[™Amiliya]

لما بحس بالوحدة ادور في مكتبتي ع كتاب اقرأ نفسي فيه

مفيش حاجة في الدنيا تاخدني لعالم تاني غير ورق وكلمات وحروف واحساس صادق بين السطور

الوحدة مش مرض دا اتجاه تاني بنمشي فيه وسط زحمة الناس بنهرب من عيونهم
وتساؤلاتهم وجبروت قسوتهم علينا

في مننا الي بيختارها بنفسو ويكمل الحياة لوحدو

وفي مننا الي يُجبر عليها من الي حواليه بيتعمدو تهميشو فبيختار الطريقة الي يعبر بيها عن نفسو
ويخضع لرغباتهم ويستسلم لوحدتو

بس من اول ميتفتح الباب يهرب للناس يحاول يحضن ملامحهم في عنيه
عايزهم محتجلهم ميقدرش يعيش من غيرهم
ميقدرش يتنفس بحيريتو من غير هواهم الحياة مع الناس هي جنة الارض

اه في ناس الحياة معاهم جهنم الارض

بس في ناس بطيبة ملامحهم بتخلي النار جنة
وبتخلي حياتنا كلها الوان زي الطيف

المهم نختار منهم الي يخيلي حياتنا جنة وعذوبة وحياة

في حياتي

الجنة هي حضن اهلي .. كل الحياة هما وكل الضحكة هما
اه مرينا بظروف كتير حلوة ووحشة وفقدنا ناس ودخلو ناس حياتنا
وكبرت عيلتنا
بس مع كل وقت بيمر علينا بتتعمق علاقتنا سوا والقلب بيكبر بدقاتو
اكتر واكتر

العيلة لبعض الناس هي الجنة
وللبعض التاني هي النار
والبعض الاخير هي بين البين

بس مين يقدر يعيش من غير عيلة حواليه تكون هي مصدر ومحور حياتو
الحياة من غير عيلة هي بالظبط احساسك باليتم في عز وجود الناس

مين فينا مبيحلمش يكوّن عيلة ؟

ومين فينا مبيحلمش يكون هو والي بيختارو من الناس يخطط لوجود عيلة

ومين فينا مبيحلمش يكبر وتكبر معاه عيلتو الي كونها بنفسو


هي دي السعادة
عيلة بقلب واحد
=
جنة الله ع الارض

/

ايميليا الجنزوري