[احمد صلاح محمود]

تغريبة وجع

بطلت اكتب الشعر

أصل مش لاقى سميعة

ما هو كلامى مر

ودايما ع الوجيعة

بقول الصعب ما بهاود

ويقولوا عندى بيعاند

ياعم قول حاجة تفرحنا

خدنا م الحزن ريحنا

انت غاوى تدوخنا

شايف الدنيا حلوة قوى

قلت تجرحنا

مجروحين خلقة قطيعة

كل الكلام ف الجرح يتشابه

كل الكلام فى الالم واحد

وأنا يا حبيبتى ايش اكون

لو عشت حياتى عاقل

والدنيا جنون

وقانونها واحد

مفيش يقين كله ظنون

واياك فى يوم تصدق

انك بطل

انت مفتون

بص حواليك

تلاقيك ماشى

بتحاوطك عيون

بتقول بحبك

بتقول كرهتك

تقرر تبيع

تقرر تخون

تلقى قلبك

يقولك قطيعة

يا حبيبتى

نفسى أقولك بحبك

من غير ما التفت حواليه

نفسى أبوح ويفارق الدمع عينيه

يا حبيبتى

انا انت

وانت زهقتى

وبتسألينى مالك

مش عارف

صدقينى مش عارف

شعر / أحمد صلاح مشالى