السلام عليكم
بصراحه الموضوع ده أنا كنت مُتردد أكتب الموضوع وعايز أكتبه من أكتر من تلت أو أربع أيام .. بس قولت لازم أتكلم فيه
أثناء تصفحي المنتدي ساقني الفضول إني أقلب فى بعض المواضيع القديمه .. ولقيت أعضاء مُميزين ومشرفين وإداريين سابقين بعدد كبير جداً ما شاء الله .. فيه منهم جزء صغير جداً متواجد حتي الآن وبيشارك وهم قله قليله ويتعدو على أصابع اليد .. ومنهم اللي بيدخل يبُص بصه ويخرج أو بيدخل ومش عايز يشارك .. وفيه منهم اللي مش بيدخل أصلاً
أنا مش عارف طبعاً ليه الناس دي بعدت أو إيه الأسباب "الله أعلم" .. بس برضو أكيد فيه ناس مننا يعرف ناس منهم وليه صله بيهم لحد دلوقتي أكيد ..
فأنا بقول هيحصل إيه لو كل واحد أو واحده ليهم صديق أو صديقه هنا ومبقوش بيدخلو يكلموهم ويرجعو تاني ويبقي المُنتدي فيه نشاط أكتر ؟؟
لأني لاحظت إن الأول النشاط والمسابقات والمواضيع كانت أكتر وأفضل .. وده مش تقليل من الموجودين والله بس أنا شايف إن كل ما العدد زاد فى المنتدي هيبقي تفاعُل أعلي ده من وجهة نظري بحكم تواجدي فى المنتديات من سنوات طويله
آسف لو ممكن بتكلم في حاجه متخصنيش بس أنا حبيت المكان هنا وحابب إنه يبقي أفضل ..
آسف على الإطاله وتحياتي للجميع
محمود