بداية مبروكـ على مصر انهاء مرحلة مهمة جدا وهى مرحلة اختيار الرئيس المنتخب
فـ البداية كنت حابب أوجة كلامى للناس اللى انتخبت الفريق أحمد شفيق
انا عن نفسى واحد فى حالة احتكاك باشخاص كتيرة انتخبوا احمد شفيق وهم اشخاص مثقفين وعلى قدر عالى من العلم وليهم اسباب مقتنعين بيها فى هذا الاختيار ومقدر حجم الاحباط والزعل بعد خسارة الفريق بالنسبة للاشخاص دى
لكن لما تيجى تفكر فيها بعقل وهدوء دون حماس تلاقى انة مفيش اى داعى للاحباط والزعل ,,
هتكلم فى نقاط محددة
اولاً اية الغاية والهدف من الاختيار لأى مرشح ؟ ,, الهدف واحد وهو ان الجميع يتمنى الخير لمصر متمثلا فى اسم معين ,, اذن احنا متفقين مش مختلفين نهائى ,, مش مهم مين اللى يتولى القيادة الاهم هو تحقيق الهدف المشترك
(وعسى ان تكرهوا شيئاً وهو خير لكم)
ثانياً ,, فى اى دولة فـ العالم عند اجراء انتخابات بيكون فى خاسر وناجح ,, انصار المرشح الخاسر طبعاً بيكونوا فى حالة زعل واحباط لكن الحالة دى بتكون مؤقتة وسرعان ما بيعودوا لحالتهم الطبيعية ويتقبلوا الوضع لان هو دة معنى الديمقراطية وهى دى ثقافة احترام رأى الاغلبية حتى اذا كانت مخالفة لـ رأيى
ثالثا ,, احنا دلوقتى تحررنا من اى قيود تحول بيننا وبين التعبير عن آرائنا ,, للجميع حق الاعتراض على د/ محمد مرسى اذا أخطأ من وجهة نظرة ولنا ميادين مؤثرة ,,
رابعاً ,, مش مطلوب تمكين المشاعر العدائية من التصرفات والافعال والتعاون مثلا مع المجلس العسكرى ضد جانب لمجرد الانتقام وتحكم الروح الانتقامية من النفس ,, ومن الواجب جعل مصلحة بلدنا فوق كل رأى وكل اعتبار
انا عن نفسى واحد لم ادلى بصوتى لـ محمد مرسى ولا لـ احمد شفيق لكنى احترم وجود محمد مرسى كرئيس اذا كان دة اختيار الناس ومش بس كدة ,, انا هتمنالة كل التوفيق وانة يكون على قدر المسؤلية الكبيرة وانى هقف موقف المؤيد لية فى تصرفاتة الصحيحة وموقف المعارض فى تصرفاتة الخاطئة وبطالبة بتنفيذ الوعود اللى أدلى بيها مسبقا عن وجود مجلس رئاسى ونواب وحكومة ائتلافية
وكنت حابب اوجة كلمة للناس اللى صوتت لـ د/ محمد مرسى
اولاً مش مطلوب الفرحة العارمة لان لسة الطريق طويل وصعب زى ما الكل عارف
ثانياً ودى نقطة مهمة جدا ,, طريقة التعامل مع الاشخاص اللى انتخبوا الفريق احمد شفيق ,, يعنى احنا قبل النتيجة كان كل صاحب رأى لية عذرة وانة متحمس وبيتبنى وجهة نظر وبيدافع عنها
لكن دلوقتى الموضوع منتهى ,, اتمنى انة يكون فى حكمة وتريس فى طريقة الكلام والتعامل ,, وعدم المساهمة فى تقسيم المصريين الى فريقين ,,
مش مطلوب ان كل واحد لية واحد صاحبة انتخب شفيق يتمادى فى الاستهزاء والتريقة على صاحبة
مش مطلوب حتى على مواقع التواصل الاجتماعى الاستهزاء من محافظة المنوفية مثلا و الغربية وحتى على سبيل الهزار ,,
الناس ممكن تستهين بالحاجات البسيطة دى لكنها فعلا لها تأثير نفسى سلبى كبير جداً
فى الوقت اللى انت محتاج فية للتوحد من اجل مرحلة التنمية خصوصا وان تلك النسبة لا يستهان بها وهى تعادل نسبة متبنى رأيك تقريباً ,,
لذلك يجب ان نتحلى بالحكمة فى التعامل
و بإذن الله يكون القادم أفضل لينا ولبلدنا
بالتوفيق