ابن حرام ابن حرام ملوش أي ذنب
ده انسان زينا وعنده قلب
جه بغلطة زوجة خانت
وسذااااجة وثقة من الأب
كبر الولد في حضن اللي رباه
والتاني ابن حلال اتربى معاه
ابن الحرام كان قلبه طيب
كل ما يحتاجوه يلاقوه قريب
وابنهم اللي من صلبهم زايد قساه
يعاملوه بحنية ومش بيلاقوا غير أذاه
ابن الحرام حاول يحط لأخوه حد
يدافع عنهم وكأنه هو اللي ابنهم بجد
والتاني ولا على باله يسمع بدون رد
استفزه بسكوته قام إداله قلم ع الخد
راح يشتكي لأصحابه من أخوه
وإنه مظلوم وأهله أكتر منه بيحبوه
هدوه بكام كلمة قاموا شربوا وشربوه
كلام جاب كلام قالوا السر اللي يعرفوه
ده مش أخوك ده محدش عارف مين أبوه
صدقهم وسمع كلامهم وهما عرفوا يشحنوه
من غير ما يفكر راح قتله وسيح دمه
صرخ بصوت صحى اللي رباه هو وأمه
قتلت أخوك قال ده مش أخويا
اتجاهلوا كلامه هو اللي ابنه مات إيه يهمه
وآدي حكاية اتنين اخوات
واحد اتسجن والتاني مات
الغلطة غلطة زوجة خانت
وزيها ياما في كتير حكايات
ش . ح
|