[morshooo]

بسم الله الرحمن الرحيم

اهلا بيكم جميعا

وحلقه جديدة من برنامجكم

( أجمد عضو )

معانا النهاردة زى ما كلنا عارفين

Mr. M ! r o

ودلوقتى مع الحوار كامل :

س / اهلا بيك يا شاهينـ فى اجمد عضو ؟

اهلا بيك يا احمد

س / ها اية الاخبار يا نجم كله تمام معاك ؟

الحمد لله على كل حال

س / عايز ابدء معاك بـ يوم اليتيم والتوبيك الى نزلته ؟ اية حكايه يوم اليتيم معاك ؟

مفيش حكايات .. الموضوع وما فيه ان دا دين عليا وبوفيه ..
الاطفال دول كنت فى مكانهم فى يوم من الايام .. واكتر حد هنا حاسس بيهم ..
عارف يعنى ايه فى يوم زى دا مستنيين حد يجي يفرح قلوبهم ..
ويهون عليهم ويخرجهم من مود كئيب هما عايشين فيه معظم الاوقات
فا من هنا فكرت اروح دار واسترجع ايام زمان مع الاطفال الجميله دى .

س / طبعا ليك زكريات مع يوم اليتيم وانتا صغير فاكر اية منها ؟

انا عشت 17 سنه هناك .. هفتكر ايه ولا ايه ولا ايه يا احمد .
بس هحكيلك على موقف معين كده مقدرش انساه ابدا .. وكان جميل جدا جدا ..
وكل ما افتكره دلوقتى افضل اضحك ..
كنا زمان فى اليوم دا بنستنى واحد يجيلنا اسمه استاذ رضا ..
كان يجي يقعد معانا ونتكلم معاه كتير اوى وكنا متعلقين بيه جدا ..
انا شخصيا كنت بستناه من السنه للسنه عشان الموز اللى بيجيبه معاه هههه
كنت بسيب اى حاجه تانيه معاه واخد منه الموز واطلع اجرى من غير حتى ما اسلم عليه ههه ..
وكنت بستنى برده فى اليوم دا .. الناس بتوع جمعيه الرساله ..
اللى انا بقيت واحد منهم لما سنى تخطى العشرين سنه ..
واللى اصبحوا اصدقائى فيما بعد ..
لانهم ناس جميله جدا ..
وكنت برده بستنى اليوم دا عشان كنا نروح مع بعض جرين لاند او اى مكان تانى ..
حفله مثلا لتامر حسنى زمان او حفله لفؤش او منير او او او ..
كان يوم جميل بالنسبالى لانه كان بيرفه عنا وبيفرحنا وبيخلينا نشوف ناس كتير جميله ..

س / فى اختلاف بين انك تكون فى الملجأ وبين انك رايح زيارة واقصد اختلاف بالنسبه ليك انتا ؟

اكيد طبعا ..
كونى واحد من الدار .. بستنى الفرحه تجيلى وبستنى الناس يجيوا ويقعدوا معايا ونتكلم ونلعب ..
وهنا بقى يا اما يجوا يا ميجوش .. انا وحظى يعنى ..
اما كونى اروح انا فا دى عندى حاجه عظيمه جدا وبكون فخور بيها ..
لانى المرادى رايح اصنع البسمه على شفايفهم وادخل لقلوبهم الفرحه ..
فا هنا فى اختلاف كُلي ..



س / هندخل على المنتدى اية الخلاف الى حصل بينك وبين المنشاوى الفترة الاخيرة ؟

شوف انا مش حابب اتكلم عن حد مش موجود .. لكن حابب اوضح حاجه بسيطه
انا والمنشاوى كنا زى اى اتنين فى المنتدى بيحترموا بعض وبيقدروا بعض .
الخلاف ببساطه شديده .
انه محبش اتكلم باسلوب وحش مع ساره كونتيسا .. رغم انى متكلمتش اساسا
لانها لما جت كلمتنى قولتلها .. انا مش هتكلم انا رايح للشكاوى ..
وهنا هي افتكرت انى بهددها .. سبحان الله
فا طبعا الكلام وصل للمنشاوى فا جه يتكلم معايا ويهددنى انه هيعمل ويسوى .
فانا فى البدايه اتكلمت كويس جدا .. لكن هو اجبرنى كام مرة على انى اخرج عن شعورى ..
فا اتكلمت بلهجته فى البدايه .. واللى عندك اعمله والكلام دا .. طالما انا على حق .
وخرجت عن شعورى لدرجه انى شتمت نفسى بعد ما ابتدا هو الغلط .. وحط هنا مليون خط ( شتمت نفسى ) عشان مغلطتش فيه .. افضل ليا انى اغلط فى نفسى ولا انى اغلط فى حد .
وقلتله يابنى ابعد عن طريقي وسكتى عشان منزعلش من بعض وكلام غير دا كمان .
فوجئت بقى برده عليا فى العام .. مع العلم ان كلامنا من البدايه كان ع الخاص .

هو حب يثبتلى انه وحش على حد قوله .. ونجح جدا !

س / يعنى انا اغلط عادى خاص واشتم لكن عام لا ؟

اكيد لا يعني يا مورشو مش عاوزلها ذكاء ..!
مفيش انسان بكامل قواه العقليه يقول انا اغلط خاص عادي حتى لو محلل لنفسه الحق دا ..
لكن اما يكون الامر بين اتنين وفي الفاظ اتقالت زي اللي اتقالت دي
طبيعي حيكون الخاص ستر وغطا ..
بعكس العام اللي ممكن يشكل انطباع أول عند ناس متعرفنيش ..
ويبقى لصيق بي .. ويجرح اوي ناس تعرفني ..
ولو مش مصدقين فيا يبقى احترامهم من قراءه الالفاظ دي بند لازم نحترمه ..

س / اول لما شوفت التوبيك عملت اية ؟ واية الى جيه فى بالك ؟

اول ما شوفت ربع كلامه .. ايدي بدأت ترتعش وقلبى بدأ يدق جامد ومبقتش عارف اعمل ايه وبقيت مستغرب اوى وفضلت اقول لا حول ولا قوة الا بالله كذا مرة ..
وكنت مدايق اوى ان حد يشوف الكلام .. مش عشان الكلام متوجهلى ..
لكن عشان معانا بنات ميصحش ابدا يشوفوا كلام زى دا ..
لان لو معانا ست كبيرة وشافت كلام زى دا ممكن يحصلها حاجه ..
وفى ناس انهارت من جواها بمجرد انها شافت الكلام دا ..
وفضلت اتمشى فى شقتى مش عارف اعمل ايه وايه العمل ..
لكن كلمت ماتركس ومشكورا حذف الموضوع واللى كان على شريط الاهداء كمان ..
ولحد دلوقتى الموضوع واجعنى جدا ..



س / كنت متوقع ان حد يعمل كدا معاك ؟

اطلاقا .. لانى مبتعاملش مع حد وحش ابدا ..
وعمرى ما توقعت انها توصل لربع دا ..
ولانى بحترم الكل حتى لو مُختلف معاهم ..

س / مكنتش مضايق من شكلك قدام الاعضاء بعد ما البعض شاف التوبيك ؟

انا مدايق عليهم عشان الكلام كان وحش اوى ..
وبعدين شكلى هيبقى وحش ليه ؟
هو انا اللى قلت كلام زى دا ؟

س / انتا اتحظرت ورجعت تانى بعد ردك فى التوبيك ؟ مين حظرك ومين رجعك والا ماتعرفش ؟

انا استغربت من حظرى .. لان مش انا اللى غلطان ..
واللى حظرنى حوراء .. وانا مقدر اللى عملته لانها كانت حابه تاخد اجراء سريع ..
وبعتب عليها لانها محكمتش عقلها قبل ما تاخد الاجراء ..
لان مينفعش تاخد اجراء كا ادارى وانت معندكش ادله تدين الطرف التانى ..
لان سهل جدا اكتب موضوع واجيب كلام من دماغى واحط اسمك فيه من خلال اقتباس ..
وبكده اروح اشتكيك بقى هههه

س / مش شايف ان ردك فى التوبيك كان خارج وكنت تستاهل الحظر والا كان رد طبيعى ؟

انا مرديتش فى الموضوع اساسا .. محبتش ادي لا الموضوع ولا الشخص اكبر من حجمه ..
لكن ان كان على الاقتباس فا هو كلامى فعلا وانا اللى قلته ..
لكن قلته ع الخاص .. دى حاجه ..
الحاجه التانيه والاهم .. انى مغلطتش فى حد .. انا غلطت فى نفسى .. وبرده زعلان ..
وطارق مشكورا قالى انا ماخدتش اجراء ضدك لانك مغلطتش فى حد .. انت غلطت فى نفسك ..
وياريت كان نزل رسايله هو مش بس يكتفي برسايلي
وكأنه بيصطاد في الميه العكره ..!

س / شايف مين اهتم بيك بعد الموقف الى حصل معاك ؟ ووقف جنبك ؟

الحقيقه كل الناس قدرتنى .. مقدرش انكر دا ..
خصوصا طارق .. وعبده احضان الحبايب .. وزينب تيتشر .. وحنان .. ومحمود ساد .. وماجيكو .. وسهر .. وانا اوف لاين .. ورودى .. واسماء .. وناس كتير بعتولى تقييمات ورسايل منهم خالد مسك الشهاده .. واحساسى صحيح وغيرهم وغيرهم ..
وبكده انا بعتبر ان كل الاعضاء قدرونى الحمد لله ..
ودا شىء ان دل فا انما يدل على مدى حبنا وتقديرنا واحترامنا ببعض ..

س / خلافاتك بنشوفها دائما مع الاعضاء مش يمكن العيب فيك ولازم تغير من تعاملك مع الاعضاء ؟

خلافاتى ؟؟ اللى هي ايه خلافاتى دى ؟
لو لاحظت هتلاقى خلافاتى بتبقى اختلاف فى وجهات النظر ..
فا بتقلب لمشاكل شخصيه .. والحمد لله مش من قبلي انها تقلب لشخصيه ..
رغم ان دا غلط ..
وبعدين مانت عندك ناس اختلفت معاهم ياما .. ليه موصلتش لمشكله ؟
عشان هو مجرد اختلاف طبيعي جدا ..
اما ايه اللى بيوصلها لخلافات ..
ان محدش بيشوف نفسه غلط وميحبش انه يكون غلط حتى لو هو غلط .
محدش عنده القابليه انه يكون غلطان ويصلح ..
ومعلش نقطه اخيره فى السؤال دا ..
بما ان الاعضاء شايفه كلامى ..
يريت اللى انا بعامله وحش على حد قول مورشو .. يجي ويقول انا .. !!!
وانا هعتذرله .. معنديش ابدا مشكله فى دا ..
لكن الحمد لله مش بتعامل مع حد وحش ابدا ..



س / مش ندمان انك قولت فى المنتدى انك متربى فى ملجأ وانك كنت هربان من البيت ؟

لا طبعا مش ندمان ولا فكرت فى دا ابدا .. مش دى الحقيقه ولا ايه ؟
وبعدين يا احمد انا مهربتش من البيت .. ارجع واسمع حلقه الراديو من تانى ..
مع انك اللى كنت بتحاورنى !
انا سبق وقلت وبقول تانى اهو .. انى هربت من الملجأ من سوء المُعامله .. بس كده

س / انتا قولت قبل كدا انك دورت وبتدور على والدك ووالدتك ؟

دا حقيقي .. وياما هدور طول مانا فيا نفس
مش شايف انك خلاص بعد الى قولته عنهم اعتقد مش هدور عليهم لانك خلاص مش فارقين معاك ؟
هو انا قلت عنهم ايه ؟ .. يابنى انا مش محتاج اعيش معاهم ..
لو بدور عليهم فا عشان صله الرحم ..
عشان اشوفهم محتاجين حاجه وامد ايدي ليهم مش اكتر ..
واعتقد اني وصلت لمرحلة عمريه اكون فيها اكتر وعي باللي حصل
وبأن اللي فات مات حتى لو مجرد ( موت دماغي) ..!
حابب اعرفهم واسمعهم و في اسئلة جوايا عاوز اجوبه عليها
ومحدش حيجوبني غيرهم
وعندك حق ( هما فعلا مش فارقين معايا ) لكن الله ورسوله قالولنا .. صله الرحم ..
وبحاول قدر الامكان اعمل اللى عليا وهحاول ديما ..

س / بس انتا قولت انك هربت من البيت بسبب ضرب والدك لوالدتك ؟

يابنى انا قلت ان والدتى هي اللى خرجتنى برا البيت اثناء مشكلتها مع ابويا ..
وانها قالتلى بالحرف الواحد .. اجرى برا يا خالد ..
ومحدش يسألنى مين خالد بقى !!

س / شايف ان هما سبب فى الى انتا فية وسبب فى الكلام الى اتقال عنك من المنشاوى ؟

سبب في اللي انا فيه من انهي ناحيه ..؟!!
وبعدين الواحد في الدنيا دي ما بيخدش غير نصيبه اولا واخيرا
اما مسألة كلام المنشاوي فأهلي مالهمش دور في اخلاقيات بتمثل صاحبها ..
مش بنسمع الشتم واللعن بالام والاخت طول ما احنا ماشيين..؟!
وكل اللي امه بتتشتم حيكون العيب فيها ولا سوء اخلاق من اللي بيشتم؟؟!!
مسأله كلام المنشاوى دى .. مش معاك فيها ..
لان اللى عايز يقول كلام وحش .. بيقوله حتى لو الوالدين موجودين ..
ياما ناس ليها امهاتها وابهاتها وبيتشتموا بيهم !!
فا الموضوع هنا مش موضوع ان كانوا موجودين ولا لا ..
وعمرهم يا احمد ما كانوا سبب فى اى كلام اتقالى ..



س / بس من ضمن الكلام الى اتقال فى التوبيك انك تربيه ملجأ ولمح انك مش لاقى اهلك ؟ اعتقد يبقو سبب فى الكلام الى اتقال فى التوبيك ؟

لا طبعا اساسا الكل عارف اني اتربيت في ملجأ
ودا شيء بقدر وجعه الا اني متأقلم مع الوضع من صغري
ومش بخبيه ولا بتهزني كلمه من النوع دا
والكلام اللي اتقال في التوبيك نابع من شخصية واخلاق اللي كتبه
مش من اهلي او من اسلوب تربيتي ..
هو اللي يتلام على اللي اتقال
مش انا او اهلي اعتقد ..!

س / لو لقيت اهلك فعلا اية اول سؤال هتبقى عايز اجابته منهم ؟

اول سؤال حيكون ليـــه .......؟؟
وراها نقاط متهمش حد غيري انا وهما بس

س / عايزك توجه كلمه لاعضاء منتدى بنات مصر ؟

اه يريت ..
شوفوا يا جماعه .. يريت نتعلم من كل موقف قابلنا .. ونستغله لصالحنا ..
ويريت كمان مش كل مشكله تحصل .. نهد ثقتنا فى الطرف الآخر ..
امال ليه فى حاجه اسمها امتحان واختبار ؟؟
حاجه اخيرة احب اقولهالكم ..
الشىء اللى بيربطنا هنا بصرف النظر عن الاخوة والصداقه والحب وكل دا ..
هو الاحترام .. لو فقدته .. فقدت كل شىء ..

س / حاسس انك قولت حاجا فى الحوار كنت عايز تقولها ؟

هو انا كنت عرفت حاجه ومعرفتهاش لا بجد بقى ..هو فعلا كنت عايز اتكلم عن موضوع المنشاوى واوضح كام نقطه .. لكن انت سألت الحمد لله
عنه ..




س / اتوقعت انى استضيفك فى اجمد عضو عشان تكلم فى الموضوع دا ؟

جدا عارفك اغلب استضافاتك بتكون بعد مشكلة معينة
وكأنه سبق صحفي ..

س / اخيرا وبصراحه انتا وافقت على الاستضافه ليه ؟

لنفس السبب اللي خلاك تستضيفني في انك تبين للاعضاء وجهة نظري
في الموضوع وتحلل اجاباتي وتشوف مدى تناقضها
ومنها تقول في الاخر
نورتنا يا أجمد عضو

فى حاجه عايز اضيفها استغلالا بقى للبرنامج دا ..

رسالتى للمنشاوى ..
ربنا يابنى يعلم انت وقت الكلام اللى قلته كنت عامل ازاى ..
رغم ان دا مش مبرر للى قولته ..
لكن ربنا يعلم من جواك انت ايه ..
لو انت حقيقي وحش .. فا ربنا يهديك ..
ولو انت كويس .. فا ربنا يسامحك ..
وانا عن نفسى ورحمه ابويا مسامحك ومش زعلان منك ..
رغم ان دا مش مبرد النار اللى جوايا .. لكن مسامحك ..
تقول عليا عبيط بقى او اهبل .. اهو انا مسامح وخلاص ..
وربنا كبير ..

رساله كمان لايمن الرحــــــــال ..

رغم ان كل اللى حصل فى الاخر دا بسببك يا ايمن ..
ارجو انك تقبل اعتذارى ..
لان انا غلطت فيك جامد .. وسامحنى ..
وانا مش زعلان منك يا ايمن ..
ودا عشان انا مؤمن بانك انسان خلوق وانسان كويس ..
واى حد زعلان او شايل منى .. له خالص اعتذارى ..
محدش ضامن بكرة فيه ايه .. ومحدش ضامن عمره ..
واساسا الواحد مبقاش عنده القدره انه يشيل من حد ..

فى النهايه بشكرك جدا يا احمد على جميل حوارك .. واسئلتك اللئيمه
يا خلبووووووووص انتا
وحقيقي بشكر الناس المتابعه ومش عايز حد يزعل من كلامى ..
اسأل الله ان تكونوا جميعا فى تمام الصحه والعافيه ..
اقعدوا بعافيه .. او اقعدوا وقوموا .. اللى انتوا عاوزينه بقى

وبكدا بتخلص حلقه النهاردة

استنونى وحلقه جديدة من

( أجمد عضو )

اقعدو بالعافيه