هي الأيام لمّا بتخلص
بتروح على فين ؟ ..
مقصُدش نموت
أنا أقصد لمّا اليوم يعني
بيخْلَصْ و يفوت
و تعدِّي وراه أيام تانيين ..
و أما الأسبوع بيعَدّي أوام
و يقَفِّل سِت ايام بالطول
مع يوم بالعرض
بيروح على فين و يسيب الأرض ؟
طب فين المخزن و التخزين ؟ ..
معقوله تكون أيامنا هناك
مرصوصة فـ حبة كراتين ؟ ..
مليانة بـ إمبارِح و بـ أوِّل
و بـ أول أول و أنا راجع
لمّا أوصل سِن السَنَتين ؟ ..
طب هقدر أطَلّع م المخزن
إحساسي بنفسي و بالناس
و خناقي إمبارح في الزحمة
و أصالِح سواق الباص ؟
هل ممكن أزوِّد إخلاص
لعلاقتي بكُل إللي أعرفهُم
لسنين و سنين ؟
هل ممكن أدَوّر على فترة
ضاعت من سن العشرين ؟
هل ينفع أكتب رغباتي
و أختار أما أكبر و أستكبر
أنا هطلع مين ؟
هل يمكن لو ....
أو هل جايز ...
بل لا يُمكن ..
إننا نعرف
إزاي الأيام دي بتنقَص
و أما بتخلص
بتروح على فين !
رآقت لى ..
|