فوق يامصرى قوم اشتغل وبدل كلامك بالعمل
مالكش حيله غير الكلام وبقيت اسطى ف الجدل
العيب فيك وأنت السبب وأنت سبب كل الخلل
يامصرى مافيناش م الذعل ما تحس مره بالخجل
لجل تغير حالة الملل ابدر فيها بذور امل
فوق يامصرى فوق واشتغل وبدل كلامك بالعمل
اصحى فوق من ثباتك ولا خلاص جالك شلل
قوم واثبت مره ذاتك واخلع بقى ثوب الفشل
اجرى والحق اللى فاتك العمر مربوط با لاجل
فوق يامصرى فوق واشتغل وبدل كلامك بالعمل
دى الخلق ركبت الصاروخ وانت ماركبتش ع عجل
كل الدول اتغيرت واتطورت وانت نايم فى العسل
قوم يامصرى عيب عليك شمر ايديك بقى واشتغل
فوق يامصرى فوق واشتغل وبدل كلامك بالعمل
قوم وكل من ضرب فاسك ولا انت خدت ع الشحاتة
ومطاطيش لحد راسك ولا تستنى يوم وساطة
اللى فات فدى مداسك واوعى تسلم يوم للكسل
فوق يامصرى فوق واشتغل وبدل كلامك بالعمل
دا انت المدد للجدود أهل العزم وأهل الكرم
اللى بنو ليها السدود واللى علو فيها الهرم
اللى شقوا ليها القنا رغم العذاب ورغم العلل
فوق يامصرى فوق واشتغل وبدل كلامك بالعمل
ليك تاريخ تتباهى بيه ماتفرطشى لحظه فيه
لازم انت تزيد عليه تنقص عن جدودك ايه
انت ماخدتش ع التنبله دى المساله حبة كسل
فوق يامصرى فوق واشتغل وبدل كلامك بالعمل
انت ما تقلش عن جدودك فى الاصرار وفى التحدى
مهما كات الارض واعره انت اللى ح تقدر تعدى
بس يكون عندك يقين وتؤمن ان فيه امل
فوق يامصرى فوق واشتغل وبدل كلامك بالعمل
كات حجتنا ف النظام اللى ما ف يوم عدل
تعبنا من كتر الكلام وزهقنا من كترالملل
كل الخلق املها فيك بصه عليك وانت المثل
قوم يامصرى فوق واشتغل وبدل كلامك بالعمل
محمد شاهينـ