[الأميرة رودي]

السلام عليكم

صباح الخير يابنات و /شباب

مين فينا مش بيدخل فيس ولو ويتابع أخبار الدنيا يوميا
اكيد كلنا او اغلبنا
لاحظت فى بعض التعليقات كميه هجوم على البنات حاليا وشكوك من الشباب بل ويقين أنه معتش بنت مستقيمه ومفيش بنت إلا وخاينه لأهلها ولثقتهم فيها
.
انا عن نفسي بزعل م النظره التشاؤميه دي بس لما بفكر شويه بلاقي أن عذر الناس اللى بتتكلم دي انهم شايفين جرأة زياده وغير مألوفة

انا بسمع ألفاظ بعض البنات بتقولها الألفاظ دي لما كنت اسمعها من شاب كنت ب اشمئز منه واقرف من أسلوبه
طيب لما تيجي بنت وتستخدم نفس المصطلحات دي يبقى ايه الحل؟
بدون ذكر المصطلحات بس دى بتكون سبب أنها تدي انطباع للشاب انها بنت معندهاش حياء
طبعا الكلام ده مش تعميم على كل البنات لأنه فيه بنات كتير بردة محتفظه بحياءها ورونقها كأنثى اذا كان فى طريقة لبسها أو مشيتها فى الشارع أو أسلوبها بس احنا فى مجتمع السيئه فيه بتعم والحسنه تخص.

انا افتكر وانا فى ثانوية عامة كنا بنروح دروس ونخرج كتير وكده ومع ذلك لو حاجه حصلت تضحكنا فى الشارع واحنا ماشيين مع بعض كنا نخبي وشنا بالكتاب أو الأجندة علشان محدش يشوفنا بنضحك ..

دالوقتى انا بتكسف للبنات سلف والله من اللى بشوفه من لبس أوفر وضحك عالي والاقي بنت واقفه تظبط هدومها فى الشارع
طب ازاى يعني ؟

مش هطول عليكم عشان ماتنموش مني

ايه رأيكم فى الظاهرة من وجهه نظركم دي حريه شخصيه ولا تصرفات دخيلة علينا؟؟

من حقنا نناقشها ونشوف أسباب الانفتاح الزايد دة ولا كل واحد يخليه فى نفسه

البنات اللى بالشكل ده اكيد ليهم أخوات شباب... ايه اللى يخليك تسيب اختك تتصرف كده وفى نفس الوقت تروح تفتح فيس وتشتم فى البنت الجريئه؟؟؟ شيزوفرينيا دي ولا مش شيزوفرينيا يامتعلمين..

ناقشوني