[SiLver Spectra]

اقتباس المشاركة الأصلية كتبت بواسطة sereen نعمل ايه فى دماغك دى ؟! احلى حاجة ان كلامك مقنع وعقلانى ويدخل الدماغ بس دة مايمنعش ان يخلينى افكر بردوا واشغل دماغى فى الكلام واسأل نفسى سؤال وامسك الموضوع من زاوية تانية ايه اللى وصل الناس للمرحلة دى دى وانهم يقتنعوا انهم ممسوسين ؟ ويوصل بيهم الحال انهم يروحوا لناس اللى للاسف كتير منهم بياخد الموضوع تجارة وبيتقلب الموضوع كله لدجل ؟ يبقى اكيد حاجة من القران او السنة بتقول ان فيه مس فعلا من الجن لما دورت ع السريع كدة لفت انتباهى اية وحديث لان الموضوع دة لقيت فيه اختلاف بين الفقهاء والعلماء فى كون مس الجن لجسم الانسان من عدمة فى منهم اكتفى بإن الشيطان بيقوم بالوسوسة ومنهم من اكد امكانية مس الجن لجسم الانسان والائمة الاربعه اتفقوا ع كدة وكان من ضمن ادلة الاستناد الاية والحديث اللى لفتوا نظرى الحديث اهو وقال النبي صلى الله عليه وسلم : ( إن الشيطان يجري من ابن آدم مجرى الدم ) ( متفق عليه ) بس لما جيت دورت فى التفسير وشوفت الموقف اللى حصل فيه الحديث لقيتة بإختصار ان صفية بنت حيى زوجة الرسول زارتة فى اعتكافة والوقت اتأخر فالرسول خرج معاها يوصلها فقابله رجلين فلما شافوة مع امرأة بعدوا واتكسفوا فالرسول قالهم تمهلوا انها صفية زوجتى وهنا المس معناه الوسوسة بمعنى ان الرسول خشى ان يقع فى قلبهم ريبه او شك او سوء ظن بيه لانة عارف طبيعة النفس البشرية والوساوس اللى بتدور فيها اما الاية الَّذِينَ يَأْكُلُونَ الرِّبَا لا يَقُومُونَ إِلا كَمَا يَقُومُ الَّذِي يَتَخَبَّطُهُ الشَّيْطَانُ مِنَ الْمَسِّ هنا شبه اكل الربا بالافعال اللى بيقوم بيها اللى بيمسة الشيطان فأنا بصراحة ما اقدرش لا انفى ولا اكد مس الشيطان لجسم الانسان من عدمة لان العلماء لما بيختلفوا بيكون كل فريق مستند ع ادله واكيد اللى بيأكدوا مس الجن لجسم الانسان هيكونوا شايفين ان العلاج الانسب له هو القران ومن هنا جه العلاج بالقران بالنسبة لكلامك فى انك ارجعت الراحة النفسية للعلاج بالقران فأنا متفقة معاك فيه خصوصا ان زى ماقولت الحاله النفسية بتساعد فى الشفاء زى مثلا واحد بيحس انة مش هيخف ويرتاح الا لما يروح للدكتور الفلانى ع فكرة انة اللى هى مامة مامتى كانت مابتقتنعش باى دوا يكتبهولها اى دكتور تانى غير الدكتور اللى متعودة تروحلة وهو كان كل اللى بيعمله انة يقولها انك زى الفل وكويس بترجع من عندة مرتاحة وتقول انا خفيت واى دوا بيكتبة بتقول ريحنى وفى ناس كدة تقولك انا عارف علاجى الدوا الفلانى اللى هيريحنى فالعامل النفسى مهم فعلا للعلاج لو واحد زى الجن ولو راح لدكتور وقاله انت قلبك ضعيف بتلقيه اتحول 180 درجة ومن اقل مجهود يقولك تعبان وعاش فى الوهم بالرغم ان ممكن يكون قلبة ضعيف بقاله سنين وعايش طبيعى بمناسبة الوهم عندى واحدة صاحبتى اول اما تفتح الشباك ويكون الجو برد تقولك لا انا هتعب وهيجيلى انفلونزا ولو عطست وقتها عطسة تنام فى السرير وتقول تعبانة رغيت كتيييير موضوع طبعا حلو وعجبنى تسلم ياطارق

عارفه لما اتنين يتخانقوا مع بعض
بيتقالهم ايه ؟
بتلاقي الناس بتقولهم اخزوا الشيطان يا جماعة
هل وقتها بنسيب القضية و نمسك على ان الشيطان هو السبب و نروح ناخد الاتنين عشان يتعالجوا من الشيطان ؟
و لا بيعد كل طرف يحاول يحل المشكلة و سبب الخناقة اللي بينهم لان في النهاية السبب كان الطرفين دول و هما اللي اتخاقنوا و افتعلوا المشكلة

نفس الفكرة للوسوسة ,,او للجن او لاي حاجه
انت اللي بتسيب نفسك عشان تقنع نفسك بالامور دي
و هتلاحظ دائما ان الناس اللي بتجيلهم وسوسة بشكل مبالغ فيه او جن راكبهم بانهم ناس قلوبها ضعيفة و بتتاثر بسهولة جدا
و مش شرط يكون ايمانهم ضعيف ,,انا اخويا الوسطاني كان اكثر واحد متدين فينا و جت عليه فترة كان الوسواس واكله و يعد يتوضى عشر مرات و يستحمى قبل كل صلاة ,,بس دا كان زمان و دلوقتي بقى تمام :d
ففي النهاية الحاجات دي انت اللي بتعملها بنفسك و بتقنع نفسك بيه

فاحنا هنا في الدنيا واجبنا دايما اننا نحاول نحلل و نحل المشاكل بشكل علمي لأن العلم هيقوي ايمانك و هيبعدك عن الحاجات دي على خلاف لو فكرت بشكل غير منطقي هتلاقي فرصتك في انك تبقى ضعيف أكثر
كلنا بنؤمن بالغيب , بس المفروض ما نفكرش فيه و نحوله لشيء مادي
هو طبعا عشان عقل الانسان محدود فبيحب دائما يحول اي شيء لمادة عشان يفسرها بشكل ابسط , لكن في الحقيقة الامر مش كدا
و شايف اننا المفروض نتعامل بشكل علمي و نسيب الغيب لربنا , و الا ماكنش هيبقى الكلام عنه محرم

نورتي ,,