عرض مشاركة واحدة
قديم منذ /08-07-2012, 10:14 PM   #1

دمعه حائره

 

 رقم العضوية : 55979
 تاريخ التسجيل : Oct 2010
 الجنس : ~ أنثى
 المكان : مصـــــــــر
 المشاركات : 86,083
 الحكمة المفضلة : وما من كاتب إلا سيبلى ...ويبقي الدهر ما كتبت يداه فلا تكتب بكفك غير شيء...يسرك في القيامة أن تراه
 النقاط : دمعه حائره has a reputation beyond reputeدمعه حائره has a reputation beyond reputeدمعه حائره has a reputation beyond reputeدمعه حائره has a reputation beyond reputeدمعه حائره has a reputation beyond reputeدمعه حائره has a reputation beyond reputeدمعه حائره has a reputation beyond reputeدمعه حائره has a reputation beyond reputeدمعه حائره has a reputation beyond reputeدمعه حائره has a reputation beyond reputeدمعه حائره has a reputation beyond repute
 درجة التقييم : 15238219
 قوة التقييم : 7620

دمعه حائره غير متواجد حالياً

 

 

 

 

 

MY MmS

أوسمة العضو

الكاتب المميز مسابقه القلم الماسي تكريم المنتدي في العيد 16 137 73 مسابقه القلم المميز مسابقة فضفضة 2 مسابقة الغرام المستحيل 1 مبدع الابداعات العاميه 

جولة فى مذكرات مبدع ومعانا..Words Whisper




أهلا وسهلا بكل رواد قسم الابداعات المحترمين

ومن جديد نتجول معا فى مذكرات المبدعين والمبدعات

وجولتنا النهارده مع انثى استثنائيه وقلم مبدع


Words Whisper
مشرفة قسم بقلم الأعضاء









أهلا وسهلا بيكى نورتى البرنامج وكل عام وانتى بخير

هلا فيكِ و في الكل نوركم

وانتِ والجميع بخيرات ..

فى البدايه تحبى تشربى ايه ولا اقولك
نجيب كنافه او قطايف

هو حيث اننا صايمين نجهر للفطار

خلينا ف القطايف بحبها
بس كده اتفضلى ياغاليه احلى قطايف فى الدنيا




اول جوله هاتكون فى بطاقتك الشخصيه
عرفينا بنفسك بس ياريت مش اجابات غامضه
زى بروفايلك

بروفايلي غامض :biggrin:

اسمك

أسماء ..

محل اقامتك

المنصورة ..

بلدك

مصر ..

الوظيفه

لسه طالبة في طب ..

الحاله الاجتماعيه

امممممم عزباء ..

عندك كام اخ واخت

أخ واحد و 5 اخوات ..

اتعرفتى على المنتدى ازاى

كتبت في السيرش منتدى بنات ظهر لي

وكنت فاكرة الأول انه بنات بس ..



هاندخل على بروفايلك وناخد جوله فيه
جميل اوى التنسيق عجبنى على فكره

تسلمي ياحبيبتي :445:




تاريخ التسجيل2010-09-27
وبعدها اثبتى تميزك فى قلم الاعضاءلكن غيبتى فتره بعدها
ممكن نعرف ليه وياترى بعد رجوعك حسيتى بفرق فى المنتدى؟

غبت لأنه كنت إدارية في منتدى تاني

وللأمانة فكان لازم أكون اد المسؤولية دي

فكان صعب أشتت نفسي في أكتر من منتدى و كمان في دراسة

ويمكن اللي جرب شغل الادارة عارف اد ايه بياخد جهد
فكان صعب وقتها أكون في مكانين

لكن كنت ناوية بس المنتدى التاني يشد حيله كدا وأسيب الادارة

وفعلا دا اللي عملته و رجعت لأنه حقيقي صعب كتير أسيب المنتدى هنا

لأنه بالنسبة لي هو أول تعامل مع النت فله معزة خاصة
وفيه كتير لهم عندي معزة خاصة وكنت بدخل زائر
وأول ماتركب الستايل اللي قبل دا كان عاجبني ..

أها في فرق بس أنا شايفة انه للأفضل

لأن بئا في مساحة أكبر للأعضاء في إبداء وجهة النظر
وكدا ومن ضمن دا فكرة الإداري المنتخب كمثال ..




كان اسمك الاول DR.SEMSEM
ليه غيرتيه وليه اخترتى النيم الجديد

بصي ياستي د.سمسم دا سبب اختياري له أنه مش كنت عارفة أختار اسم

يعني زي ماقلت قبل كدا أول تعامل مع النت كان الفورم هنا

فوأنا بكتب اليوسر كتبت الاسم دا لاني بحبه
وهو له صلة باسمي وزي ماقلت
كنت فاكرة انه منتدى بنات بس

بعد كدا بئا اللي بيرد يااما يكتب نفس اليوسر يااما يقول سمسم

وانا كنت بضايق لما ألقى ولد داخل كاتب سمسم دي بصراحة

حتى بقيت بوقع في آخر كتاباتي أسماء
عشان اللي يكتب يكتب أسماء مش سمسم

أنا بحب اسمي وبحب اللي يناديني يقول أسماء
ومش بحب الألقاب نهائيا

لكن بيضايقني انه مثلا حد يناديني سمسم قمر غالية
والكلام دا وكنت علقت على دا أكتر من مرة أحيانا خاص
وأحيان في ردود

بعد مافضلت في النت فترة عرفت فيه أكتر
وعرفت انه أقدر أغير اسمي
وأتفادى انه حد يكتب سمسم حيث انه دا اليوسر

ففكرت وخطر ببالي اسمي الحالي Words Whisper
وهو قريب ليا جداا

لأنه أنا بحب الكتابة جدا و الحرف عندي له قيمته جدا
إضافة لأني غالبا بعبر عن اللي جوايا بالكتابة مش بالكلام ..



الحكمه المفضله
Cann't be another one ,, except ME
فيها شويه ثقه كده حتى اللقب كمان
انثى استثنايه

ممكن نعرف بتستمديها منين الثقه

بالنسبة للحكمة هي مش بس ثقة

هي كمان انه أنا لاأرتدي عباءة غيري أنا هو أنا
ومش ببئا حاجة تانية عشان خاطر حد ..

الحمد لله انا ثقتي مش بتوصل للغرور

وكل حد فينا مميز مش فينا حد مش كدا

بس فيه حد بيُقدر نفسه وحد لا ..

مش بشوف نفسي أحسن من حد بس
كمان مش بشوف حد أحسن مني ..

وبصراحة أكتر حاجتين بيعطوني ثقتي بنفسي ::

انه أنا هو أنا لاأتصنع ولا أتلون لأجل أحد
ومؤمنة بنفسي جداااااااااا وبحترمها جداااااا

و الحاجة التانية انه الحمد لله ودا فضل من ربنا
لما بتعامل مع أي حد بترك بصمة جواه حتى لو من بعيد

بمعنى آخر الحمد لله الله معطيني القبول و في ذات الوقت
بعرف أفرض احترامي على اللي قدامي باحترامي لنفسي

وحقيقي دا فضل من ربنا مش مني بس طبيعي
لما يكون دا موجود أكون فخورة جدا بنفسي
ومعتزة بيها وعندي الثقة دي

وبالنسبة للقب مش أنا بس اللي أطلقته على نفسي
لكن الحمد لله ومن الواقع صُدِّق عليه ..




قائمة الاصدقاء34تعرفيهم كلهم
وهل بترفضى طلبات صداقه؟

هو مش اعرفهم كلهم وغالب تعاملاتي ع الفورم بس

أي طلب صداقة من بنت بقبله ومؤخرا في بنات
بقيت أنا اللي بضيفهم

لأنه أنا قافلة الخاص على الأصدقاء بس
فعشان أقدر أراسلهم ويراسلوني ..


وعذرا أيوة برفض طلبات صداقة من أي شباب ليس لشيء

لأنه في ناس كانت أرسلت طلبات إضافة
ومتأكدة انه محترمين جدا جدا جدا وبقدرهم جدا
فعذرا لهم انه مش قبلت

بس عشان مش أفتح مجال لكلام
اشمعنا فلان قبلته وفلان رفضته

والاتنين اللي عندي رجال أ/محمد محروس
وحضرته رجل كبير في عمر جدي ربنا يبارك في عمره
ومن الناس اللي بقدرهم جداااااا ويَ رب يكون تغيبه خير

و أ/طبيب الهوى وحضرته بالنسبة ليا والدي
و حقيقي بقدره وبحترمه كتير كتير كتير الله يبارك بعمره
يَ رب ويسعده بأولاده ..



الاوسمه ماشاء الله 7وكلهم جوايز
عن مسابقات قيمه وصعبه
اى وسام بتعتزى بيه اكتر وتعبتى على اخدتيه

والله كلهم أكيد بعتز بيهم

بس اعتراف صغير يعني ولا واحد فيهم
كنت عاملة حساب اني هاخده الا بتاع أجمل توقيع و الطفولة ..

بمعنى تاني ::

** نجم الشهر في الأقلام أنا كنت بدخل الأقلام عادي
لأنه بحب القسم دا مش عشان الوسام ولاحاجة

واتبسطت كتييييييير لما اخدته لانه كان الأول
وكان حاجة مش توقعتها ولاكنت أعرف انه هيتم اختيار نجم الشهر ولا تمييز ..

** وسام العطاء بردوا اتفاجئت بيه ..

** ريشة من قلم أنا كنت شفت المسابقة
وكانت وقت اختبارات
فمش كنت ناوية أشارك فيها أصلا

وبعدين قيثارة الصمت الله يردها بالخير
لقيتها أرسلت لي انه أشارك معاها
واعمل ديزاين على الخاطرة فعملت ^^

** النشاط بردوا مش كنت متوقعة أخده ..

اسماء ليه قفلت رسايل الزوار؟
وهل ممكن تقفلى الخاصه كمان؟

هو أنا الخاص فعلا متاح للأصدقاء بس

وبالنسبة للزوار أحيانا بفتحه وأحيانا برجع أقفله
تقدري تقولي الموضوع له علاقة بالمود نوعا ما :biggrin:




جوله فى مواضيعك
اكيد كان صعب الاختيار
لانى من اكتر المتابعين لكل جديد ليكى
وكلها مواضيع قيمه ورائعه

ربنا يكرمك ياحبيبتي :445:

بتفضلى اى نوع من الكتابه
المقالات ولا الاشعار

أنا مش بكتب شعر وكتاباتي نثرية أو خاطرية وغالبها نثر

لكن بردوا نثر أدبي مش مقالي بحت وقليل لما
بستخدم الأسلوب المقالي

وأي موضوع أدبي راقي قيم بفضله
وبحب أقرؤه سواء نثر أو شعر أو خاطرة ..

مين من اكتر كاتب بتتابعى مقالاته ودايما تقرى لليه ؟؟

مش بقرأ لأشخاص معينين

زي ماقلت أي حاجة قيمة بحب أقرأها

بس بالنسبة للفورم فيه أقلام لايختلف عليها اثنان ..


ياترى بدأتى تكتبى من امته؟

من زماااااااااااااااان

من وانا في ابتدائي وبدأت بقصة ..






اول موضوع
هابدأ من آخر موضوع نزل ليكى فى قلم الاعضاء
حملة التعايش - نقطة نظام
طبعا الموضوع من اكتر المواضيع اللى مفروض
كل اعضاء المنتدى يقروه
فكر واعى وتوضيح قيم جدا منك قدرتى تعبرى
عن فكره التعايش
بمنتهى الدقه والحياديه
ايه مقصدك من العنوان وهل ليه علاقه بالاحداث الاخيره
اللى حصلت فى القسم
وهل ازعجك النقاش الى حصل بخصوص القسم المسيحى

أولا ميرسي على رأيك ^^

العنوان لأنه لاحظت انه في كتير في النقاش جزؤوا الموضوع

يعني فيه اللي مثلا أخد بس جزئيات النهي
عن أهل الكتاب وتمسك بالآيات دي

وفي اللي كان بالنسبة له يشوف بس الآية التانية اللي بتقول الإحسان

رغم انه مش فيه حاجة اسمها نجزأ الدين والدين يؤخَذ ككل

ومش في تعارض بين النصوص زي ماوضحت في الموضوع

فكانت الفكرة انه عايزة ننظم رأينا في الموضوع
بعيدا عن التعصب أو رفض الآخر
و الموضوع مش منعزل عن ديننا
عشان نجزؤه بالشكل دا

وفعلا أكتر حاجة ضايقتني في الموضوع
تجزيء الدين بالشكل اللي حصل ..

أكيد له علاقة باللي حصل في الفترة الأخيرة
وموضوع القسم المسيحي

بصي أنا مش عايزة اللي قال لاأوافق يقول أوافق و لا العكس
بس انه الكل يقدر يحترم فِكْر التاني

لكن اللي حصل انه بقينا احنا نفسنا
مع انه ديننا واحد بنجزأ الدين بالتفصيل
ع اللي عايزين نثبته وبنلغي الجزء التاني

وناس دخلت تشكك في ناس وكان ناقص تبئا حالة حرب

دا غير الهجوم على دين آخر ودا أصلا غير مسموح به دينيا

زي ماديني له عندي مكانة محرم حد يقرب لها أي حد
بردوا دينه عنده كدا

ومش هطول بئا عشان قلت كل اللي عندي
في الموضوع دا
في الردود وموضوعي دا ..





الموضوع التانى
قلب بكر

ممكن اعرف ظروف كتابته
وهل هوا رساله ولا مجرد افكر عبرتى عنها
ياترى ايه اللى بيفسد براءة القلوب

ظروفه انه كنت حاسه قلبي واجعني :biggrin:

هو فكرة مش رسالة والمقصود مش فساد البراءة بس

وإنما ان قلب الطفل اللي جوانا دا فجأة يشيب

ودا مش شرط بس بسبب تجارب حب مش ناجحة
هو كمان ممكن يكون بسبب جروح من حد قريب

وكان في فكرة أساسية كمان اللي هي انه جرح الحب
بالذات بيُفقِد القلب الصفة دي

أيا كان أكيد لما شخص يكون أول مرة عارف مشاعر ما بيكون لها إحساس آخر

وأكيد الحب الأول بالذات له مشاعر مختلفة تماما
أي حب هيكون بعده هيكون مع قلب سبق
أن أحب مش عاد (( قلب بكر ))

ومن هنا في حاجة عايزة أقولها وهي اللي ربطت معايا بكورة القلب بالحب العشقي

الحب بحد ذاته مشاعر راقية مش حرام انما الحرام الأفعال اللي فيها معصية لله

الحب دا نعمة واللي مش بيقدر النعمة يعاقب بحرمانها

وللأسف في ناس مش بتقدر دا فممكن النهاردة
بتدعي حب حد وبكرة بتدعي حب شخص آخر وهكذا

ودا بحد ذاته عقاب من الله للي مش احترم نعمة الحب
لأنه مش عاد حاسس بالنعمة دي وقيمتها لدرجة
انه بئا مش فارق معاه اي حد

بئا الموضوع بالنسبة له حد راح وحد جه وخلاص
مش عاد فيه القلب اللي بيشعر

أتمنى أكون عارفة أوصل الفكرة ..




هانروح لقسم بعيد شويه
وتصميم ليكى فى السويتش ماكس
That's Me

المقدمه هايله والتصميم رائع
الإنسان بلا عزة و كرامة ،، هو بلاشيء و بلا إنسانية ..

كراماتنا ليست محلا للمفاوضة أو مسموحا بالمساس بها من أي شخص كان ..
جميل الواحد يعتز بكرمته وكبرياؤه
ممكن تفسريلى شويه المقدمه دى
وبردو التصميم ايه الهمك بالفكره دى



ميرسي على رأيك في الديزاين والمقدمة ياحبيبتي

كرامة الإنسان = إنسانيته

لو تخلى عنها تخلى عن إنسانيته

الفرق بينا وبين باقي خلق الله هو تكريم الله لنا ..

الإلهام بئا أصل بحب الكلمات اللي فيها عزة وشفت الصورة اللي مستخدماها

فألهمتني بالكلمات دي واشتغلت عليها فوتو
بعدين سويتش وللعلم الفوتو فيها أكتر

وحبيت انها تكون هادية كدا ..




هانرجع بالذكريات لموضوع قديم شويه
قسوة الأيام..

فعلا الايام كتير بتقسو علينا
لكن حسيت من الكلام انه ليه موقف حصل معاكى
فاكره الموضوع ده
ياترى ليه كتبتيه

أكيد فاكراه بس دا موضوع من أول يوم سجلت فيه من زماااااااان اوووي

كتبتُه عشان نفس اللي كنت كاتباه فيه ..





موضوع قديم ليكى فى قلم الاعضاء
انا وحبيبى

جميل ان يكون فى حوار بينك وبين قلمك
ياترى القلم ممكن يسجن صاحبه بين الاوراق
ويبعده عن الناس
وامته بتروحى تتكلمى مع قلمك
وهل بتلاقى راحه نفسيه بعد الحوار ده


لا هو القلم مش بيسجن صاحبه عن الناس

لكن ممكن يكون هو الأقرب في التعبير عنا

خصوصا لو مع شخص مش بيعبر كتير بالكلام

وأيوة برتاح نوعا ما لما أكتب لاني من النوع اللي مش بيشكي وكدا

يعني بحتفظ بوجعي لنفسي فالكتابة بالنسبة لي مُتنفس نوعا ما ..




جوله فى ردودك

هلى بتفرقى فى الرد بين شاب وبنت
بتحبى الرد الادبى اكتر ولا النقاشى
وهل ممكن تنقدى موضوع قريتيه ومعجبكيش
ولاتخرجى بدون تعليق افضل؟
لو دخل عضو يرد عليكى فى موضوع وانتقدك زيادة
هل تردى ولا تشتكيه ولاتتقبلى نقده

بحب ردودي تكون عن الموضوع نفسه مش شكر بس

سواء بئا شاب أو بنت بس قليل هتلاقي ردودي شكر فقط

ودا بيكون لما مثلا مش أكون في مود كويس
أو مش لاقية إضافة غير الشكر

وحيث انه بكتب رأي في اللي بقرؤه
فأكيد لو الكلام المكتوب أنا ضده بقول

أما بالنسبة للنقد الأدبي فأيوة بردوا بنتقد
بس بشكر الأول صاحبـ/ـة الموضوع

ومش بنتقد أي حد وخلاص لاااااااا

لما بوجه نقد أدبي بيكون فقط للأقلام
اللي تستحق انها تكون أفضل

بمعنى آخر في أقلام بتكون متميزة فعلا
بس عندها سقطات في حاجات بسيطة
لو عدلتها هتبئا أفضل

ودي الأقلام اللي بوجه لها نقد أو بلاش نقول نقد
لأنه مش نقد هي ملاحظات

إنما الأقلام اللي بتستخدم أسلوب أصلا ركيك
من باب انها بتعبر عن اللي عايزاه وخلاص
فأنا لاأوجه ملاحظات أدبية لها

لأنه النوع الأخير دا مجرد بيعبر لكنه مش قلم أدبي

فأي شخص وجهت له ملاحظة
الأكيد اني شايفة قلمه رااااااائع ويستاهل يبئا أفضل وأفضل

ومش عندي مانع انه شخص ينتقدني
مادام في حدود النقد مش التطاول

سواء هينتقد الفكرة أو الأسلوب الأدبي
بس يكون نقد بناء وبأدب والحمد لله
أنا قبل ماأطالب حد بدا بنفذه على نفسي ..








الرد ده

أكثر الكلام شرا

ماغُلِّف حلاوة وأريد به باطلاً

فجمع حوله على الباطل

وخاصة أولئك الذين يملكون كلمة مؤثرة

فيستخدمونها لأغراضهم

يمزجون فيها الباطل و السوء بالحرير يغلفونه !!~


راق هو قلم حضرتك

وهكذا هو دوماً ..

شاكرة حد السماء

هل بتجدى صعوبه فى التفرقه بين الصدق والخداع
مهما كان مغلف بحلو الكلام

أنا الحمد لله ودا فضل من ربنا عندي المقدرة أفرق

ومش من الناس اللي بتُؤخَذ بحلو الكلام

لكن مش الكل عنده القدرة دي

فحرام على اللي بيستغلوا مواهبهم لتضليل الناس ..





الرد ده
لاشيء يستحق بقاء الألم

فلاأحد يتعلم ببساطة ولنتخذ الألم درسا

دون أن نبكيه طويلا ..


قرأتُ مرة جملة راقتني كثيرا كثيرا ::

(( خليك جدع اوي بحيث لما نفسك تحتاجلك تقف جنبها ))

هي جملة صحيحة تماما فنحن وإن كنا بجوار أي محتاج لنا

ولم نستطِع مساعدة أنفسنا لن نتقدم للأمام ونحن أولى بمساعدتنا ...




راقني كثيرا كثيرا حرفك

شاكرة لك

سلمت

ودمت بحفظ الرحمن ...




5 ستارز ..
بصراحه اول مره اشوف الجمله دى
بس عجبتنى فكره الجدعنه مع النفس
بتقفى جمب نفسك امته سمسم
وبتنصحيها بأيه دايما


بقف جنبها في أي وقت تحتاجني

وبنصح أسماء انه الدنيا مش بتقف فتحاول تكمل

وربنا ييسرها ..





الرد ده
لاشيء يبرر التنازل عن الكرامة

وليس التمسك بالكرامة هدم بيوت

فالخطأ يكون من البداية بالسماح لشخص بانتقاص الكرامة ..


العنف في بيوتنا العربية

أعتقد أنه صار السمة الغالبة

فأصبح حتى مانراه في الشوارع عنف

لأن من مارسوا هذا العنف تربوا فيه ...



راقٍ هو طرحكِ كما دوما اعتدناه

وصدقا كنتُ اشتقتُ لقلمك بالقسم

شاكرة حد السماء ..

سلمتِ

ودمتِ بحفظ الرحمن ...



- 5 ستارز ..

افهم من كده انك ضد تضحيه الام وتحملها
الاهانه عشان خاطر ولادها وتحافظ على وجودهم
وسط اب وام؟


بصي ياحبيبتي

البيت اللي بيوصل بيه الحال لإهانة كرامة والعنف دا

فالمشكلة فيه مش بتبدأ بس حديثا ولا بعد وجود الأبناء

لاااااا غالبا من قبل كدا بكتير وفي حاجة اسمها فترة خطوبة كمان

المفروض بداية الحياة الزوجية وفترة الخطوبة
دول بيترسم فيهم أساسيات التعامل

المشكلة بئا انه في كتييييييير بيتغاضوا من البداية عن كرامتهم تحت مسميات كتير

أولها الحب فممكن تسمح له يتطاول عليها عشان بتحبه وهكذا وهي بكدا بتلغي احترامه لها

ولما اتنين يُفقَد بينهم الاحترام يبئا مش عاد بينهم حاجة أصلا وحتى الحب اللي عشانه
تم التنازل عن الكرامة واحترام النفس بيضيع

فالمشكلة من البداية ..






آخر جوله فى اهتمامتك داخل المنتدى
مين من الاعضاء قريبين ليكى؟

الكل اخواتي وربنا يسعد الجميع ..

مين بتحرصى على متابعة
مواضيعه؟

أي قلم محترم راقي ..

ايه اكتر قسم بتحبى تشاركى فيه؟

الإبداعات و الأقلام والمكشوفة وبردوا السويتش و الفوتو ..

ياترى ليه ترددتى قبل قبولك الاشراف على قلم الاعضاء؟

لأنه سبق جربت الشغل الإداري و الإشرافي ولم يَرُق لي مطلقا

دا غير انه ساعات بتحصل مشاكل وممكن فيه ناس
بتاخد حاجات بزعل

وللأسف في ناس بتقلب معاها لنوع من الغيرة

واحنا مشاكل الحياة كفاية مش داخلين هنا لمشاكل تانية

بس تناقشت مع أ/سيد ..



كان ليكى اقتراحات كتيره لتطوير المنتدى
اول مارجعتى هل اتنفذ منها حاجه؟
وهل لسه عندك افكار تانيه؟

أه أنا شايفة ان منها حاجات اتنفذت ومش
بس الحاجات اللي أنا كنت حابة تحصل

وكمان حاجات غيري كانوا عايزينها والأفكار مش بتخلص ..



ايه رائيك فى قسم الابداعات؟
ايه هيا عيوبه؟
هل عندك افكار لتطويره؟

قسم راقي ومميز فعلا

وعيوبه هي حاجة عامة في الفورم كله

المجاملة أحيانا اللي بتوصل لحد النفاق

وأكتر حاجة بتضايقني انه يكون في قلم

من النوع اللي أنا قلت انه بيعبر بس لكن ليس قلم أدبي

ويكون في كمية مجاملات وانه الأسلوب رائع وقلم أدبي مميز ووووو

فاللي بيحصل انه القلم دا مش بيرتقي بنفسه
بالعكس ممكن يبئا أسوأ ..

بالنسبة لأفكار فحقيقي ربنا يكرمك ويوفقك
انتِ ومشرفي القسم اللي بيساعدوا

قايمين بالواجب ومحافظين على مستوى عالي للقسم ..


ممكن توجهى كلمه للاعضاء الجدد
وكلمة اخرى لمشرفين الابداعات

الأعضاء الجدد ::

أثبتوا وجودكم واتركوا بصمة خير ..

مشرفي القسم ::

استمروا في تشجيع الأقلام الراقية ووجهوا الأقلام
اللي محتاجة توجيه ..

ايه رائيك فى البرنامج وليه قبلتى الدعوة؟

أنا بحب البروجرام دا كتير وكنت بحب أقرأ حلقاته

وقبلت الدعوة لأنه بروجرام راقي وفكرته راقية
والمُستضيفة إنسانة راقية

لها عندي الكثييييير من المعزة ..

يامنون انتِ مش يترفض لك طلب :003:
وربنا يعلم انتى غاليه عندى قد ايه
وميرسى انك قبلتى الدعوة

ممكن تكتبى لينا سطرين او اكتر نثراو شعر

هكتب حاجة كرسالة لنفسي قبل الكل ::

كلنا يوما ماضون

ولن يبقى منا سوى ذكرى

فالمهم أن نترك بصمة تُذكر لنا بخير ..

كلنا سنحتاج يوما الدعاء ..


بشكرك على قبول الدعوة
وبتمنالك كل التوفيق والسعادة


أنا اللي شاكرة تواجدي معاكِ ومع رواد الإبداعات الراقين

وربنا يوفقك دوم حبيبتي ويوفق الجميع ..



وبكده تنتهى جولتنا فى مذكرات مبدعتنا اسماء
بشكرالجميع على التواجد
تقديرى واحترامى
مع امنياتى بالتوفيق الدائم








  رد مع اقتباس