من البدايه وأنا معارضه لسياسه الآخوان
يمكن أكتر حاجه خنقت الناس منهم هى سياسه الاستحواذ والتكويش
كمان الاختيار السئ>> كان د / مرسي حاطط كوادر البلد على جنب وعاطي أماكن لناس مايفهموش فيها
بس لمجرد انهم أخوان
يمكن دي اول وأكتر حاجه خلت الناس تنفجر وماتستناش الـ 4 سنين يعدو
ولما ظهرت حمله تمرد لجمع تواقيع لاسقاط النظام انا رفضت أوقع
رغم قناعتى التامه بضعفهم وعدم قدرتهم على اداره البلد
بس فعلا رفضت أوقع على استماره تمرد
ولما الناس نزلت الشوارع وطلع وزير الدفاع بيان بيعطي مهله للحكومه
فرحت بنبره البيان وقولت يمكن د/ محمد مرسي يتراجع ويجمع الناس ويصلح الشروخ اللى حصلت بينه وبينهم
بس مالقتش اى اجراء أخده د/ مرسي
ولآ حتى فكر يُقيل رئيس حكومته اللى الناس مش طايقاه لضعفه فى اداره البلد
ولآ طلع بكلمه على الناس يهديهم وكرر سيناريو مبارك لما ساب الشعب ف الشوارع ومفكرش
يقولهم انتو بتعملو ايه الا بعد ايام !!
هنا بقى قولت أى حاجه يعملها السيسي انا موافقاه فيها
ولو عزل مرسي يبقى راجل وطني وبيحب الشعب لانه هينحاز مع رغبه الشعب
وفعلا عزله والناس انبسطت وانا منهم >
بس عشان يتقتل أى انسان مصري [ إخوانى كان أو ليبرالي أو مسيحي ] فده اللى يوجعني ويوجع قلب أى مصري
ممكن اختلف مع الآخوان فى سياسيتهم لكن عشان تنزل نقطه دم واحده من حد فيهم ,, فده لآء أرفضه وبشده
حتى لو هو أخطأ
فيه حاجه اسمها قانون واللى غلط يتسجن ويتعدم كمان لو ثبت انه قتل نفس
لكن الناس اللى بتموت كل يوم دول وفى شهر كريم
اذا كانو من الاخوان او من الشرطه والجيش>> كل يوم قتلى وشهداء
حرام
والله اللى بيحصل فى مصر ده حرام !
وحاجه تدمى القلوب
ارحمنا يارب وألطف بنا ~
|