[DR.SMA]

عارفه انتي أيه ؟
انتي حاجه حلوه جداً
بين ضلوعي تملّي ساكنه
انتي طيف بيمر دايماً
ف خيالي
بعشق منك الكلام
وبحبك برضه وانتي ساكته
المهم ف كل ده
أن حبك مزروع ف قلبي
زي شجره
جذورها ثابته
انتي حاجه حلوه جداً
ويّــا منّي
قربك جنبي
بيخليني تملّي فاكره
إن الحياه حلوه بيكي
لما ببص لعنيكي
ببقى عارفه
ان ربنا كرمني بيكي
عشان انا صديقه ليكي
كل حاجه ف الحياه بتيجي صدفه
وعشان تبقي عارفه
انتي أجمل صدفه فيهم
بصي لعنيا هتعرفي
اني مش بكدب عليكي
انتي فعلاً ..
حاجه حلوه جداً
من بره زي اللي جوه
قلبك أبيض أوووووووووي
تستاهلي الواد اللي هو
اللي يحافظ عليكي
ولعنيكي
أحب أقولك
اني بحبك
حب صادق
مش مزيف
قلبي تملي
بيفرح معاكي
زي فرحه طفل
بيروح يصيف ^^
قلبي حبك يا صديقتي
والظروف لو فرقتنا
هتفضلي ديماً حبيبتي
بس ملعون أبوكي يا ظروف
وأبعد انت كمان يا خوف
مافيش ابدا فرقه بينا
الحاجات اللي بينا
قويه جداً
مابتنتهيش
انتي حاجه حلوه جدا
وجمالها منه مافيش
♥

جتلي من واحده صحبتي بقالنا سوى 12 سنه وزياده
المفروض أحساسي يكون ايه !!
بحمد ربنا انه رزقني بناس بتحبني بالشكل ده
وناس مخلصه أوي كده
عارفين يعني ايه 12 سنه
يعني صداقه الطفوله والشباب وان شاء الله على طول
لما بحب اوصفها بقول عليها زي البحر
تقف قدامه تبصله تحس بيه
ممكن اوي متتكلمش
لكن تمشي من قدامه
وانت حاسس انك حد تاني
همومك رميتها كلها جواه من غير ما تتكلم
بس مشيت مرتاح
ونفسك ترجع تاني
فعلا بحبها وعلاقتي ببيتها كله قويه جدا
يعني كل اخواتها وولادهم وكده
ربنا ما يحرمنا من بعض
ربنا رزقني بـ 3 أصدقاء
مستعده أعمل كتير أوي عشانهم
لأني مش هعوضهم مهما حصل
هم عارفين نفسهم
هي واحده منهم
والإتنين التانيين هنا

على فكره هي عيد ميلادها النهارده
كل سنه وانتي طيبه يارب
وعقبال مليون سنه بصحه وسعاده يارب
كل سنه وانتي معايا ونكون بخير
::