يارب..
بحق الغربة في الأيام.
وروح تايهه وما بتهمدش
وصوت الشمس فوق رأسي
بتغلي بس ما بتنطقش
ولون الغُلب فوق كفي
وكتفي الا أنخلع م الغدر
وصرخة همي جوايا في صوت عالي
لكنه حبيس ومبيطلعش
وضحكة حزن مكتومة
ونايمة مابين بيبان هشة.
وقلب بيشبه الأنقاد.
ضلوعه من الفراق بايشة
وساعة ليل..
بيحضر فيها كل حزين.
متكفن بلون الهجر..
وساجد فيها كل غريق.
متعشم في نور الفجر
بحق كسرتي في روحي ياربي بريء
أيوة بريء
بريء من وعد كان بنا في لحظة وطار.
وبريء من حزني في المشوار
ومن كل الا ساب ايدي ومبيفضلش
ومن كل الا قال باقي ومبيقباش
بريء من كل شيء مؤذي بيأذيني
وحقيقي بجد بتندم...
على عمري الا راح ببلاش
وببكي ع الامات ولا عاش
وع الضحكة الا مبشوفهاش
وع الذكرى الا مبتهداش
گأنها حالفة تمحيني
وصابني الخوف.
جبان حابس ضوافر خوفه جوه الروح
ولا بس فوق ندوب الحزن ضحكاية
شهيد حربه الا بين نفسه وكله جروح
عجوز عاجز يشوف أحزانه في مراية
فيتألم بدون حتى مايتكلم بدون ماينوح
ورافض كل سبل الفرح لعيونه
ورافض حتى أنه يبوح ..
وعايش لسه ع الذكرى وع الاوهام
وتملي بيسأل الأيام
برغم الأنشغال بيهم
وشوقه تملي لعنيهم
ممروش لو لليلة عليه
وواسو قلبه بالأحلام.
فمش ذنبي..
أن أنا بشتاق لأني عشقت
و قرار الهجر والنسيان
مهوش سهل للعاشق
منا في الذكرى اهو غرقان
وليل الهجر دا بيدمي ..
فمش ذنبي ...
Aya Ibrahim 🕷️