[ahmed 22]

والله أنا واحد من الناس شايف
ان الرجل ده يعتبر مرتضي منصور بتاع امريكا
يعني ظاهرة صوتية محب للظهور ... هايف يعني
و90 في المية من تصريحاته اللي قالها قبل الانتخابات
سواء ضد العرب ولا حتي المكسيك وغيره
هيتفاجأ بتشريعات واتفاقيات تمنع اي تصرف ليه ..
وامريكا ماتقدرش تخل بيها .. والا فقدت ثقة المستثمرين وغيره
هو يعني اكيد مش داخل يلعب في تيكية ابوه
وبرضه هيلتزم في اوقات كتير بالكونجرس والاطار العام للحكم

شايف انه بالنسبة للعرب خيار افضل من كلينتون
لأن هيلاري كانت هتسير علي نفس منوال اللي قبلها
انما هو شخصية غير متوقعة .. ماتقدرش تخمن هو هيعمل ايه
ومالوش حسابات كتير ..
وماكنش ليه حراك سياسي قبل كدا

بس اللي عاجبني ان الرجل قدر يفهم عقلية المواطن الأمريكي
بمعني اللي احنا لازم نفهمه ان الشعب نفسه عنده تراكمات مشاكل
وفساد كتير ... الاعلام يمكن مش مصوره لينا علي الرغم
انه كله بيقول امريكا اعظم اقتصاد ودولة
والمواطن هناك شايف انه تنفيذ مطالبه الحياتية
أكبر من انه يتقال عليه بلد الحريات

يعني اللي لازم نفهمه انه اختيارات الامريكان لترامب
عالرغم من تصريحاته اللي كله بيقول عليها عنصرية
مؤشر لازم نقف عنده .. وهو أنهم شايفين كونهم ان العالم بينظر
لأمريكا كبلد الحريات والفرص حمل بقا تقيل عليهم
يعني اللاتينين والافارقة والهنود المهاجرين وغيرهم
بقوا حمل علي لمواطن المولود هناك .. وبياخد من فرصهم وحياتهم .

وشايف الموضوع لصالحنا مش ضدنا ...
بمعني أنك تختار واحد بيقول عليه الناس مجنون
معناه أنك كمواطن امريكي سئمت من توجه الرؤساء للمشاكل الخارجية
والحروب والقواعد وغيره وأنك تبعت الجنود يتقتلوا في حملات وغيره..
ونسيت مشاكلك الداخلية وده اللي غالبا هما مفتقدينه اكتر
انهم يقفلوا علي نفسهم شوية ...

هو بس هيكون بوء كبير في الاعلام ..
يعني واحد بينقد ان امريكا صرفت مليارات علي الحروب
وبيتهم اوباما وبوش انهم هما اللي صنعوا تنظيم داعش
وان امريكا مابقتش عظيمة بسبب التصرفات دي
وان السعودية ودول الخليج لازم تدفعلهم فلوس مقابل الحماية الامريكية ليهم
هيدخل يعمل زيهم يعني .. اكيد ليه حسبة مختلفة
والعرب هيكون ليهم اتجاهات مختلفة .. وتحالفات مختلفة
واحنا كمصر بدأنا تحالفات مع الصين وروسيا مسبقا

انا عن نفسي متفائل بالرجل ده ..