[عبدالحميد ايوب]

امشي يا وحش ودوس
متخفش م الحرافيش
حقق ارادة الشعب
وطحفش الخفافيش
وعشان ميحلا اللعب
لابد م التحابيش
واللي يعدي البحر
ميخافشي م الطراطيش
************
كان فيه فتوة عسل
في حارة م الحارات
السبحة دايما ف ايده
ف البوظة والحانات
العدل كان مبدؤه
ولا عمره خد اتاوات
بس الكلام الكتير
ملي عقله بالحكايات
****************
ف يوم صحي م النوم
قال نفسي ابقي رئيس
ركب حماره المصفح
وزود المتاريس
ونادي ع الواد زناتي
ابن الخديوي خميس
وقاله قوم هات فؤاده
تنزف علي عتريس
****************
فؤاده ست النسا
تبقي مرات موسي
وياما قالوا عليها
دي شابه محروسة
هو جواز الفتوة
غير جواز الناس
ولا الشرف يااا بشر
بقي فيه كمان كوسة
***************
اعجب ما في الحكاية
المطبلاتيه
قالولوا ابسط يا عم
دي فؤادة بلطية
انت الوحيد اللي تقدر
تلاعبها ف الميه
ضحك الفتوة وقال
اللعب ده شغلتي والملاغية
****************
بس العجيب ف الامر
خدوا موسي ع الدوار
قالولوا اكتب تنازل
انت اللي سبت الدار
موسي قال للفتوة
ف وشه انت حمار
عاملي راجل يا كلب
وانت زي الفار
***************
بص الفتوة بغيظ
وقالوا بكرة تشوف
انا وانت راجل لراجل
واللعب ع المكشوف
قال للغفير اضربه
مات الغفير م الخوف
اجر شوية كلاب
و راحولا بالمولوتوف
**************
قتلوا قرايبه وحبايبه
وطلعت الاخبار
موسي قتل ف قرايبه
حرق الخيام بالنار
لابد من حرق موسي
القاتل الجزار
قتل القرايب حرااااااام
قتل القرايب عار
****************
اهل البلد مقسومين
والرك ع الاعلام
فيه ناس مع موسي
واقفين معاه بنظام
وناس علي موسي
بتنادي بالاعدام
بقت البلد نصين
والرك ع الافهام
****************
لسه النهايه بعيد
معرفشي ايه هيه
وفؤاده حتروح فين
وسط التملية
لعبة مصالح وحطه
الكل في الخية
كل الكلام اللي فات
انا شفته بعنيه
*********
تبقي الحكاية حكايتي
دي حكاية مصرية