[SiLver Spectra]

السؤال الذي يشغل عقول الكثيرين
الكثير من الأطفال و أنا منهم
هو ليه الدولة ما بتطبعش فلوس كتير و تخلص المجتمع من مشاكل الفقر
مش الفلوس دي ورق !



طب ما تجاوبنا يا شيخ حازم

قبل ما نبدأ نتعمق شوية في الموضوع لازم نعرف ان الجنيه أو أي عملة ورقية عبارة عن (شيك) أو (ايصال) مضمون من البنك المركزي



و كل ورقة ليها رقم تسلسل خاص بيها

طيب دا معناه ايه ؟ دا معناه ان الايصال دا له مقابل في البنك المركزي

تعالوا نرجع للتاريخ لورا
زمان , كانت الناس بتجتمع في يوم معين (زي سوق التلات أو سوق الجمعة) و كل تاجر بيعرض البضاعة الزائدة بتاعته و بيبادلها مع غيره , و كان التقييم مبني على العرض و الطلب , يعني البضاعة الي عليها طلب كبير و كميتها محدوده بيكون المقابل بتاعها كبير, بدل ما تبادله ببطيخه واحده ممكن تحتاج خمس بطيخات

بعد كدا بما ان حمل البضاعة بقى صعب التنقل بيها و السفر , بقى التبادل قائم على القطع الذهبية و الفضة
و بعدين بدأ الغش في الذهب فكان من الصعب التحقق من ان القطعة مصنوعة فعلا من الذهب الخالص و لا لأ , فكان الحل هو الرسم و النقش على القطعة الذهبية أو الفضية بحيث انها تكون ضمانة على انها قطعة اصلية صادرة من جهة واحده

و مع الوقت و مع بثوق العصر الصناعي , بدا اللجوء للعملة الورقية عن طريق وضع مدخرات في البنك المركزي , و من ثم يقوم البنك المركزي بعمل (ايصال) للنقود الذهبية و الاملاك بحيث يكون من السهل تداول الاوراق النقدية بين الناس , و كان زمان يحق ليك استبدال العملة الورقية بالذهب من البنك المركزي

حلو الكلام ؟
مع الانفتاح الاقتصادي و ارتباط التجارة بين دول العالم قامت اغلب الدول بربط عملاتها بعملات اخرى و اشهرها (الدولار)
بمعنى ان الدولار بقى هو الضمانة عند البنك المركزي بدل الذهب
( يعني ورق بيضمنه ورق )
و دا بمنظوري الشخصي هو السبب الي خلى اقتصاد دولة زي (امريكا) يكون ضخم جدا , و ادالهم الامكانية لطباعة الاوراق النقدية كيفما يشاءون

طيب برضو مش جاوبتنا على السؤال يا شيخ حازم , ليه الدولة مش بتطبع فلوس كتير ؟ حتى لو ليها مقابل من الذهب , ممكن الدولة تشتري ذهب كتير و تطبع منه نقود !



تفتكر الموضوع بالبساطة دي ؟

طيب تعالوا نتخيل ان دا حصل , دلوقتي الدولة هتقرر انها بدل ما هتديك مرتب الف جنيه هتديك خمس الاف جنيه , و مش كدا و بس و هتدي لكل فقير ماشي في الشارع 3 آلاف جنيه , و كلو هياخد فلوس و هيبقى كدا

بس لما يروح ينزل المحل عشان يشتري بالفلوس دي هيبقى كدا
ليه بقى ؟
هيلاقي ان البضاعة خلصت من السوق , و الي فاضل هيلاقي سعره بقى غالي لأن الطلب عليه كتير و كل الناس بقى معاها فلوس و نزلت تشتري
المحل بيجيب بضاعته مستورده من برا
عشان يجيبها من برا هيضطر يحول للعملة الصعبة (الدولار) أو لعملة البلد المصدر , و هنا عامل التحويل هيكون حاسم في تحديد قيمة العملة بتاعتك
امتى هتكون العملة بتاعتك قوية ؟ لما يكون عندك انتاج كبير و بتصدر منتجاتك بشكل كاف يخلي الدول كلها تحول على العملة بتاعتك او تحول عملة صعبة يكون مصيرها هو الضخ في البنك المركزي عندك (من الضرائب مثلا)

أما في الحالة الي احنا بنتكلم عنها , الي هي فجأة الدولة قررت تضاعف انتاجها من الاوراق النقدية بدون ماتحقق اي زيادة في الانتاج مقابل الزيادة في طباعة الاوراق
فهتكون النتيجة هو انخفاض القيمة الشرائية للعملة
يعني في المثال بتاعنا الراجل كان بيقبض الف جنيه و بعدين بقوا 5 الاف , في مقابل دا العملة قيمتها الشرائية هتنزل للخمس (يعني انت كدا ماعملتش اي حاجه غير انك قللت قيمة العملة و خليت الناس تشيل ورق كتير عالفاضي)
ليه ؟
لان المنتجات الي انت بتنتجها هتخلص , لانها بكدا مش هتتناسب مع كميات الاوراق الي باقيت بتنتجها , و دا هيخليك تلجأ للدول الاخرى عشان تستورد منها منتجات ( و غالبا اصلا هتكون اغلب منتجاتك مستورده كمان) , لما تروح تشتري من برا هو هيقيم عملتك حسب انتاجك , لما يلائيك بتطبع ورق كتير هيطلب منك برضو ورق كتير عشان تاخد نفس البضاعة
بدل ما هيديك العربية ب60 الف هيديهالك مثلا ب360 الف ورقة
و دا بالظبط نفس المثال البسيط الي بدأنا بيه (هيقولك عايز خمس بطيخات بدل بطيخة واحدة )

فهمت ليه الدولة مقيده في طباعة أوراقها النقدية ؟
خلافا لكدا البنك الدولي بيعمل رقابة صارمة لعمليات طباعة النقود و بيوزن انتاجك و صادراتك بيها

عايز تنتج ورق كتير ؟ يبقى لازم تصدر كتير

أظن كان ليه موضوع سابق في القسم بتكلم فيه عن انخفاض القيمة الشرائية للجنيه , ايه السبب هنا ؟
هو ان الدولة بترفع رواتب الموظفين و في نفس الوقت الانتاج مش بيتناسب مع الزيادة في المطبوعات الورقية من النقود , و دا بيخلي قيمة الجنيه تنزل , فيبقى معاك ورق كتير و مش عارف تشتري بيه حاجه ,
و دا الي بيسموه تضخم

بنسمع كتير في مصر عن انخفاض الاتحياطي الاجنبي من البنك المركزي المصري ,
قبل الثورة كان الاحتياطي بيبلغ 36 مليار دولار
و الانخفاض استمر لشهور و بعدين بدا يزيد و آخر حاجه في شهر (نوفمبر الماضي) انخفض نص مليار , ليسجل اجمالي الاحتياطي حوالي 16 مليار دولار
لو الاحتياطي بقى صفر , دا معناها ان الدولة اعلنت افلاسها , يعني الجنيه الورق الي في ايدك ماعتش له قيمه , عشان كدا استحاله الاحتياطي يوصل لصفر,, لان قبل ما هتصول لصفر الدولة هتعلن افلاسها
ليه بقى ؟
لان في تقريبا مليار من الجنيهات الذهبية و دول ماينفعش يتباعوا لانهم اخر ضمانة للعملة (الجنيه) و بالتالي فلو وصل الاحتياطي ل5 مليار اظن الدولة هتبدا في اجراءات الافلاس و الناس هتبدأ تتعامل بعملة تانيه غير الجنيه في حياتهم اليومية قبل ما الجنيه يتدهور أكثر و ممكن قيمته توصل لصفر (زي ما بيحصل في لبنان , بيتعاملوا بالدولار) و دا هبيتسبب في هشاشة الاقتصاد و عدم الاستقلالية و بيكون بقاء قوتك الاقتصادية مرهون بدول اخرى بتتعامل بعملتها

عشان كدا تسمع المحللين بيقولوا ايه ؟
يقولك الحل لمواجهة نزيف الاحتياطي النقدي هو في خفض قيمة الجنيه
دا معناها ان القوة الشرائية للجنيه تنخفض عشان الدولة تقلل من العجز الي بتعاني منه و الي بيخليها تلجأ لاستنزاف الاحتياطي بتاعها

و مين الي بيتضرر من خفض قيمة الجنيه ؟
هو المواطن من خلال غلاء الاسعار

يعني المواطن هياخد صابونه أو يفلي نفسه بالنهضة


عرفت ليه بقى الدولة مش بتطبع فلوس كتير و تريح الناس و لا لسه ؟