[قلم بلا حبر]

اقتباس المشاركة الأصلية كتبت بواسطة أحمد الخزرجى

وهو ده نفس الكلام لكل واحد اخوانى

انتم ليه مبتتغيروش

نفس الاساليب ونفس الممارسات

بنديكوا الثقه لفتره وبردوا مبتكونوش اهل ليها ,, طل ليه ؟؟؟

ايه اللى فى دماغكوا ,, هل بتحلموا تحكموا العالم مثلا ؟؟

طيب هل لو ده حصل انتم مفكرين ان العالم مش حيكون فى معارضه ليكم ؟؟؟

ده النبى صلى الله عليه وسلم كان ليه معارضه ,,, انتم ليه بتستهينوا من قدرات الناس ؟؟؟

يعنى انت مثلا كل ردك اختصرته فى (( ان الله لا يغير ما بقوم حتى يغيروا ما بانفسهم )) ,, ومين قالك اننا مبنعملشى ده ,,, هل عندك الحاسه السادسه مثلا ؟؟؟

لا بجد ,, محتاجين توضيحات لحاجات كتير ,, انتم ليه مصعبينها قوى كده ,, هو العمل السرى على مدار السنوات اللى فاتت دى كلها عملت ليكم عقد نفسيه مثلا ؟؟؟

ايه المانع من انكم يكون ليكم برنامج وغيركم كمان يكون ليه برنامج حتى لو مخالفكم 100% ,, فالحكم للناس ,, انما ازاى تكونوا خصم وحكم واى معارض ليكم يا اما فاسق يا اما عميل او محتاج يغير من نفسه ؟؟؟

انا لو قعدت اكتب فى استفسارات مش حخلص ,, بس الاستفسار الاهم بصرف النظر عن مبدأ الشورى عندكم ,, انتم فعلا نسيتم ان قوتكم فى الشارع بانت قوى فى المرحله الاولى من الانتخابات ,, يعنى بعد السكر والزيت وكل اللى فى وسعكم عملتوه فى الاخر 5 مليون صوت ,,,

انتم فاكرين احمد شفيق جاب كام صوت ؟؟؟؟؟


ليه مش عايزين تعيشوا الواقع ؟؟؟؟

قلنا ربنا حيهديكوا وتكون نتيجة الانتخابات فوقتكم لحجمكم الحقيقى ,,. بس برضه رجعتوا تلعبوا نفس اللعبه ,, يعنى ايام الانتخابات مكناش بنسمع غير نعم وحاضر من الاخوان لانهم كانوا عارفين شفيق لو كسب حيعمل ايه ,, ومع ذلك الثوره اداتكم 8 مليون صوت ,,,, ليه بتقاوموا بالطريقه الملتويه دى ؟؟؟؟

ليه مبتحبوش تشتغلوا سياسه نضيفه من غير سياسة بير السلم ؟؟؟

فى جمعة الحساب رحتوا واتخانقتوا مع التيار المدنى ,, واللى عيطتم منه فى موقعة الجمل عملتوه بايديكم ,, طب ليه ؟؟؟

هل ده جزاء الناس اللى قالت نديهم فرصه مثلا ؟؟؟

هل ده التغيير الاسلامى اللى تقصدوه ,, بالرغم من ان المفروض فى بينا وبينكم عهد انتم انقلبتم عليه ,, والرسول صلى الله عليه وسلم عمره ما خان عهد ,, والاسلام امنا على العهد مع الزمى فما بالك بالعهد مع مسلم ؟؟؟؟


ليه مش عايزين تفهموا ان مصر اوسع منكم بكتير قوى ,, وان كل المحاولات للهيمنه عليها حتفشل ,, وللاسف اى مغامره غبيه زى القرارات اللى ااتراجع فيها مرسى ممكن تولع البلد ,, هل عندكم استعدادا تولعوا فى البلد علشان بعض وصايا قالها البنا فى التلاتينات ؟؟؟؟

البنا مش نبى معصوم ولا امام لا يخطئ ,,, والدنيا اتغيرت ,, ولو هو موجود كان ممكن يقولكم تانى (( لاهم اخوان ولا هم مسلمون )) زى ما قالها لكم زمان ,,, ليه مش عايزين تحسوا بالعصر وبالزمن وبتغيره ؟؟؟؟


ليه مفكرين ان فى سبيل الله التأمر يبقى حلال ,, مع ان فى طريق اقرب الى الله ,, اننا نشتغل بضمير ونكون متقدمين جدا ساعتها الناس حتفهم يعنى ايه اسلام عملا لا قولا ,,, ؟؟؟

ليه بتلعبوا بالتنظيم الدولى على انه ورقه ممكن تطضغطوا بيها على الدول ,,, وتورطوا مصر معاكم فى دول بتحكمها القبليه ,, صحح الاسلام مبيعترفشى بالقبليه ,, بس زى ما عندنا رفضنا التغيير من الخارج سيبوهم برده يغيروا دولهم من الداخل ,, وبلاش تصدروا ليهم افكاركم ؟؟؟

ليه حاسين ان النهضه بالاتساع الافقى ,, مع انكم لو حتقروا تاريخ حتعرفوا ان محمد على قبل ما يتوسع افقى قدر يوقف مصر على رجلها بالعلم وبالبعثات اللى بعتها بره تدرس ونقلت ليه علوم الغرب ,,, انتم اول ما شطحتوا نطحتوا ,,

ليه ميكونشى عندكم فقه الاولويات ,, مش بقول نحجم دور مصر لان مصر كبيره ,, بس على الاقل نقوم بالدورين على اكمل وجه ,, اللى شايفه ان الاجنده المصريه متأخره قوى ؟؟؟


اخر سؤال بقى


هو انت ليه مردتشى ولا على سؤال من اللى فى الموضوع وسيبك بقى من حجج الاخوان الباطله اللى بيستدلوا بأيات من القران فى غير مواضعها زى (( لا تسألوا عن اشياء ان تبد لكم تسؤكم )) او زى ما حضرتك قلت كده (( ان الله لا يغير ما بقوم حتى يغيروا ما بانفسهم ))

احرجنى وعرفنى غلطى وبعد كده قولى غير نفسك ,,

انما لو معندكشى القدره على الرد او مش قادر ترد او معندكشى الفهم الكافى انك ترد ,,

يبقى انا اللى اقولك روح غير نفسك وشوف انت ليه كده


بالتوفيق