ربنا دايما عنده وسائل كتير وطرق يوصلنا صوته بيها
بس المشكله دايما فى قدرتنا احنا على الاستماع واتباع صوته
كتير بنمر بمواقف بنحس فيها اننا لوحدنا رغم اننا عمرنا ماكنا او هنكون وحدنا
لانه دايما بيراعنا وبيسمع لنا بس المشكله اننا دايما عايزين شئ ملموس او مادى علشان نحس بحبه لينا
يعنى مثلا انا وقعت فى مشكله لازم ربنا ينقذنى منها علشان احس بوجوده جانبى
ليه منفكرش فى مره ان ربنا بيعاملنا اننا بشر وناضجين ولازم نلاقى حل للمشكله دى وكمان نتعلم درس منها
ليه دايما نختار ونبقى عايزين الطريق السهل وهو ان ربنا بيحبنى وربنا قوى اذا لازم هو يحللى مشكلتى
وده مش صح ربنا من حبه لينا عايزنا احنا كمان نكون اقويا ونقدر نحل مشاكلنا
وهو دايما هيكون معاانا يسندنا ويرشدنا بس لازم الاول نمرن نفسنا ازاى نسمع صوت ربنا نقى وغير مشوش بافكار العالم
والاهم من ده كله ازاى نبتدى نعمل علاقه خاصه بينا وبين ربنا
واول طريقه لبدايه العلاقه دى الصلاه
الصلاه مش مجرد فرض بعمله علشان اكسب نقطه زياده فى دفتر اعمال السنه بتاعى لا
الصلاه هى جلسه سريه بينى وبين ربنا هى اجتماع بكون فيه على طبيعتى من غير لا تصنع او تحفظ
الصلاه بكون فيها انا بس اللى بتكلم بس لازم يكون عندى الثقه الكامله ان صوتى مسموع
الصلاه هى الوقت اللى برمى العالم كله ورايا واقوله عندى اللى اهم منك دلوقتى ليا ميعاد مع ربنا
والجميل كمان ان فى اى وقت ممكن اخبط على باب ربنا واقوله اسمحلى محتاج اتكلم معاك
وهتلاقى بابه دايما مفتوح لا هيقولك مش فاضى او مش وقته
وقتها بس هتحس قد ايه انت انسان مميز عند ربنا وهتحس بمحبته ليك
وهتلاقى تلقائى قلبك اتملى سلام وطمأنينه
وابتدت رؤيتك للامور توضح والتشويش اللى كان حاجز بينك وبين مشكلتك زال
وده كله لانك عملت علاقه خاصه بينك وبين ربنا ومنها استمديت امانك وسلامك النفسى
اللى بيضعك فى موقع القوه مهما كان حجم المشكله انت خلاص بقيت قوى لان بقى عندك يقين انك مسنود
انك مسموع انك مش لوحدك
الصلاه غذاء روحى لازم كلنا نتمسك بيه
وميبقاش مجرد فرض او واجب
لان ربنا مش محتاج مننا اننا نصلى بالعكس تماما
احنا اللى محتاجين اننا نصلى علشان ربنا يسمعنا
ربنا يبارك حياتكم ويملاها بسلامه ومحبته