 ممكن افضفض معاك شوية ؟؟
 .
.
.
ترررررن.. تررررررن ... ترررررن ( جرس تليفون )
هو انا بحلم ولا ده صوت التليفون ترررررن ترررررررن .. ايوة التليفون
هي الساعه كام ؟ ( انا متسائلة ) يااه الساعه 9:30 الصبح ........ تررررررررررن ترررررررررن
ده مين الرخم ده اللى صحانى من احلى نومة ؟!!
تررررررررررررن ترررررررررررن .. ( مفيش فايدة مضطرة أرد )
-ألو ..
-ألو ( صوت سيدة منخفض النبرة ، من صوتها استنتجت انها مش اقل من 30 سنه)
-ايوة مين معايا ؟؟
-معلش لو كنت ازعجتك .. هو انا صحيتك من النوم ولا حاجة
-( احااول ان اتمالك أعصابي ) لا ابدا مفيش حاجة .. ممكن اعرف عايزة مين ؟
-ممم انا ضربت نمره عشوائية .. محتاجة حد اتكلم معاه .. ممكن اتكلم معاكي شوية
تنبهت أمي لصوتي فى المكالمة
فأشارت لي من بعيد ( بتكلمي مين ؟؟)
مطيت شفتاي استنكارا ( مش عارفة )
-انتى بتكلمي حد ( قالت السيدة المجهولة )
-ا ه دى ماما
-ممكن بقى اتكلم معاكي لو فاضية
-( صمت مني بعدها ... قفلت فى وشها السكة ) !!!
بصراحة معرفتش أرد عليها متعودتش اتكلم مع حد غريب قبل كده فى التليفون
توجهت إلى غرفتي محاولة لاستكمال نومي ..
-مين يا نورا ؟
- ( شكلي مش هعرف انام تاني ) دي واحدة كده يا ماما معرفش مين ، كانت بتقولى انها ضربت اى رقم وعايزة ترغي معايا
-(علامات تعجب على وجه أمي) !!!!!!!!
-والله أنا استغربت زيك كده يا ماما ومعرفتش أرد فقفلت في وشها السكة !!
بعدها بكام أسبوع ...
ترررررررررررررررن ترررررررررررررررن ترررررررررررررن ( جرس تليفون )
بس المرادي اختى الصغيرة اللى ردت ، كنت قاعدة في الاوضة التانية ومش سامعه المكالمة
اختى : نورهان ، في واحدة غريبة بتقول عاوزة تكلمنى ومش عارفة أقولها ايه
انا : ( معقول تكون اللى فى بالى !! ) طيب روحي انتى أنا هرد عليها
-ألو
-ألو ، أنا ضربت اى نمرة ومحتاجة اتكلم معاكي
-انتى تانى ؟؟! ( المرادي كان رد فعلى مختلف شوية ) لأ انا آسفة ، مش فاضية اتكلم
قفلت فى وشها .. للمرة التانية !!
شكلها كده نفس الست اياها ( افكر بصوت عالى )
اختي : هى مين دى يا نورهان
أنا : مش عارفة والله .. ست غريبة فعلا !!
طبعا حدث زي ده قعدت افكر فيه مع نفسي مية مرة فيه
هل الست دى كانت محتجانى فعلا ؟؟
وايه اللى دفعها انها تلجأ لشخص متعرفوش عشان تفضفضله ؟؟
يا تري فى حد تانى اتصلت بيه ؟؟ وسمعها.. ولا قفل فى وشها السكة ؟؟
هو انا كان رد فعلى قاسي فعلا ؟ ولا ده اللى المفروض كنت اعمله ؟؟ !!
والأعجب انها نفس الست !! هى محرمتش من المره اللى فاتت ولا ايه؟
وغيرها من الأسئلة اللى لفت دماغي ، ومش لاقيالها اجابة مقنعه
انا مش عشاق برنامج أسامة منير (أنا والنجوم وهواك ) على إذاعة نجوم إف إم برنامج جميل فعلا و المقدم أجمل( أسامة منير) بيحاول يبحث حلول لمشاكل الناس الاجتماعية .. طبعا غني عن التعريف ..
بس ساعات أسأل نفسي ازاى ممكن الناس تتصل بواحد متعرفوش وتحكيله عن مشاكلها ؟، اللى غالبا بتكون خاصة جدا ، ويسمعها ناس كتير على الراديو
هل ممكن لو الدنيا ضاقت بيا ومش لاقيه حد افضفضله .. ممكن ارفع السماعه واضرب نمرة عشوائية اكلمه واحكيله على اللى جوايا
ولا هيقفل فى وشي السكة ، ومش بعيد ......... !!!!!!
،،،
وده برضه هيفتح قضية مهمة جدا
المعاكسات ..
بس مش معاكسات الشوارع اللى متعودين عليها و التليفزيون قارفنا بيها ، لكن معاكسات التليفون اللى من زمان الواحد بيعانى منها وللأسف الاعلام مش بلاقيه بيتكلم عنها إلا نادرا
طبعا كلنا غلطنا وضربنا نمرة غلط .. ممكن بالقصد وممكن من غير قصد بيبقى عاوز ايه اللى بيعاكس ده ؟؟
يسمعله كلمتين حلوين << ويا مكتر الكلام الحلو !!!!! :vb19:
ليه يعرض نفسه للإهانه والشتم والسب
هل الفراغ ممكن يوصل الواحد انه يعاكس نمرة ، ويسمع شتايم واهانات ومع ذلك بيبقي مستمتع بسماعها !!
اعتبر هذا الموضوع بداية مني لفك عقدة اللسان عندي
عاوزة منكم بقى حاجتين
أولا اسمع رأيكم فى الموضوع اللى اتكلمت فيه
ثانيا تقييمكم لأسلوبي
ودي واحترامي ,,,
.
.
.
|