[الأميرة رودي]

النهارده كان يوم جميل برغم كان عندي صداع مؤرف بالليل
أول مره أخد مهدئات امبارح قبل ماأنام
كنت بعاني من تعب شديد ودور برد مصحوب بـ سخونيه مرتفعه لم أقابل مثله من قبل

لكن النهارده كان مختلف
من بدايه اليوم جاتلي والدت بنوته عندي تقولى انتى عملتى للبنت ايه معتش وراها سيره ف البيت الا أنتي
قبل معاد الدرس بساعتين الاقيها عاوزه تنزل وتجيلك
ضحكت و قولتلها هيا فعلا بتيجي بدرى جدا عن معادها وانا بزعقلها بس كل ماازعقلها هي تضحك
فعلا البنت دي كل مااعمل معاها كده والاقيها بتضحك ابقى عاوزه اضحك بس اكتم الضحكه

المهم مامتها قعدت عندي شويه نتكلم
بعدين قالتلى انا جيت اتعرف عليكي من كتر كلآمها عنك كان لآزم اعرفك
وهي عندها حق أنها تحبك
أحرجتني حقيقي بس أكيد انبسطت من كلآمها والثقه دي

=====

بعدها بشويه جه معاد الدرس.
برده صاحبتنا اياها جايه بدري ساعتين عن معادها
كنت انا وقتها بدي لـ مجموعه تانيه اكبر منها سنه

قولتلها اقعدي راجعي الـ unit عشان فيه exam
عدى الوقت وجه معادها لقيت حركه غريبه والبنات بيتوشوشو

حاولت اسمع هما بيقولو ايه معرفتش هههه
بس حسيت ان الكلام عليا اصلهم يتكلمو ويبصولى

بعدها جاتلي المتحدث الرسمى بتاعهم اللى هيا بتحبني دي
هي : كل سنه وأنتي طيبه وباستني
أنا : وانتى طيبه بس بمناسبه ايه ؟
هي : بمناسبه عيد الآم
اندهشت ..
فرحت وحزنت
فرحت لآن فيه طالبات حسيت انهم بناتي حقا فاكريني فى عيد الأم
وحزنت انهم فكروني انه زي الايام دي كنت بجهز هديتي لأمي
رديت المعايده وشكرتهم كلهم
كل واحده لواحدها
اتفاجئت بقى بكل واحده تقولى هديه عيد الأم هتكون المره الجايه يامِس

قولتلهم لالالا هديه ايه محدش يعمل كده
لكن العيال مصممين وزعلو كمان
منهم واحده بتقولى انا بعت لبابا مخصوص هو مسافر الامارات يبعتلي فلوس خاصه بيا عشان اجيبلك هديه كبيره

كنت عاوزه اقولهم هتجيبو ايه طيب
رحت مغيره وشي بقى وقولتلهم هنهزر كتير يلا عشان فيه exam
ومش معنى ان فيه هدايا ورشاوي يعني مش هنضرب
اللى هتقل درجه واحده هيكون فيه عقاب شديد
وبدأ الامتحان واديني بصحح فيه وشكلي انا اللى هدبس فى هدايا ليهم

المهم طلعنا من الموضوع ده ان كل بنوته هتجيبلي هديه المره الجايه
حاجه احراج فعلا
بس هما اللى عاوزين كده

يومياتي مع بنوتاتي ف الدروس بتاعتي جميله جدا
بيخرجوني كتير من مود مش حلو
هحكي أغلبها هنا لآني بشوف منهم حاجات تخليني اقول احنا مكناش أطفال

ومازلنا ننتظر الهدايا
دعواتكم تكون ثمينه