[™Amiliya]

اليوم اولى حلقات فسحة سماوية ومعي ضيفة لها من الكوكب الارضي والحياة شيئا مختلفا تراه من تعاملك معها وتقرأه بين سطورها ولها من اسمها نصيب متمكنة وجدية ولديها كريزما مختلفة تماما ضيفتي اهلا بك .... معايا اهلا بيكى ايمى واشكرك على الدعوة الجميله 1- بداية وقبل اي شيء ماهو التفاؤل من وجهة نظرك ؟ وماذا يعني لحياتك؟ التفاؤل هو الامل فى بكره يكون احلى هوا الارادة اللى بتدى طاقه داخليه تقدرى بيها تعدى اى صعاب والتفاؤل بالنسبه ليا محور حياتى واهم عنصر ممكن اعيش عليه رغم اوقات كتير بكون حزينه او فاقدة الامل لكن لسه التفاؤل موجود 2- للنفس ابواب وطرقات لابد ان نسلكها في الحياة سمي لي ابواب نفسك التي تأخذك دائما وتحرصين على فتحها واغلاق غيرها؟ الحديث مع النفس ومواجتها دائما بكل العيوب والثغرات اهم حاجه بتعمل توازن نفسي وتقدر بيها تتخطى اى مشكله ده غير الايمان بالله وجعل الصله بيه دائما متينه وغير متقطعه حتى نقى النفس من شرورها وهفواتها احيانا بقدر اقفل ابواب بتكون ليها تأثير سلبى عليا مش هروب لكنه سد منافذ الطاقه السلبيه لحين الاستعداد ليه 3- الكتابة والحروف وافكار الاخرين تبعث في النفس بعض من الذبذبات اي الكتابات تستهويكي وتشعرك ان الدنيا بخير؟ أنا بميل غالبا للكتابه الهادفه اللى بتقدم معلومه او تقوى مبادىء وتصحى قيم جوانا ده غير الاشعار والخواطر والقصص الرومانسيه بتكون فسحه نفسيه رائعه كل الانواع دى بتشعرنى ان لسه فيه تفاؤل وأمل والدنيا لسه بخير ونقيه 4- هل تخافين الموت ام الحياة بين البشر؟ وماذا يعني لك القبر حين تغمضين عينيكي؟ أخاف موت من احبهم لكن لااخشاه على نفسي احيانا الحياة وسط خداع أوزيف اسوأ من الموت وخوفى من تلك الحياة يترجم الى حرص وعزلة القبر هو الحقيقه التى لاتحتمل اى خيال او غش مواجهه مع نفسك وعملك وحصاد سنين عمرك 5- مقولة قراتها ذات مرة تقول ( لا تتنازلو عن الاصدقاء السعداء فالسعادة عدوة ) ويقال ( ان كان لك صديق يعشق المطر فتمسك به) مارايك؟ فعلا السعادة عدوى والصديق له تأثير على صديقه أكثر من تأثيره على نفسه بيقدر ينتشله من احزانه ويدخله عالمه السعيد الا اذا غلبته الوحده وابتعد مابيفيده اصدقاؤه بشىء 6- للالوان تاثير مباشر وغير مباشر ع مزاجياتنا الخاصة والعامة اين تقفي بين الالوان وماتاثيرها ع نفسك؟ فعلا الالوان بتأثر فى النفس بشكل كبير وبترجم داخلنا على حسب اختيارنا هاتلاقى الحزين بيميل للالوان القاتمه الخاليه من اى رسمات على العكس تلاقى الوان التفاؤل كلها بهجه وفاتحه ورسماتها بتوحى بالسعادة انا من النوع اللى بيختار الوانه على حسب موده وحالته 7- للاماكن اصداء وذكريات لا تمحو من ذاكرتنا بسهولة وتبقى هناك اشارة ترجعنا حيث كنا يوما ما ( ماذا تعني لك الاماكن عند الفرح وعند الحزن اين تأخذك) الاماكن بتترجم عندى لاشخاص كل منهم ترك بصمة وذكرى داخلى مهما اختفى بيظل اثره وتأثيره فى المكان بيكون علامة لوجوده برغم اختفاء جسدة نفس الشىء فى الفرح ماينفعش افصل بين الحدث والمكان والشخص اللى شاركنى الحدث ده فبترجع بيا الذكرى ليهم حتى الروائح بيكون عبيرها موجود رابط نفسى او روحى احتمال كبير 8- لماذا يخبروننا ان الانسان يشبه الطقس ؟ ولماذا يؤثر في مزاج البعض الطقس ؟ وايهم اقرب لنفسك من فصول السنة ولماذا؟ الى حد كبير فيه ناس بيأثر فيهم الطقس وغالبا بيكونوامزاجى الطبع اكيد ليها سبب علمى حسب تاريخ ميلادة وتأثير درجة الحراة والطقس فيه وانا من الناس دول مودى بيختلف حسب الطقس والشتاء تأثيره سلبى جدا عليا عكس الخريف والربيع يمكن لرطوبه الجو وخوفى من المطر وقفل الشبابيك 9- للاحلام والامنيات الحظ الاكبر في تفاؤلنا بالحياة حين نرسمها او نؤجلها نبقى مدونين فيها وفي انتظار اكتمالها... مافيش حد بيقدر يعيش من غير حلم او امنيه نفسه يحققها ده الهدف اللى بيخلى لحياته معنى تظل الامنيات المؤجله ليها طعم وشوق مالوش مثيل واحيانا تحقيقها فى غير ميعادها بيفقدنا الفرحه بيها هل احلامك وامنياتك يعطيانك حق التفاؤل ام تجد ان مع الاحداث الحالية لا حلم يكتمل؟ اكيد الاحلام والامنيات بيكون ليها اثر فى التفاؤل لحين تحقيقها لكن الاحداث المؤلمه بتكون زى غيمة بتخفيها وتجعل الامل فى تحقيقها مفقود مؤقتا 10- لماذا يخاف الناس الضحك وهل فعلا الضحك قد يجلب الحزن بعده؟ التشاؤم اصبح سمة العصر كل يوم جريمه او كارثه بتخلينىا فى حاله ترقب بعد كل ابتسامة خوفا من توابعها المؤلمه 11- هل تستطيع التفريق بين دموع الفرح والحزن وايهم يبقى ولا ينتهي؟ انا جربت دموع الفرح مرتين احساس ماينفعش اوصفه اكيد رائع بيهز كل المشاعر وبيرتقى بالاحساس لاعلى مراتب الفرح ودى نادرا لما تحصل مع حد واكيد فيه فرق كبير بينها وبين دموع الحزن دى بتكرر كتير 12- لما يعتقد البعض ان التفاؤل مجرد ثرثرة فلاسفة وكتاب واطباء نفسيين هل لهذه الدرجة لا يقين لدينا؟ اعتقد ده سببه المشاكل والازمات اللى بنمر بيها بتقضى على اى امل وبتخلى الكلام عن التفاؤل مجرد فلسفه كتب واطباء لكن بالايمان والمواظبه على العبادة بنقدر نلمس ده فى الواقع 13- الخير من الله والشر من البشر وتفائلو بالخير تجدوه ( مارايك) طبعا الشر دايما بيكون سببه البشر وسلوكهم السىء وربنا قال انا عند ظن عبدى بى ان خيرا فخير وان شرا فشر وده دليل على ان التفاؤل ليه آثار ايجابيه كبيره جدا 14- هل تجديد الحياة وتغيرها مرتبط بالسعادة ؟ الروتين من اهم اسباب الملل والتشاؤم وكسر الروتين بالتجديد حتى لو بقدر بسيط بيأثر فى الحاله النفسيه وارتفاع مستوى السعادة 15- اين يقف سقف نظرتك للغد ؟ سقف نظرتى للغد الآن منخفض قليلا لايتعدى الامتار يمكن سؤالك جاى فى وقت وحاله نفسيه متأزمة الى حد ما 16- اختاري بين هذه الاشياء مايناسب شخصيتك ولماذا الغيم.المطر.الشمس الشمس بحب دفئها ونورها هى منبع العطاء والحياة البحر.الصحراء.الغابة البحر بحب جدا اشوفه اشم ريحته بحب شكل الموج وهوهادى وشكل المراكب والسفن من بعيد وهى معديه القلم.الكتاب.سماع موسيقى القلم والموسيقى مرتبطين ببعض معايا ودايما لما بكتب بكون بسمع موسيقى بتخلينى اركز اكترواعيش الحاله الخروج لتغير الجو.الاسترخاء في المنزل مش فى كل الاحوال بختار حاجه منهم اوقات الاسترخاء فى المنزل بيدى نفس النتيجة وخصوصا ان خروجى قليل لكن وقت الخروج ممكن تفرق بشكل كبير لو كان سفر الشروق.الغروب.الليل بحب الغروب وبيكون وقت فى منتهى الجمال برغم ان كتير بيتشائموا منه لكنه منظررائع 17- منة قبل 10 سنوات كيف كانت وكيف تتخيل نفسها بعد 20 سنة من الان؟اوصفيلي شكلا وروحا؟ اكيد كنت اصغر وخبرتى فى الدنيا ااقل بكتير طريقه لبسي كمان اتغيرت وعلاقاتى بالناس كانت مختلفه دلوقت اخدت شكل تانى ومحدود مكنتش مهتميه بالكتابه وهواياتى زى دلوقتى يمكن مكنش فيه وقت ليهم كنت بسافر كتير واشترى حاجات كتير ممكن مااستخدمهاش مش بعمل حساب لبكره عايشه كده حياتى يوميه زى ماتيجى كنت سعيدة اكتر بمراحل عن دلوقتى وعايشه زى الاطفال متخيله نفسي بعد 20سنه انى اكون جدة وقاعدة مستنيه احفادى يجوا يزورونى واحكى ليهم حواديت واكلهم زى ماكانت جدتى الله يرحمها بتعمل معايا شعرى ابيض ولابسه نضاره وتخينه شويه صغرين 18- اي مدينة تأسرك وتجعل منك شخصا اخر؟واي الناس تترك تثرا ايجابيا في حياتك؟ اكتر مدينه بتأثر فيا وتغير مودى تماما هى اسكندريه لدرجه انى برجع منها حد تانى خالص كمان والدى اكتر شخص تأثيره ايجابى عليا كل مره بكون معاه بيدينى جرعه تفاؤل وحماس انى اكمل حياتى وبكون سعيدة جدا بكلامه والحكايات اللى بيحكيها عشان يوصل حاجه او مبدأ 19- تذكرتين عبور للخيال وتذكرتين عبور للواقع اين ستكون تذاكرك؟ هاروح لعالم خيالى كنت وصفته مره يكون على هضبه مرتفعه فيه كوخ صغير وحواليه شجر وعلى شباكه ورد حياه برغم انها بدائيه لكن لم تلوثها يد البشر ونفوسهم اما تذاكر الواقع لو ماعرفتش اسافر تركيا هاقطعها وخلاص اخيرا هل انتي سعيدة...ام متفائلة....ام..... انا كل يوم بحاله يوم متفائله والتانى عكسه لكن يغلب عليا التفاؤل الحمد لله 20- اريدك الان ان تذهبي في فسحة سماوية من سيكون رفيقك روحيا وجسديا وفكريا ؟ انا الايام دى بتطوف حولى ارواح ذهبت وسبقتنا للسماء بتجيلى فى منامى واحيانا وقت الغفوة بحس بيهم واحكى معاهم يمكن حنين او افتقاد للحظات جميله جمعتنى بيهم اتمنى ترجع مش مهم اقول الاسماء او الصله لكن كفايه وصف الاحساس اللى ماقدر اللى قيد الحياه يعوضوة شكرا لروحك.. شكرا ايمى سعدت جدا بالاسئله والاستضافه / انا اسعد منه وتحياتي لروحك النقية انتظرونا وضيف اخر قريبا باذ الله تحياتي