[SiLver Spectra]

أول ما بصحى من النوم و لسه عنيه مغمضه بلائيني بعد أفتكر مواقف قديمه
جه في بالي كدا موقف و أنا صغير أيام ******************
كنت مع صحابي ساعات تهف في دماغنا نروح الجمعية نشتري منها
و الجمعية دي مصطلح بيطلق على السوبر ماركت بس تبع الحكومة بتبقى موجوده في كل منطقة
سوبر ماركت كبير زي كارفور كدا هنا ,,اصغر جمعية بتبقى 600 متر مربع اقل حاجه
المهم يا ولاد ,,كان كل واحد فينا شايل 150 فلس يعني يعملوا 3 جنيه
و كان سني بتاع عشر سنين كدا

المهم و احنا واقفين عند الفرع بتاع الشيكولاته بقى و الحاجات الحلوة ,,اللي هو تلاقي فرع طوييييييل و ياعيني اخرك 3 جنيه مش عارف تجيب ايه ههههه

و احنا بندور على حاجه نجيبها لاقيت لبانه مفكوكه من ورقتها
عارفين اللبان دا اللي بيبقى ملفوف في ورقة و بيبقى رخيص
اللي هو هنا في مصر بيدهولك لما مش يبقى في فكه ,,ايوه ابو ربع جنيه دا
المهم أنا لاقيت لبانه حد مقشر ورقتها و مرميه وسط اللبان مكشوفة
فزي العبيط روحت ماسكها و بقول لصحابي : ايه دا!
آكلها ؟ هزار كدا و أنا مبتسم
و لسه برجعها تاني مكانها و اذ فجأة الاقي ايد بتخبط عليه و بتقولي : انت اللي فتحتها !

كان عامل شغال في الجمعية من اللي بيرتبوا البضاعة و بيحطوا الاسعار و كان لابس بالطو أزرق
اقوله : يا عمو و الله أنا لاقيتها كدا
يقولي : انا شايفك و انت بتقشر اللبانه (باعتبار انها موز )
خلاص لازم تشتريها

طبعا أنا ركبني خمسميت عفريت ,,اللبانه دي مش رخيصه ب25 فلس ,,نص جنيه يعني
هضيع نص جنيه من ال3 جنيه اللي معايا و كمان على حاجه ماليش ذنب فيها

المهم انها كبرت في دماغه و كبرت في دماغي
يقولي انت اللي فتحتها و لازم تشتريها و نحاول نقنع فيه ان أنا لقيتها كدا

في الآخر قالي خلاص ,, تعالى معايا على المدير
مدير!! ينهار اسود ,,دا الموضوع كبر أوي ههههههه

روحنا للمدير ,,كان راجل كويتي
بالمناسبة العامل دا اللي افشني كان مصري
دخلنا مكتبه و راح البياع قاله اني قشرت اللبانه دي و مش عايز اشتريها
قولتله و الله يا عمو أنا لاقيتها كدا و مسكتها بس مستغرب لاقيته مسكني و قالي انت اللي عملت كدا

فالمدير قالي : خلاص حصل خير بس ماتعملش كدا تاني
ما أعملش تاني ما اعملش تاني المهم اني مش هدفع ال25 فلس ظلم دول

بس
و كملنا شوبينج بال3 جنيه

و أنا قاعد بفتكر الموقف لاقتني بضحك
مدير ايه دا اللي على نص جنيه ههههه
وقتها الواحد و هو صغير كانت بالنسباله 100 جنيه و مشكلة كبيرة و المدير بقى و بتاع

لما بفتكر الموقف بيعجبني اني مش تنازلت مع اصرار البائع و زعيقه اني لازم اشتريها في حاجه أنا ماليش ذنب فيها غير اني ورط نفسي

سزاجتي دي كانت بتورطني في حاجات كتيره أوي و أنا صغير ههههههه