س / المنشاوى مسجل فى المنتدى من 2010 وتقريبا انتا مجهول لمعظم اعضاء المنتدى ؟ اية سبب انطوائك دا فى المنتدى ؟
ممم ممكن آكون مجهول من معظم الآعضاء بس هي مش انطوائية
مني هو بحكم شغلي بيكون دخولي المنتدي قليل في اليوم يدوب ساعة
او ساعتين بالكتير بتوع باليل ودا بيخليني مبعرفش اتعايش مع الجميع
واشارك في معظم الآقسام كويس لآني برجع مرهق جدا ويدوب بخش
اتابع قسمي شوية ولو راجع زهقان ممكن اخش اتابع القسم واخرج منه
ع الالعاب حبة وبعدين انام ..فا هو الشغل بس اللى مش مديني فراغ اكتر للمنتدي
س / شوفت قبل كدا او خلال تواجدك طوال 3 سنين فى المنتدى ان فى عضو نزل توبيك عشان يشتم فيه عضو تانى ؟
لاء آكيد والحكايات دي عمرها ما بتحصل ومهما وصل الخلاف بين اي
طرفين مبتوصلش للي وصلتله انا مع شاهين فا اللي انا عملته حاجة محدش عملها بكل تآكيد
س / صحيح انتا اصلا كنت برا المشكله والمشكله كانت بين سارة وشاهينـ ؟
آها دا حقيقي
رجعت من الشغل بليل عرفت من طريق غير مباشر كدا
آن شاهين كلم سارة باسلوب وحش وكله عصبية وكان فيه نبرة تهديد وحاجات كدا ..فا بنائاً عليه دخلتله اعتب عليه في آول رسايلي لي
مكنتش داخل اتخانق ابدا ولا كنت داخل فاردله عضلاتي
بالعكس كنت داخل كلي هدوء وعقل وكلمته الاول من باب
ان كلنا اخوات وميصحش اللى عمله وكدا بس
س / شاهينـ قال انك اجبرته انه يخرج عن شعورة فى الرسائل الخاصه ليه مشتكتش للادارة او تعمل شكوى ؟
القصة وما فيها اني زي ما قولت كدا دخلت لشاهين بعتله اول رسالة بكل هدوء
وعقل بعتب عليه فيها وكدا قابلت اول رد منه علي كلامي كله صد
لكلامي نظام الزء في الكلام كدا يعني مثلا لما تيجي تكلم واحد ممكن
واحد يرد عليك رد ماشي مع اسلوبك وممكن واحد يرد عليك ناشف ا
للي هو تحس فيه انك بتكلم واحد مش فارقة معاه كلامك ومش عاجبه
كلامك حتي لو كلامك دا مفهوش اي اسائة او غلط وكان مقتنع
باللي عمله وبينكر التهديد وفـ كلامه حسيت انه بيستفز فيا عشان اتخانق
مش عشان يكلمني بهدوءبعتله تاني قولتله انا مش بكلمك عشان اتخانق
انا بكلمك بعقل وانا لو عاوز
اتخانق او داخل عشان دا مكنتش دخلتلك اتكلم بهدوء كنت دخلت
اتخانقت فا متكلمنيش باسلوبك دا ياشاهين عشان انت مبتكلمش
واحد عاقل هيبلعلك وكدا
خليك حلو بقة وكلمني براحه زي ما بكلمك
المهم كان اسلوبي كدا فى الاول يعني بس مش عارف اكتبلك كلامي
بالظبت لآني مش فاكر الكلام كله
الاقي برضه الرد جايلي يعني لو مكنتش دخلت بهدوء كنت عملت ايه
ودا تهديد يعني ولا ايه انا خط احمر وحاجات زي كدا
المهم رسالة في رسالة لقيت ردوده بنفس الطريقة عرفت انه بيستفز فيا
مش متقبل الكلام وبكلامه بيقولي اللي عندك اعمله فيما معناه يعني جوة
رسايله كلها حسستني انه بيقولي كدا بس بطريق غير مباشر
بعتله اخر رسالة وانا متعصب جدا
قولتله بص تعتبرو تهديد بقة تعتبرو اى حاجة تيجي فى دماغك
بلاش سارة وبلاش انا عشان انا مطرطش ودماغي وحشة وكدا
مفيش دقيقة وقابلت منه حتة رسالة زي الفل
كلها سب ديانه سب لولدته وسب لوالده وسب للدنيا وسب للدين
وسب للكلام ولقيته مرة وحدة نفخ عضلاته عليا وعملي بطوطة العنيف
ههههه سوري اشاهين المهم اخدت انا الكلمتين ملقتش اي رد ممكن ارده
غير اني ارد بنفس الآسلوب
فكرت قولت لو هبعتله واشتم آنا مش هشتم جوة رسالة لآني عصبي
اسلم حل عشان شكل المنتدي واحتراماً للناس اللي فيه والبنات
وكدا واحتراما للآدارة وطارق ابعت لطارق وشوف قراره سليم؟
مسكت نفسي يوم كامل وبعت الرسايل من اولها لآخرها لطارق
وكتبتله في اخر الرسايل
انا كنت ممكن ارد بنفس الآسلوب بس عملت تقدير واحترام للمنتدي واللي فيه واستنيت قرارك علي سب الدين دا
قام طارق مشكوراً باعتلي ..ساب سب الدين بتاع ميرو كله
وقالي يعني انت مش شايف نفسك كنت عصبي يا منشاوي؟
عموما انا بعيد عن كل المسجات دي بس هحاول اكثر من رقابة
قسم صفحات شوية
اول ما قالي كدا استغربت انا وقولت في عقل بالي يعني هو شاف عصبيتي
ومشفشي طريقة ميرو ليا ومشفشي سب الدين دا كله ؟
زود عندي العصبية اكتر والآندفاع اكتر قومت باعتله قولتله
اسلوب الشكاوي مش اسلوبي وانا عارف انك بعيد ياطارق وكدا
وطلاما انت شايف ان سب الدين مسموح بيه حتي جوة الرسايل انا هعرف اخد حقي بنفسي بقة
وبرغم ان الاسلوب دا مش اسلوبي بس مش هينفع اتعامل مع ميرو
غير بيه بعد رسالته ليا
ولقيت نفسي رايح ع العام عامل الموضوع اللي الكل شافه دا
س / شايف انك اتصرفت تصرف صح بالى عملته ؟
آكيد لاء بس تصرفي مجاش مـ الباب للطاء كدا
تصرفي جيه بنائاً علي الكلام اللي اتوجهلي من شاهين
وفـ نفس الوقت قبول طارق للرسالة وانه سمح بيها دا زود عندي
العناد في آني اعمل كدا وقدام الكل عشان انا قدرت الكل من البداية
واحترمت كل الناس بما فيهم طارق وبعتله ولقيت حقي مجاليش بل بالعكس
حسسني اني طلعت غلطان اني مآخدتش حقي بنفسي على طول
ومعملتش حساب لآي حاجة واستنيت اشتكيله دا كله وقت غضبي
خلاني مش شايف ولا بفكر فى حاجة غير اني ارد الرسالة بتاعة ميرو
بآنقح منها وقدام الكل
واللي عملته آكيد مش صح بس هي ساعة شيطان
س / يمكن انتا اعتزرت لطارق فى اول التوبيك تقريبا كان ايه سبب اعتزارك دا ؟
زي ما قولتلك عشان بعتله وكدا وكنت عامل حساب للكل بما فيهم هو
لما جيت انزل التوبيك كتبتله اعتذار بقة علي اللي هيشوفه
مني بعد رسالتي ورده يعني
س / شايف انك لما تعاير حد باهله حتى لو فى خلاف بينك وبينه دا تصرف سليم منك ؟
دي عمرها ما تخرج مني لآنه مش اسلوبي علي فكرة
ودي مش شخصيتي انا معايرتش شاهين انا كل اللي قولته وانا بشتم
انا بقة مش تربية ملاجئ زي ما بتقول ..ودي اتقالت عشان شاهين
وهو بيشتم في رسالته الآخيرة ليا بيسب وبيقولي انت بتكلم واحد تربية ملاجئ عارف يعني ايه يعني مش عارف ممكن اعمل ايه وحاجات كدا
يعني قلهالي من باب التهديد في الخناقة بيني وبينه وانا اصلا معرفش قصته
فا لما جيت اعمل الموضوع اخدت رسالته دي اللي فيها الكلام دا
واللي فيها سب الدين
وجت فـ دماغي انه بيقول تربية ملاجئ من باب انه عاوز يوصلي انه
صايع قديم يعني ههههه يعني افتكرت انه بيقولهالي نفخت عضلات منه مش انها حقيقه فعلاً
انا اقسم بجلالة الله ما اعرف قصة شاهين غير بعد ما نزلت التوبيك
ورحمة ابويا بجد وبعد ما عرفت زعلت من نفسي علي الكلمة اللي قولتها
مع اني قايل كلام كتير كله سواد ههههه بس اكتر كلمة وجعتني انا شخصياً هي الكلمة دي
س / فى اعضاء قالو انك حد كويس جدا بس انتا اثبت للجميع عكس دا بالى حصل ؟
والله في اعضاء شافت الموضوع من بره وهي معذورة لآن الكل ليه الظاهر
بس انا مقدرش احكم علي نفسي كويس او وحش اللي اتعامل معاية
عن قرب هو اللي يقدر يحددلك دا والحمدالله رب العالمين لا عمري
ظلمت حد ولا عمري جرحت حد بكلمة ولا بحب الضرر لاي حد وبحب كل الناس
ومفيش انسان مفهوش عيوب اكيد فيا عيوب وفيا مميزات بس معتقدشي
عيوبي مغطية على مميزاتى واحنا في الاول والاخر مش ملايكة كلنا
بنغلط بس الاهم بتغلط امتى وليه وعشان ايه
فا انا لو مكان الاعضاء اللى شافت كلامى اكيد هكون مستاء جدا
من الشخصية اللي كتبت الكلام بس مش هقدر احكم عليها كويس لو معرفهاش عن قرب
س / مكنتش شايل هم الاعضاء الى هتشوف التوبيك والكلام الى فيه بما ان معانا بنات فى المنتدى ؟
قبل ما اعمل اي شيئ فكرت فيهم وفكرت في المنتدي ودا اللي خلاني ابعت
لطارق ولو مكنتش فكرت فيهم وفي المنتدي مكنتش بعت ودخلت
عملت كدا على طول بس مع النرفزة وعصبيتى خصوصا بعد رد طارق عليا
مكنتش بفكر في اى حاجة غير اني ارد رسالة شاهين ع الملئ
وانا بجد بتآسف لآي بنت شافت كلامي انا غلطان بس المشكلة اني
لما بتعصب مبقدرش اتحكم في نفسي ولما بوصل لمرحلة الغضب عقلي بيقف
عن التفكير فا انا خجلان منهم بجد وعندهم حق في اى كلام هيقوله
عني بس انا بجد كنت واحد تاني وقت ما نزلت التوبيك دا
وانا اسف لآي بنت شافت كلامي واي شاب برضه
س / شايف انك ممكن ترجع للمنتدى او حابب ترجع رغم ان الجميع او الاغلبيه رافض الى عملته ؟
بص العشرة ما بتهونش وانك تقعد في مكان سنين علي مدار 3 سنين كل يوم بتدخل ومرة وحدة تلاقي نفسك مبتدخلش دي اكيد وحشة بس انا قابلت هجوم شنيع عليا حتي من غير ما حد يفهم الموضوع كويس ولقيت ناس بتكرهني من الباب للطاء كدا حتي من غير ما اتعامل معاهم ولا اعرفهم ولا يعرفوني انا عاذرهم اكيد بس بعد الكره اللي شوفته ليا وبعد موقف الادارة معايه انا بقولهم كتر الف خيركم علي اللى عملته معايه وان كنت اعرف اني مكروه فا كنت لميت حاجاتي ومشيت من زمان 
من غير حظر ومن غير كل اللي حصل وموقف طارق معاية خلاني احس ان قلة وجودى افضل من وجودي معاكم انا بحب المنتدي واللي فيه دي حاجة اكيدة ومكنتش متخيل رد الفعل مني او من غيري عليا بس مفيش فـ آديا حاجة الله غالب
س / لو الادارة رجعت فعلا هتتعامل مع الاعضاء ازاى ؟
ههههه رجعتني معتقدشي انه يحصل ..بس انا زي منا فارس هو فارس
اللي حصل دا لحظة غضب ومش اسلوبي ولا طريقتي بس في لحظة لقيت
واحد تاني بيتكلم عشان فـ اعتقادي وقتها اني مش هينفع ارد باي
حاجة غير بنفس الاسلوب والطريقة اللي هي السب والشتيمة وكدا
س / اكيد انتا عندك اصدقاء على الميل والفيس من المنتدى قالولك ايه على تصرفك الى عملته زعلو منك قالو من حقك عايز اعرف عملو ايه معاك ؟
كل اصدقائي المقربين ليا زعلو مني اوي وزعلو من طريقتي وكانو مصدومين
مني عشان دا مش اسلوبي وقالولي كان لازم تمسك نفسك وكدا انت مش كدا
ودي مش طريقتك ليه تنزل بمستواك للحد دا مكنتش ترد وبتاع كلهم
كانو زعلانين اوي بصراحه وانا ذات نفسي كنت زعلان من نفسي
س / المنشاوى لو قولتلك اضايقت من الى عملته دا والا لا هتقول ايه وبصراحه ؟
والله العظيم بعد ما هديت وراجعت اللي عملته كدا زعلت اوي من
نفسي واضايقت اكتر لما عرفت قصة ميرو ودا اللي خلاني ادخل اعمل
توبيك اعتذار تاني يوم لميرو بعد ما هديت انا كنت حاسس اني فـ غيبوبة
وقت التوبيك وبعد ساعة من نزولة فوقت شوية
س / تحب تقول ايه لـ شاهينـ ؟
اقوله ميزعلشي مني لو غلطت فيه حتي لو هو شايف انه صح وانا غلط
فا انا متقبل دا واذا كنت فتحت كلام قديم دلوقتي فا انا مش فاتحه عشان
نجدد المشكلة انا فتحته توضيح للناس وانتا زي اخويا ومتزعلشي لو قولتلك
اي حاجة تجرح او اتنرفزت عليك وقت غضبي وانت من الشخصيات الطيبة
بس بوئك مريحكشي معاية ههههه متزعلشي لرابع مرة بقولهالك وحقك عليا
س / تحب تقول ايه لاعضاء منتدى بنات مصر ؟
برضه اقولهم ميزعلوش مني علي اللي حصل ودي اهانه اكيد للمنتدي كله
لاني باللي عملته بوظت شكل وصورة اللي فيه ومن حقهم يزعلو اكيد
مني ويهاجموني انا بتآسف لآي حد شاف مني كلمة خارجة واهو ربنا راحمكم
من لساني ههههه افتكروني بالخير بقة ^_*
س / انتا وافقت على الاستضافه ليه رغم حظرك من المنتدى ؟
عشان بصراحه في حاجات كتير مكنتش واضحه كنت حابب اوضحها بس
وبكدا بتخلص حلقه النهاردة
انتظرونى وحلقه جديدة
وضيف جديد فى
أجمد عضو