الله يبارك فيك يا اخويا
عارف برغم اني فرحت بالترقيه
والحمد لله الواحد كان نشيط على قد ما يقدر
بس حسيت في اعضاء ممكن تفهمها انه اهو مشي ورجع عشان ميزعلش خد ترقيه
انا مش بقصد حد والله ابدا ولا اللي قال في الزوار لا والله كل الناس الللس جت على الزوار اعرفها ويعرفوا نشاطي وكانوا بيضحكوا
بس الناس اللي بعيده عني متعرفنيش انا مين من مثلا نشاطي الاشرافي من حيث متابعه القسم وشغل الارشيف واضافه مواضيع
ولو كان بيبقى عندنا وقت كنا بنرد بره القسم
عموما انا متشكر للجميع وبجد فرحت بكل الناس اللس راسلتني على الزوار او الخاص او الناس اللي كلمتها ميل كانت بجد حاجه تفرح
س / هندخل فى الموضوع على طول وعايز اعرف كان اية شعورك اول لما شوفت توبيك ( القسم المسيحى ) ؟
اول ما شوفت التوبيك كان في احساس متناقض
لاني كان مبلغني بيه كينج ليون اللي مسئلش بس حسابه معايا بعدين
حسيت ان فعلا ممكن يجلب اعضاء كتير
بس في نفس الوقت اضايقت جدا لاني كنت سامع ان الفكره اتعرضت قبل كده واترفضت وبعدين انتا بتتعامل مع عقول كتير مستحيل هتخلي الناس تمشي زي مانتا عاوز حتى لو حاولت وبالاقناع
وبالادله وبهدوء
س / مع دخول الاعضاء ووجود ردود ومعارضين للفكرة حسيت بئية وكنت حاسس ان الموضوع هيوصل لكدا ؟
هقولك على حاجه بصراحه اه كنت عارف بس هقولك حاجه تانيه
لو كل الاعضاء ركزت في بدايه الموضوع وقرت فعلا الاسلوب اللي كان كاتب بيه الاخ قلم الموضوع لو واحد بيقطع ارقاب
وكان قرأ الموضوع باقتناع كان دخل وقال اوك بدون اي اسباب للرفض
س / انتا صحيح طلبت ان التوبيك يتقفل ؟
انا رفضت انشاء القسم
ولما كلموني الاخ قلم والاخ محمد علاء على الخاص
في نفس اليوم طلبت منهم بالفعل التوبيك يتقفل
وكنت اتمنى كده كنت حاسس بجد ان المشاكل هتكمل
خاصه حسيت من ردود الاخ طارق انه مصمم على انشاء القسم
حتى لو الاستفتاء انتهى بلا وده كان هيعمل مشاكل
س / انتا حسيت قبل كدا انك بتتعامل كمسيحى من اعضاء المنتدى ؟
يعني ايه بتعامل كمسيحي
اه قصدك كغريب
لا عمري ما حسيت بكده بالعكس انا قريب من قلوب ناس كتير
وناس كتير بتتعامل معايا بحب لاني بحب الجميع وعمري ما بعرف اكره حد ممكن ييجي وقت عليا وازعل وحتى لو مش بروح واصالح
بس ربنا يعلم قد ايه بتعب من خصام اي حد
والحمد لله مفيش اي حد نختلف معاه في المنتدى رغم اللي حصل
س / لو كان اتعمل القسم المسيحى كان اية الفائدة من وجودة من وجهة نظرك ؟
طب انا هسألك سوال
مين تعرفه مسيحي في المنتدى غيري
ولو اي عضو في المنتدى يعرف حد مسيحي غيري يقول
ايه السر ممكن تلاقي عضو مسيحي يسجل في المنتدى ومنشفوش تاني
هل بيحس انه غريب ولا مش عارف يتأقلم مع الناس مش عارف
ولا عشان مش بيلاقي حد مسيحي فيخاف يبقى لوحخده مسيحي في المنتدى
هقولك القسم كان هيجيب اعضاء مسيحيين
طبعا انا بتكلم لو الكل كان متفاهم ومفيش اي مشكله خالص من انشاء القسم
الرساله اللي عاوزين يوصلوها الاخ طارق والاخ قلم هتوصل
وهو القضاء على العنصريه والتعامل مع الاخر بطباعه وليس حسب دينه الموضوع مش صغير
ولا مجرد انشاء قسم والسلام لا انتا بتوصل رساله من خلال دينك الاسلامي بتقولهم قد ايه انتا متسامح وقد ايه مفيش اي عنصريه ولا اي مشكله في التعامل مع الدين الاخر قدام الجميع
صدقني لو الموضوع كان كمل كنت هتلاقي كل واحد اتعلم يعلم غيره
وهبقى بدينك مختلف واحسن من ناس كتير
س / الناس كانت خايفة من عمل مناظرات بين الاديان يعنى انتا تنزل توبيك حد تانى ينزل رد وندخل فى حاجا احنا فى غنى عنها اية رائيك فى الكلام دا ؟
طب انا هقولك على حاجه
انتا ممكن تقبل موضوع الناظره غيرك يعتبره انك بتهاجم دينه او بتشكك في عقيدته او غيره حاجات كتير
يعني مثلا لما يبقى عندنا حريه في النقاش وقبول راي الطرف الاخر
والتفكير في كلامه ان كان محق او على خطأ
لكن الغريب عندنا ان كل واحد بيقتنع بوحهة نظره حتى لو غلط
ابقى ادخل واعمل مناظرات
س / حسيت ان اكتر رد ضايقك كان رد ( الحب الصامت ) ؟ لية اضايقت من ردة ؟
برغم انه رده اعتبره ان استفسار
وبرغم ام كان في ردود هجوميه اصعب من رده
بس يمكن قلتها للاخ طارق
ده راجل صاحب المنتدى يعني في الاول والاخير تهمه مصلحة المنتدى
طب ما ممكنت يدخل ويعارض الفكره بس باسلوب غير كده
مش ادخل اقول الصليب والثالوث والكلام اللي يولع الموضوع
احنا محتاجين حد يهدي الموضوع
وبجد لما تبقى حاجه زي كده من صاحب المنتدى كان شئ محزن بجد
حسيت انه بيقولنا المنتدى للمسلمين فقط او ملكمش مكان وسطينا
وهو اللي خلاني اكتب قرار الانسحاب
بس بجد بعد ما كلمني عليه امبارح الاخ طارق لاني معرفوش ولا اتعاملت معاه قلت له طب هات رقمه عشان اغلس عليه
وبجد يمكن غيرت انطباعي عنه بعد كلام مستر طارق
س / فى بعض الاعضاء مكنتش تعرف انك مسيحى وكانو بيكلمو على الاساس دا ؟ تحب تقولهم اية ؟
ههههههههههههه اقولهم ايه يعني
معلهش يا جماعه طلعت مسيحي :biggrin:
عارف يا مورشو انا حياتي كلها مع مسلمين
هتستغرب لو قلت لك كانت في نظرات من ناس نسيحيين بتشتمني على اني بصاحب مسلمين نفس الكلام كان عند اصحابي المسلمين
الموضوع محتاج وعي وانك تمشي على دينك صح وتتقبل الدين الاخر
وتتعامل مع شخص بيحرمك مش واحد بيختلف معاك في دينك يبقى لا متعاملش معاه لا طبعا الموضوع موجود عندنا في مصر فعلا صعب بين ناس كتير مسلمين او مسيحيين
واللي كان بيضايقني هنا في المنتدى اني مختلف في الدين وان في ناس متعرفش هو ان ممكن يتبعت ليا موضوع مثلا اسلامي ومردش
ببقى محرج جدا وبخاف العضو اللي ارسل الموضوع يزعل
وفي نفس الوقت لو بعتله سبب عدم دخولي هيدخل ويعزر وهو مغلطش عشان يعتزر الموضوع حاصل بدون قصد فانا كنت بضايق اني مش هدخل ارد على الموضوع وبخاف على زعل العضو برغم اني الفتره الاخيره كسول في الرد على اللينكات بس غصب عني بجد ضيق الوقت
س / انتا قررت انك تسيب المنتدى لية ؟
زي ما وضحت لك فوق
بعد رد الحب الصامت
حسيت انه بيقولي احنا مش عاوزين حد معانا
خاصه انه صاحب المنتدى
والمفروض انه يكون يدير الموضوع بطريقه ميخسرش حد من الجانبين ويعبر عن رايه من غير ما الموضوع يولع
بس بجد بعد ما هديت قلت خلاص واقتنعت بكلام الاخ طارق
وكفايه الناس كلها اللي دخلت واكنت متأثره باللي حصل
حسيت بجد ان الدنيا لسه بخير واني بجد اتعلقت بالمكان ده
وحبيت كل الاعضاء اللي فيه
س / فى حملة موجودة حاليا عن التعايش عن طريق ( قلم بلا حبر ) اية رائيك فى الحملة دى ؟
بيعجبني جدا تفكير الاخ قلم بلا حبر وقد ايه هو انسان حابب التغيير للافضل
وبجد بقلمه ممكن يقنع اي حد
الحمله رائعه اكيد وربنا يوفق الجميع ويهدب الامور
ونشوف كل الناس مشتركه في الحمله لان حاجه زي كده مينفهش حد يرفض انه يشارك فيها
س / تفتكر هتنجح والاعضاء هتفهم ان الدين دى حاجا بين العبد وربة ؟
بالاقناع وبالهدوء
والموضوع محتاج وقت وصبر وبجد نفسي ننفذ كده في كل مكان في مصر
في ناس بتقبل التغيير
شعبنا طيب حساس وده بان لما قلت اني ماشي
كل الاعضاء اللي كانت معصبه في الموضوع دخلت واتعذرات
وكان كلامهم حاجه تفرح دي الروح اللي اتعودت عليها هناد
والحب اللي حسيته من اول ما دخلت
ولا حسيت باي فرق والحمد لله ان موضوع القسم عدى على خير من غير اي خساير ولا حد يتوقف ولا عضو يزعل من التاني
س / لسة حاسس ان المسيحين بيتعاملو كا اقلية فى مصر ؟
هو انا قلت انهم بتعاملوا كاقليه قبل كده
انا قلت الاختلاف بين المسحيين والحكومه وليس المسيحيين والمسلمون
فقط لتحقيق بعض المطالب
اتمنى ان شاء الله انها تتحق
وعلى فكره انا واثق ان مصر هتتغير للاحسن مع الوقت ومتفائل برغم تشائم الكثير
ربنا يوفق الجميع وكلنا ابناء مصر عشنا على ارضها شعب واحد
كان المسيحي بيحمي المسلم في الثوره وهو بيصلي
زي ما المسلم برضو سند وضهر للمسيحي
مش كلام يا مورشو بجد
بس ده اللي بحسه وبعيشه