مد إيدك خد كمان
خدلك ضريبة من الجعان
واللي عيان من زمان
واللى ساكت واللى شاكى همه للجيران
خدلك ضريبة مـ اللى رايح واللى راجع
واللى صابر ع المواجع
مد إيدك فـ الجيوب
هتلاقى إيه غير..هم واصل للقلوب
وكام رقعه يدارى فيها مـ العيوب
مد إيدك خد إتاوة
من شعب مستنى العلاوة
تلاتين جنية...!!
يعملوا إيه دة انت يا بية
بتحرقهم فى كام سيجارة
مد إيدك
هو انت ليه باين عليك حبة كسوف
ده شعب متعود إنه يعيش فى خوف
ومصدق إنها شوية ظروف
مد إيدك عاوز كمان..؟
مافاضلش غير شوية دم فى العروق
قرب ودوق
هتلاقى طعم دايب فيه مرارة
وصوت حزين بيقول خسارة
ياحلم راح قصادة شوف كام شهيد
عشان نعيش بحرية وكرامة
من غير فى يوم مانمد إيـــد ..
#mena_hassan
|