[SiLver Spectra]

اسمي جه اكتر من شاهين ..هتخلوني استعجل في خلع الرداء الاحمر

مبدئيا كدا ..اظن انا مش محتاج أتكلم لأن المنشاوي اكيد متفهم و عارف اني بحترمه و تقريبا عمر ما دار بينا خلاف . و يمكن المنشاوي من الناس القليلة اللي كنت بحب اقرأ خزعبلاتها و اسلوبها في الكتابة و اللي فعلا بيضحكني و كنت مقتنع جدا بان القسم لايق عليه و مناسب أكثر من أي حد تاني

نخش في المشكلة..
عشان أقدر احكم بعدل في مشكلة لازم اقرأ و اتمعن كويس التطورات و بداية الاشكال
انت يا منشاوي بعتلي فعلا رسالة و حطيت الرسائل اللي درات بينكم بالكامل . و بناء عليه أنا كمان راجعت الرسائل اللي بينكم و اللي بين شاهين و برنسيسة
نبدأ برسائل شاهين و برنسيسة..
أي مشرف بيحصله خلاف مع عضو بيكون رده : روح قدم فيه شكوى
و دا حق للعضو أو للمشرف انه يقدم شكوى تظلم و احنا واجبنا بنراجع الشكوى و بنحكم
اللي حصل بين شاهين و برنسيسة ماكنش فيه اي نوع من التجاوز و ان كان فيه زعل و دا وارد و بيحصل ان العضو يكون زعلان على مشاركة اتحذفتله سواء بوجه حق او بغير وجه حق
فممكن يكون في انفعال و دي انا شخصيا حاجه متعود عليها . بس الفكرة : هل في لفظ اتقال بينهم ؟
يعني لو عضو بعت رساله و سأل : انت ليه بتحذف مشاركتي . و عموما انا هقدم فيك شكوى
هل أعاقب العضو عشان كتب رسالة زي كدا ؟
شاهين اتراسل مع برنسيسة و قالها انا هقدم شكوى .برنسيسة شافت ان دا تهديد ..مع ان أنا مش عارف دا تهديد ازاي !
لأن لما ميرو يشتكي على مشاركته كان ردنا كادارة هنقوله: المشاركة تستحق الحذف
و خلصت الليلة مع العلم انها كانت مشاركة قديمه لكن برضو ردنا هيكون : انها تستحق الحذف
و الاجراء هو اننا ناخد تعهد من شاهين و دا فعلا حصل و بقولها ادامكم ..لو صادف و شوفنا شاهين كتب عن حد او مش التزم بالقوانين هيكون مصيره العزل من الاشراف و هو مواعدني من قبل مشكلته مع برنسيسة انه هيلتزم بالقوانين و اي حد يلاحظ اي سلوك سيء منه يبلغني عشان نراجع السلوك دا و لو لاحظنا ان في تجاوز لفظي منه هكون اول واخد اخد اجراء فيه

نرجع تاني للمشكلة
بعد كدا المنشاوي بعت لميرو رسالة مضمونها (ابعد عن سارة يا شاهين) مع ان في فرق كبير جدا بين انك تقول لواحد ابعد عنها لسبب اجتماعي و بين انك تقوله ابعد عنها لسبب بيتعلق باجراء داخل المنتدى !
بمعنى ان دي مش خناقة ولدين على بنت !
يبقى هنا المنشاوي مالوش اي حق في التدخل في مشكلة بتتعلق باجراء تم اتخاذه في حذف مشاركة لعضو لأنه مش مراقب و لا اداري فهيقدر يطلع على الاجراء و بناء عليه يقدم حكم
و من ثم كان في شد حصل بين الاتنين في الرسائل ,,و البداية كانت من المنشاوي في رسالته الاخيره اللي كان فيها الفاظ و تهديد و وعيد و سب للنفس (مش حابب انزل الرسائل) فرد ميرو بنفس الاسلوب
و هنا الاتنين اسوء من بعض . ميرو غلطان و يمكن دا السبب اللي خلاني كادارة مش أقدم اعتذار لان الغلط كان متبادل
لكن الحساب الاكبر بيكون للبادئ
و هنا كان ردي عليك يا منشاوي لما اشتكيت

اقتباس منشاوي بضمير كدا و بأمانة انت رسالتك الاخيرة ماكنش فيها تهديد و عصبية ؟ اولا ماينفش يا منشاوي تكون انت جهة حكم و تقول ماتجيش جنب برنسيسة فرضا كانت هي اللي غلطانة ؟ يبقى ينفع يكون دا اسلوب حل مشكلة ! عموما انا بعيدا عن كل السجال و الخناقات دي انا هحط قسم صفحات مكشوفة تحت المراقبة مؤقتا

و يمكن ماكنتش متابع يومها و كان دخولي تقريبا ساعة او حاجه زي كدا و اليوم اللي بعده برضو ماكنتش متواجد طول اليوم
فوجئت الصبح بعد يوم بالموضوع اللي المنشاوي نزله و اللي ماينفعش نهائيا و مالوش اي مبرر سواء اخلاقي او ديني او اي حاجه كانت
و فعلا عيب يا منشاوي انت صغرت نفسك جدا بالحركة دي
و بقى استحالة اننا نعدي موضوع زي كدا لان دا مش ضر ميرو بس دا ضر المنتدى ككل و فيها اهانة لينا كادارة و الضرر الأكبر كان في نظرة الأعضاء اليك و بالتالي فتواجدك مره اخرى بقى من المستحيلات
لأن الاول كان الموضوع بينكم في رسائل خاصة و ماكنش وصل للمستوى دا (كل واحد فيكم بيشتم في نفسه) و غضبان من موقف . يعني لو كنت هاخد موقف كان المفروض تتشالوا انتوا الاتنين , بس عشان مش عايز اخسركم فبصبر شوية و بشوف ايه اللي ممكن نعمله عشان الاشكالية يتم حلها بهدوء

لكن بعد موضوعك . خلاص كدا انتهى يا منشاوي
و كرد اعتبار للراجل اللي مش كتب زي ما كتبت انت في المنتدى و ادام الناس اكتفينا بحظرك انت بس مع تنبيه اخير لميرو

بس عارف يا منشاوي ..كان غريب جدا انك كنت بتتفاخر بالكلام اللي كتبته في الموضوع و اللي لا بيقدم و لا بيأخر
عارف لما تسمع سواقين ميكروباصات بيتخانقوا بشتايم قبيحه و بيسبوا بعض ..بتحس ان السواق دا جامد ؟ و لا بتحس انه شخص منحط و بيسقط من نظرك ؟
فكر في السؤال يا منشاوي لأن صدقني مافيش حاجه هترفع مكانتك غير الاخلاق

أنا عارف انك هتزعل مني . بس بأمانة و بكلمة حق : انت ايه اللي تقدر توصف بيه الموضوع اللي انت كتبته ؟

و عامة بتمنالك التوفيق في حياتك و دي هي أهم حاجه ..المنتدى لا هيقدم و لا هيأخر
ماكنتش أتمنى ان النهاية تكون كدا بس انت اللي قررتها

و ربنا يهدينا جميعا..