[ahmed 22]

الواحد في وقت ما كان بيستمتع باللي بيعمله
سواء في بداية أنك في شغلك مثلا لسا بتخرج منه كل يوم بجديد
او أنك لسا كنت بتختبر حياتك بره برواز الدراسة وبتشوف كل يوم
قرارات جديدة بتقوم بيها متخيل انها بتظهر استقلاليتك بنفسك
بس كل يوم كان سريع مع سرعة استقلالك بقرارك وحياتك .. سريع لدرجة تخوف ..
لدرجة ان الواحد حس انه اتسرق من عمره ايام مش فاكرها
لأن مع كل تجربة جديد بتكتسبها بتفقد شئ كنت متعلق بيه من غير ما تحس
كل يوم جزء من ذاكرتك بيتسقط وبيحل مكانها جزء من الروتين
حتي معرفتك السابقة وثقافتك العامة لبديهيات ممكن واحد في اولي اعدادي يعرفها
بتستبدلها باشياء عملية بتفيدك عشان تكون نفسك ماديا بس بتفقد كل شئ معنوي
بيكونك او بيمثلك او بيحدد شغفك للحياة ...
ممكن دايرة الحياة دي طبيعية وبيمر بيها 80% من البشر
بس لما تفكر فيها تلاقيها صعب أنك تتقبلها لما تنتبه للي فقدته
بتحس انك استبدلت ما هو اقيم بما هو اتعس ..
استبدلت كيانك الشخصي اللي بيأمل في بكرة
بأفكار تخلي كيانك العملي مش تاعبه غير بكرة

كل يوم ممممم
حتي الكتابة اللي كانت بتمثل شغف بالنسبة للواحد
الواحد بيستشعر ان متعتها كانت بسبب الناس اللي كانت بتشاركك فيها
في وقت ما وفي حدث ما وفي فترة بعينها ظهرتوا فيها مع بعض
وكنتوا بتمثلوا حافز فيها لبعض .. مافيش حواجز كيبرة ولا فوارق كتيرة
كانت الحياة اسهل لأن أفكارنا قريبة من بعض ولو فيها اختلاف
فيه مباشرة في الكلام .. مافيش تزويق كتير ..
كل واحد وليه طريقته .. مش كله باهت علي بعضه
بحيث لما حد يحاول يبقي مختلف يحس انه غريب

يمكن وقتها عشان كنا لسا صغيرين .. يمكن كانت التلقائية بتقودنا أكتر
يمكن ماكنش فيه اللي يمنعنا انه نكون اقرب ..
يمكن عشان الناس متفهماك ومتفهمهم اكتر ..
يمكن متعة البدايات لشئ انت ماكنتش بتألفه ..
يمكن حاجات كتيرة


تحس ان النضج احيانا بيخلينا نتصنع شئ مش لينا
او يمكن بحكم التجارب اللي انتجت قلة ثقة في الناس
بتخلي البشر اكثر حرص من بعض عشان سوء الظن والنميمة
بقوا عملة المجتمع بتاعنا ... الناس تحسها بقت معقدة
وفي الآخر يشتكوا من الملل والروتين اللي هما جزء منه ..

كل يوم الواحد بيحاول يفتكس في اللي مالوش فيه
عشان يبحث عن متعة المحاولة في أنه يبحث عن الجديد
مش عشان يتقنه او يتفلسف فيه
بس عشان يستمر انه يبقي علي الحافز اللي
بأمل من وراه تحقيق ما اتمناه في يوم ما ..