[احضان الحبايب]

اقتباس إمبارح حصلي موقفين ورا بعض في نفس اليوم و في نفس المنطقة .. بركن عربيتي في شارع سوريا طبعاً طلعلي السايس و شوية إشارات بإيده علي أساس إنه كدة ركني .. عموماً ركنت العربية و مشيت و مفكترش إني أدفعله إلا لما أرجع .. لقيت وابل من الشتيمة في المشايخ و الناس اللي بدقون منه .. و عمال يقول "طبعاً ما هي البلد بتاعتكم" .. و كلام من النوع دة .. رجعتله عشان أقوله إني ولا شيخ ولا حاجة أنا مجرد واحد مربي دقنه .. و شوية كلام عادي .. لقيته بيقولي "و أنا أكلم شيخ ليه" .. أنا واحد بشرب حشيش و راح مطلعلي سيجارة ملفوفة لفة محترمة .. تكاد أنها تحمل حرز حشيش يعاقب حاملها بالإعدام بتهمة الإتجار ... قلتله براحتك دة ذنب و إنت اللي هتشيله .. لقيته بكل ثقة بيقولي "إحنا حنخش الجنة و إنتوا اللي هتخشوا النار علي فكرة" .. بكل ثقة مشيت و إنسحبت من المناقشة .. رايح في أمان الله أشتري من أبو عمار السوري لقيت الولد اللي واقف مطلع سيجارة حشيش من جيبه و بيقول لصاحبه إنهاردة بقي هنولعها و شوية إستظراف كدة .. وكأن الموضوع عااادي جداً .. و طيعاً في طريقي من العربية لأبو عمار شاهدت عدد محترم من المعاكسات و سماع سب الدين و المخالفات الشرعية اللي أصبحت شئ عادي .. حاول تقف قدام محل بيع خمور و شوف كمية الشباب الصغير اللي بقي يروح يشتري .. الشاهد من الكلام فين الدعوة؟؟ إيه اللي خلي الناس شايفة اللي بدقن إنه إما إخوان أو إنه سياسي قذر؟؟ عارف مين السبب .. إحنا .. والله ضيعنا الدعوة بإنخراط المشايخ في السياسة ...شوهنا الدعوة و حرقنا القنوات الإسلامية بالتنظير عن جهل في السياسة .. أصبحنا طرف في المعركة بدل من أن نكون نحن الدليل إلي القرآن و السنة .. أصبحنا طرف في المعركة.. والله الذي لا إله إلا هو .. لو أن نصف الجهد الذي بذل في سب و لعن المخالف لنا كان تم توجيهه في دعوة الناس و النزول في الشوارع لهداية البشر .. لو كان أغلب الجهد في التوضيح للناي المنهج الرباني دون الهجوم علي أي منهج آخر لكان المجتمع في أحسن حال .. للأسف كان حلم حياتنا قبل الثورة إن مبارك يغور عشان ربنا يكرمنا و ندعوا الناس براحتنا في الشارع و في أي وقت .. للأسف أول ما إتفتح الباب أصبح الهدف الأول هو إنكار الآخر و شتيمة فلان و زندقة علان .. والله أخشي الله أن يقذفنا في جهنم بسبب تركنا للدعوة .. إنتشروا في الشوارع إدعوا في سبيل الله .. و أبوس إيديكم متتكلموش مع حد في السياسة .. أبوس إيديكم ملكش دعوة بأي إسم أ, رمز.. ركز في إنك تعرفه الحرام و الحلال .. الصلاة و النوافل .. العبادات و المعاملات .. و صدقني أي حد هيرجع لدينه أكيد هيعرف يفلتر أي فكر خاطئ بيتقدم قدامه .. و والله لا أبرئ نفسي.

مشاركات احد الشباب ال اعرفه ع النت .,

معلش هى طويلة شوية .,

بس اقروهاا .,

هتعرفوا وصلنا لحد فين .,

و ازاى اصبح التغيير و ادارة الازمه شئ مُـلح جدا ً