[دمعه حائره]

امبارح فتحت اللاب توب عشان اجيب منه صوره
وبعدين ايه فتحت الفلاشه اللي عليها المواضيع بتاعتي
ماهو انا من بعد الحاجه ماتمسحت من كام سنه
اتعلمت وبقيت احطها علي فلاشه
شوفت ايه بقي شوفت صور وألقاب واوسمه وشهادات كنت كسبتها
رجعتني سنين طويله وذكريات حلوه
ولقيت مواضيع قصص وخواطر ومقالات وخزعبلات منزلتهاش لسه ومش فاكره ليه
هو فيه فتره كده حوالي سنتين نسيت كل حاجه فيها
وبقيت اكتب لايف كده علي طول وانشر
الحاجات اللي لقيتها دي فيها مشكله
ان لو نشرتها معرفش هتكون مناسبه للوقت ولا لأ
وطريقه كتابتي اتغيرت كتير عن الاول كنت زمان بركز علي الفصحى
والمواضيع كانت طويله دلوقت بقيت اختصر اوي متهيألي القدره علي الكتابه قلت
محتاره اعمل ايه وملوش لازمه يفضلوا كده مينزلوش وملوش لازمه بردوا يظهروا
بس احتمال كبير بمناسبه المسابقات اختار منهم
لان مينفعش بالمستوي ده اللي انا فيه ده ادخل مسابقه
ف متستغربوش لو لقيتوا المواضيع متقلبه المزاج او متناقضه هي اصلا من زمان
وكل سنه وانتم طيبين عام هجري سعيد عليكم