لما بتوصل لسن معين بيحصلك إدراك إن الصحاب نوعين
صحاب خروجة و مكان
و صحاب عمر 😍
المشكلة الحقيقية بتحصل لما تخلط أوراقك ببعض و تفتكر صحاب الخروجة صحاب عمر فتتوجع لما تلاقيهم مش نافعين .
على فكرة العيب مش فيهم العيب فيك !
صحاب الخروجة و المكان ناس لذيذة ، ينفع تخرج معاهم ، ينفع تبقوا متواجدين في نفس المكان ( شغل ، كلية، قعدة في مكان .... ) و نبقى مبسوطين ببعض، نهزر ، نضحك ، نروح مطعم جديد سوا ، لكن هي دي حدودهم ، لا ينفع تحكيلهم أسرارك و لا ينفع تستشيرهم في حاجة تخصك لأنهم ممكن يحكموا عليك ،
ولا ينفع تعتمد عليهم كمصدر للأمان و الثقة في حياتك لأنهم ممكن يختفوا في أي لحظة حتى لو كانوا متواجدين كل يوم !
صحاب الخروجة و المكان مهما كانوا كويسين ده مبيمنعش الغيرة بينهم ، مبيمنعش رغبة بعضهم إنهم يبقوا أحسن منك أحياناً والكارثة الكبيرة لو انت بالفعل احسن منهم قدرا من عند الله ولو انت عارف كده وواثق أن هما كمان عارفين كده.
صحاب الخروجة بياخدوا أكتر ما بيدوا , وممكن يكونو أكثر أشخاص تخرب حياتك باكلمها ، حتى إنت بعد فترة ممكن تكتشف إنك من طيابتك بتحكيلهم كل حاجة عنك و هما مش بيحكولك معلومة واحدة مفيدة عنهم ، الكلام دايماً ماشي في إتجاه واحد .
صحاب العمر عددهم قليل قوي ، غالبا صعب يزيدوا عن شخصين تلاتة في حياتك كلها ، ناس سهلة جداً ، ينفع تحكيلهم كل حاجة و مش حتلاقي منهم ردود فعل تدايقك ، عارف عنهم كل حاجة ، زي ما بتقول بيقولوا عشان الثقة رايحة جاية بينكم ، ممكن متتكلموش بالشهرين و لما تتكلموا و لا كأنكم بايتين في حضن بعض ، هما الناس اللي ينفع تعيط قدامهم و تبينلهم ضعفك في أي وقت ، الناس اللي عارف إنك حتلاقيهم جنبك في أي يوم و أي ساعة تحتاجهم فيها ،
صحاب العمر مش بيغيروا مننا ، بيتمنولنا حياة حلوة ، بيدعمونا في الغلط و الصح بالنصيحة الذكية و عدم الإنتقاد ،
مع صحاب العمر إنت عمرك ما بتكون محتار في مكانك عندهم ، إنت واثق و عارف قد إيه هما بيحبوك و عايزينك في حياتهم .
متحطوش دول مكان دول و ترجعوا تزعلوا و تقولوا مفيش صحاب بجد و مفيش حد ينفع نقرب منه ، صنفوا الناس صح من البداية عشان متتعبوش ، فلان لطيف بحب قعدته و ده آخرنا مع بعض ، أما فلان ده ظهري اللي ينفع أتعرى قدامه و أنا مش خايف من جرح و لا معايرة . حرس ولا تخن .. الحرس واجب للحفاظ علي نفسك قبل اي حد ...
|