل
عشان اقدر اختار بأمانة لازم استمع للكل
لسه امبارح كان حازم عندنا في دمياط
و انت شجعتني انزل الموضوع الي هكتبه من وجهة نظري بما اني شاهدت مؤتمر للمرشحين في نفس المكان , و هحط رؤيتي الخاصة

و عامة أنا بكن بالاحترام للاتنين

نورت,,