[Sєяєєη●•ʚɞ]

عندك حق فى كلامك كله ..!!
موضوعك عبر عن كل الغيظ اللى جوانا ياطارق ،،
فعلا الاصوات اتشتت والكل كان فى حيرة بين صباحى وابو الفتوح ولو كنا اجتمعنا ع واحد كان ع الاقل قدرنا نواجة الفلول بقوة..!
والله ياطارق حاجة تقهر فعلا
وخصوصا لما تحس انك فى محافظة مختارة شفيق ..اتوقعت صباحى لان شريحة كبيرة م الشارع بدأوا يقولو صباحى
مش قادرة اقولك قرفانة اد ايه لما بسأل حد ويقولى انتخبت شفيق
مابقتش عارفة الناس دى بتفكر ازاى ..!!
عملنا مليونية علشان نشيل شفيق كرئيس ورزارء واتضرب بالجزم بعدها وفجأة العالم كله يلاقينا بننتخبة وبنصوتله وداخل اعادة وقرب من كرسى الرئاسة
شيزوفرونيا دى ولا ايه..!!
وشكلنا ايه قدام العالم ..!!
ورجعنا نختار نفس النظام اللى الناس ماتت واتقتلت علشان يتشال ،،
ورجعنا نختار نفس رئيس الوزراء اللى اتعملت مليونية علشان نشيله،،
واللى يشوفنا واحنا بنضربة بالجزم يقول استحاله انه هيكسب،،
هيكون شكلنا ايه لما رئيسنا يكون هو اللى ضربناة بالجزم..!!
دة لو كان راجل محترم كان انسحب من زمان لكن هو عارف ان وراه ظهر كبير من فسدة النظام السابق ،،
والمصيبه ان الناس البسيطة مؤيدة شفيق ويقولولك لا راجل محترم!!
بابا يرجع م الجامع ويقولنا تصدقوا ان الراجل اللى جنبى يقولى انتخبت شفيق هى ايه الناس دى ؟
كلنا فى البيت مذهولين ان فيه لسه ناس بتفكر فى شفيق "ضحكوا علينا العالم "
مش فاهمة يعنى اللى نزلوا انتخبوا شفيق دة ..كانوا قعدوا فى البيت احسن>>حرقة دم بشكل
ماكنا سيبنا مبارك وخلاص وماعملناش ثورة طالما جبنا تانى نفس فكر النظام اللى بقالة 30 سنة بيحكمنا
والله كلنااعصابنا باظت وبقى عندى ارتكاريا م ان حد يجيبلى سيرة انه انتخب شفيق بكون فعلا مش طايقاهم " مش عايشين فى الدنيا دول ولا ايه ولا حاسين بالشهداء اللى ماتوا "
دة ساب الناس ليله كامله يتقتلوا وطالع برواقة تانى يوم يعتذر..!!
دول ناس ضد مصر وعاوزنها تخرب..!!
للاسف ياطارق الوعى السياسى شبه معدوم وتلاقى الناس تختار اللى تعرفة احسن من اللى ماتعرفهوش،،،
انا انتخبت ابو الفتوح بالرغم ان كان ليا صحاب يقولولى مرسى وانا اقولهم ابوالفتوح او صباحى
بس كنت من البداية خالص ومن قبل الثورة رافضة فكر الاخوان ،،
بس دة مايمنعش انهم يستاهلوا احيهم لانهم اللى قدروا يجمعوا ويحشدوا نفسهم ويصمدوا قدام الفلول بالرغم من كرة جزء من الشارع المصرى لهم
ياريت فعلا ماكنتش الاصوات اتفتت بين ابو الفتوح وحمدين لانى انا شخصيا كنت محتارة بينهم لاخر لحظة
الخوف دلوقتى فى حاجة تانية..!!
فى الاعادة بين شفيق ومرسى
الخوف ان الاصوات تتشتت تانى
لان لو الاحزاب قعدت فى البيت وباقى الشعب قعد فى البيت وقال مش هنزل وانا ضد الاتنين
صوتنا دة كأننا بنديه لشفيق وبنساعد شفيق انة يكسب ..!!
لان شفيق كدة كدة الناس اللى اختارتة هتنزل تأيدة تانى ومعاه شريحة كبيرة
انما مرسى اللى بيأيدوة الاخوان بس والباقى ضدهم ..!!
وبالرغم انى ضد فكرهم بس هنزل اصوت لمرسى لانى لو قعدت فى البيت كأنى بدى صوتى لشفيق وللنظام الفاسد تانى
اصلنا لو قعدنا واعترضنا وقلنا مش هنصوت
ماهو كدة بندى الفرصة لشفيق انة ينجح وبنشتت الاصوات تانى..!!
وبالنسبالى لما بتحط قدام الامر الواقع لحاجتين مش عاوزاهم بختار الاهون
وعارف والله بالرغم وانا بصوت حسيت احساس عمرى فى حياتى اما حسيته "انى حرة بجد وعندى اهمية فى بلدى وليا صوت فيه وبختار رئيسى"
وانا ماسكة ورقة التصويت افتكرت الشهداء اللى وصلونا للمرحله دى واترحمت عليهم
فعلى الاقل اختيار مرسى اهون بكتير من شفيق
لان الكمية الكبيرة اللى ورا شفيق معظمهم من الحزب المنحل والفلول وشوية من الناس البسطاء اللى فاكرين الاستقرار فى شفيق ،،
وللاسف هينتخبوة بردوا فى الاعادة لانهم محقونين ضد الاخوان،،
وشفيق لو مسك البلد كأننا بنهدر دم اللى ماتوا لان مش هنلاقى حد اتحاسب وكل الفلول طلعوا ومافيش محاكمات شفافه،!!
فعلشان نوزن الكفه تانى يبقى لازم الناس الواعية سياسية تتحد ضد الفلول حتى لو كانوا مختلفين كليا وجزئيا معاهم.... لاننا لو اتشتتنا تانى يبقى مبروك لشفيق
والله ياطارق حاسة انى هختار حاجة مش مقتنعه بيها وانا نازله فى الاعادة بس عندى اشارك بدل اما اقعد وادى فرصة نجاح صوت للفلول وللنظام اللى كلنا كارهينة
ع الاقل الاخوان عانوا من النظام دة فهيحسوا بالشعب ونبقى ادناهم الفرصة اربع سنين علشنا لو ماعملوش حاجة هيفقدوا ثقه الشعب كله ومافيش حد هيفكر يختارهم تانى ..
رغيت كتير اوى .. تقبل رغى ومرورى