دلوقت..
خايف بواقي الوقت تقتلني
وآخر دقيقة من الأمل
ماتت على أرض الخريف
خايف عقارب وقتي تلدغني
وكل ثانية من الزعل
وقفت على ضلعي الضعيف
دلوقت..
فاضل معايا
من ترابي جروح
وحبة ألم غير محتمل
ومرارته مزروعة بنتشوش
دلوقت..
عندي من الزمن فوبيا
وخوف شديد
لو قطره فات
أنا أصلي وصلة من الخيوط
مربوطة فيه بكل الجهات
ممكن رقم..
عدت عقارب وقته ماشفتهوش
وممكن أكون..
فجوة عصور الماضي والحاضر
بوابة سودة
من وقت الحياة
تدخلها عيل تجري وتسافر
تخرج عجوز صايبه الجنون
بس الأكيد..
انا كل حاجة وقعها الزمن
وسابها متحاوطة بسجون
تطلع عيون الشمس همس
بس الغروب سجان شديد
وأنا زي طير..
لو بات فى يوم
جوه القفص
يقطع جناحه يموت شهيد
الوقت بحر ..
وماليش مصير الا الغرق
وسلاحه ساعة معقربة
هتفوت كتير عليك ساعات
تاخد سنين عمرك قلم
على دنيا فانية متربة
وتنام سنين
وسنين تنامك بالغلط
وتفوق على..
جري العقارب بالحياة
وتلاقي عمرك أتربط
وتبص لمرايتك
تلاقي شبح الوقت
يظهر فى مرة
ومرة تانية يغيب
وتقول لنفسك..
أنا كنت هنا دلوقت
مين الا حط.
جوه شعري الشيب
دا أنا لسة عيل
من يومين فاتو
كل الا فات كل راح
كل الا ماتو
كانو لسة هنا دلوقتي!
ودلوقت!
خايف بواقي الوقت تقتلني🥺
🕷️🚶
#ياطبيب
#رحيل
#aya_ibrahem