الاسم : د/عبد الله
اليوم : 29/9
الساعه : 8:15
الموضوع : نقاب ولا عذاب
التعليق :
النقاب مختلف فيه ما بين انه فرض أو سنة
وكل فريق ليه أدلته
ومن الناس اللي قالو ان النقاب مش فرض الشيخ الألباني
في كتابه جلباب المرأة المسلمة في الكتاب والسنة.
وكل واحدة ليها الحق تاخد برأي من الاتنين.
لكن اللي مفيش خلاف عليه هو مواصفات لباس المرأة
واللي لازم يكون فضفاض لا يصف ولا يشف ويستر الجسم كله...الخ
فستر الجسم ما عدا الوجه والكفين هو الفرض اللي مفيهوش خلاف
أحيانا بنشوف واحدة لابسة نقاب ولبسها ضيق إلى حد ما
ده غالبا بيكون لجهلها بمواصفات اللبس اللي المفروض تحافظ عليه
وفيه اللي بتبقى لابسة نقاب ولبسها وتصرفاتها غريبة
هنا غالبا النقاب مش تدين وله أسباب تانية
زي ان فيه حاجة ف وشها عايزة تداريها
أو مش عايزة حد يعرفها...أو غيره
مش شايف فرق بينها وبين اللي لابسة طرحة مغطية شعرها
وبنطلون جينز مبين كل تفاصيل جسمها
غير ان الطرحة بقت تتلبس كعادة فقط فبيكون الانكار عليها أقل
من المنتقبة اللي الناس بتبصلها على انها حاجة تانية.
والحقيقة ان المنتقبة زيها زي غيرها ممكن تغلط عن جهل او عن عمد
وكل انسان هيتحاسب على تصرفاته وهو حر ف اختياره.
فمش لازم بقى نقول دي منتقبة وازاي تعمل كده
أو دي منتقبة فتبقى أفضل من غيرها
التصرفات والاخلاق هي اللي بقت تحكم
فبلاش نبني أحكام بناء على المظاهر وبس
|