[ahmed 22]

أنك تخلق حالة جدل في المجتمع ده أسهل شئ ..
أنك تصنع حالة حب ده لمؤاخذة عند.. ... ايا كان مش موضوعنا
ماحدش يفهمني غلط
سؤال بسيط
حاليا .. أنت متخيل ايه اللي ممكن يجذب الناس ليك لو الخيارات كالتالي ؟؟؟
1 – أنك تغني في فيلم
2 – أنك تمثل في فيلم
3 – أنك تنتج فيلم
4 - أنك تشوف الفيلم

بدون تفكير الأجابة هي أنك تشوف الفيلم ... هي بغباء كدا
أنا لما اشوف الفيلم هطلع عين اللي بيغني واقوله يا زومبي
واللي بيمثل أسميه باسم أمه عاطول مافيش كلام
واشتم اللي بينتج الفيلم واقوله يا سبكي ... وده أكبر لقب سئ ممكن يأخده حد
واحتمال انقد نفسي واسمي نفسي كائن ثئيل ودي الحقيقة المطلقة
واهني نفسي أني بقيت في المستوي المنحط ده...

وبكدا أكون عملت حالة فقس في المنطقة اللي أنا عايش فيها وخرطت عليهم ..
وبالتالي الكائن المصري ما يقدرش يحصر نفسه في دور ابدا
لا لا لا لا
اانا لو ماعملتش كل الأدوار مع بعض مابقاش واخد الجنسية أبدا ...

لو ماعيشتش كل يوم في حياتي بدخل في حياة كل واحد معدي قدامي
وكل واحدة لمؤاخذة استغفر الله العظيم ماسكة في ايد جوزها .. مارتحش نفسيا
ايوة ما هو دي الجريمة الكاملة اللي مأخرانا عشروميت سنة ورا
انا أيش كان ضمني انه جوزها ما هو ممكن يكون مصاحبها
او هي مصاحباه ...تصدق الموضوع لغز
طب اسأل اخوها يمكن يعرف ..
او اسأل جوزها نفسه .. طب أنا بقول جوزها فممكن يكون جوزها
تصدق احتمال خطيبها وشايفله شوفة .. بس شاف ليه
مش مكفيه الانكيجيه .. شباب مالوش مبدأ
ما أنا لو ماعملتش فيها شارلوك هولمز أتعب
ودي حقيقة شباب متربي علي قناة سبيستون
وكان اقصي همومهم في الحياة أنهم يهربوا من المدرسة
عشان يشوفوا المحقق كونان .. بس كانت ايامه حلوة المحقق كونان
مش عارف كبر ولا لسا ..

بس هو السؤال .. انت ايش حشر اهلك ؟
بس بستفسر بس ليس الا ...
وانت يعني لما تاخد 70 من المية من تفكير اهلك كل يوم تشغله فمين
ماشي مع مين ومين متخانق مع مين فاكر هتوصل للي أنت عاوزه
وفي الأخر ترمي فشلك علي الناس كلها الا أنت ....

تصدق أنت أصلا ماتستاهلش النصيحة
ولا هتطلع سلمة ولا حتي هتبقي موظف درجة خامسة مع مدام اعتماد
ايوة اللي بتحشي كوسة في التأمينات اللي عايشة في الدور الرابع شقة رقم خمس ..
ابنها اسم ابراهيم ... اه ابراهيم ده حبيبي .. يا تري عامل ايه ..
ويا تري لسا مصاحب هدير بنت صاحب محطة الشرب اللي في القطامية ..
يلا ان الله حليم ستار ربنا يتوب عليهم
اهو داخل في مشروع جواز ان شاء الله ...
مالناش غير أن احنا ندعيله في ظهر الغيب .. واهم حاجة مانفضحهوش
فهمت يعني ايه ماتتحشرش في اللي مالكش فيه ..
خدني قدوة كدا ... عقبالكم جميعا كدا زي ابراهيم ابن طنط اعتماد ...

مش عارف ساعات بحس ان احنا شعب لا ينفع ينصح ولا يتنصح
اه والله ...