 رد: رجل وامرأه
للأسف مجتمعنا الشرقي
رغم ادعاؤه الدائم للتدين ووجود نسبة عالية من المسلمين فيه
إلا انه حتى الدين فيه قابل للتجزئة و المبادئ تُجزأ وكل شيء يجزأ
ولو كان الدين مجزأ مش كان بئى مناط التكليف العقل وليس النوع ولا كان بئى الجزاء و الحساب حسب العمل و ليس النوع ..
أنا هاخد النقط اللي حضرتك سردتها وأعلق عليها واحدة واحدة ::
1- التحرش ::
إما أن يكون لفظي أو فعلي
وعذرا إلصاق الموضوع بالبنت ولبسها فقط وكأنما الغلط في جهة واحدة
نوع من اللاعقلانية واللادينية أيضا
مش هقول كل البنات ممتااااازين وكل الأولاد بااااااااد
بس جزئية مهمة أوووووووي
انه للأسف فكرة التحرش خاصة اللفظي بقيت عادة مجتمعية !!~
ودي حقيقة ومش ينفع نهرب منها
بيكون الولد طفل مش كمل 16 سنة وبيعاكس و بيقول ألفاظ زفت !!~
ومش حد يقولي المشكلة في لبس البنت بس
لأنه فيه منقبات فعلا ملتزمات بالنقاب وبردوا بيتعرضوا لدا
وفيه نساء كبيرات في السن بيتعرضوا لدا وأكتر من دا كمان
واللي مش واخد باله انه الموضوع مش عاد مشكلة لبس وانما أنه أصبح اعتياد مجتمعي
يراجع قضايا السجون المتعلقة بالتحرشات و الإغتصابات وهيلاقي انها بتحصل كمان مع الأطفال و العجائز !!~
وبالرغم من كدا نفضل مجتمع ظالم أحمق حتى لما بتكون البنت ضحية مشكلة من دي
بيعتبروا دا عار عليها وانها المفروض تخرس وحتى مش تتوجع ولا تشتكي انه حصل لها كدا
مع انه حتى لو لبسها مش محترم دا مش مبرر لأنه عذرا لو البنت دي أيا كان لبسها وتصرفاتها
تخص (( رجل )) او (( شبه رجل )) من اللي يبرر و يتكلم في أعراض الناس مش كان هيشوف انه اللي حصلها تستحقه ..
2 - الإجبار على الزواج كأنما احنا لسه في الجاهلية
دا حتى قاعدة شرعية انه الزواج يبطل لو البنت مجبرة عليه
وللأسف مش أقدر أحكم هنا من اللي مُذنِب
هل العريس و الأهل اللي تعاملوا مع الموضوع انه تجارة
ولا البنت اللي تساهلت في حقها باختيار حياتها المستقبلية ..
3- القوامة ::
لو الرجولة شنب و تسلط ورجل صوته عالي و عنده القدرة انه يضرب
فعذرا حتى الصرصور له شنبات
لكن الرجولة مسؤولية والقوامة جُعِلَت عشان المسؤولية دي
أنا بنت وأي حواء في الدنيا بتحب تحس انه في شخص مسؤول عنها ويهتم لأمرها وانه سند لها بعد الله
القوامة انه الرجل يعطي الحق دا لحواء سواء ام أخت زوجة أيا كانت صلتها فيه
القوامة ارتبطت بالنفقة
مش واحد قاعد في البيت و الحمد لله بقوا ياكترهم و زوجته اللي بتشتغل و تصرف عليه
ويقول (( الرجال قوامون على النساء )) و ياخد منها تعبها ..
4- بالنسبة لآخر نقطة
أنا هجيب الحديث اللي الكل بياخد جزء منه دا كامل
"ما رأيت من ناقصات عقل و دين أذهب للب الرجل العاقل منكن"
دا كدا الحديث كامل لو فُهِم فهو مدح مش ذم
بس ازاي ناخد حاجة كاملة لازم طبعا ناخد من الدين بس الأجزاء اللي عايزينها
زي القوامة كدا بالضبط
معنى لب رجل عاقل :: أكثر إذهاباً لعقل الرجل الحازم ذو الرأي
فلو هنفهم الحديث صح هو استعجاب من انه المرأة عندها القدرة دي على التأثير في الرجل ..
في النهاية مش هلوم على مجتمعاتنا الشرقية الموقرة اللي حتى بتجزأ الدين لصالح شخصي
انما على حواء اللي إلى اليوم مش عندها مانع تفضل جوا القوقعة دي ومش شايفة أصلا فين حقها
ولما تيجي تشوفه تفهم انه لبس و خروج بس !!~
ماضاع حق وراءه مطالب
ولو جُلِب الــــــ { حق } و لو غصبا كما أُخِذ غصبا لأتى ...
عذرا للإطالة ..
تسلم أ/سيد ..
دمت بحفظ الرحمن ..
|