[مارد الغضب]

جي اقولك الوداع
يا حب ضاع
اصلي ناوي ع الرحيل
ناوي افرد الشراع
عن العيون اللي هويتهم
ناوي اغيب
ناوي اشارك شمس حبي
في المغيب
هو ايه اللي اخدتهِ
غير الخداع
مش بإيدي اننا نفضل حبايب
كل حاجة في الحياة
قسمة ونصيب
.
انا راحل
بس عايزك تفهميني
انت اجمل ما ف سنيني
ع الاقل
كنت مخلص لك انا
كنت عايش ليكي وحدك
كنت صاين حبنا
كنت محتاج حضن دافي
و انت كنتي بتبعديني
كنت احيانا بشوفك تضحكي
لما كنتي تعذبيني
و النهاردة الدور عليا
بس مش عايزك تخافي
انا قلبي
لسه صافي
راح اقولك شئ كمان
انا ياما كنت محتاج الحنان
وانتي كنت بتحضنيني
بس عمري ف يوم
محسيت بالامان
كنت حاسس انك انتي
بتخدعيني
بس حاولي تصدقيني
اني كنت سعيد معاكي
عمري ما فكرت يوم
اهجر هواكي
حتي وانت بتطعنيني
كنت مبسوط بالخديعة
كنت زي عجينة ف ايديكي
مطيعة
تعمليها اي حاجة
تفرديها...تشكليها
حاجة مش مفهومة عندي
كنت لعبة بتلعبيها
.
هي دي نهاية المطاف
انا عشت معاكي عمري علي الكفاف
بس نهر الحب اوشك ع الجفاف
بس نهر الحب
مشتاق للمصب