[ويبقى الأثر]

نفسى أرسم بس مش بعرف ؛
فـ قررت أعمل الى نفسى فيه بس بالإمكانيات المتاحة ..
يعنى اذا كنت مقدرتش أنقل الصورة اللى فخيالى بالفرشاة والألوان
فـ يمكن أقدر أرسمها بحبة حروف وشويه كلام ..!!
---
--
-
فى المنتصف وجه امرأة ملامحها باهتة
بعيون حزينة حتى نازل من عنيها دمعة
مترددة
يمكن تكون فاقدة الأمل
أو خايفة تنزل زى كلام كتير
عـ اللسان وبردوا مبتقولوش ..!
وعـ اليمين فى مرايا
باين فيها نص الصورة
أصل المرايا مرسومة مكسورة
ويمكن تكون الصورة أصلاً هى نص
ونص غاب عن العيون تحت السواد
هيفرق أيه لو كان حزين ! لو كان بيضحك !
هو وش اللى باين منه عين ودمعه..
تفتكر تحت السواد فى نص تانى متبسم سعيد !|
تفتكر!
أنا مفتكرش ..
اللى يرسم لوحه سودا ولون رمادى وازاز مفتفت
كان يقصد أيه غير أن ينقل صورة هى أصلاً ضلمة جوا منه..
بالتدريج مـ المنتصف اللون بيغمق أكتر وأكتر
هيروح لفين هيغطى لوحة ولا أكتر
انا خايفة يكتر..
ميسبش حته تكفى يرسم فيها وردة ولا أكتر
وردة بيضا وكام حمامة وكام فراشة ملونين
أنا لو مكانه كنت هرسم نور وبحر وعيون متبسمين
و ورود كتير وفرحة طايره فـ جناح فراشة ملونين
كنت هبدل الألوان
كنت هملى اللوحة بالفرحة كمان
هى عتمة ساكنة فينا غصب عنا
لكن بأدينا نرسم دنيا تانيه منها ليه !!
سكنانا هي طيب نسكن أحنا فيها ليه..!
والغريبة أنى بنقض رسام ولوحة فى الأساس مش موجودين !
ولو قولنا يمكن فى حد راسم زيها
يمكن أكون فى يوم شوفتها
طب هو بالأسود رسم على صفحة بيضا بدون سطور وأنا بنقضه
وانا بردو بالأسود كتبت على صفحة بيضا مسطرة !
هو البياض هو السواد هى هى العتمة
هو هو نفس الإكتئاب
حد فينا اختارلهم حروف لا تصلح للكتابة !
وحد فينا حطهم فى صورة لاتصلح للرسم !