في نص ساعة عدت ساعة في نص ساعة عدت ساعة
يادوب اتكلمنا كلمتين
5 دقايق حب في الساعة
وقعدنا نتخانق ساعتين
ياللي مش فاهم حط السماعة
واقرا كلامنا بالعين
في نص ساعة بتعدي ساعات
لما مش بتشوف الوقت
ولو راقبت وقتك هتستنى ساعات
يعدي نص ساعة من الوقت
نص ساعة كانت عنوان
لموضوع كتبته زمان
اتكلمت فيه عن النسيان
ونسيت بس فاكر العنوان
في نص ساعة تقدر تغير كتير
لو جربت تسبق وقتك ومكانك
في نص ساعة ممكن تبقى الأخير
لو بعد نص ساعة هتسيب زمانك
في نص ساعة حقايق
تهدك العمر كله
تتمنى ترتاح لو دقايق
ومفيش حد تقوله
تيجي تكتبه وانتا رايق
سطرك بس بتأمنله
في نص ساعة عدى العمر ساعة
يادوب عشنالنا يومين
في نص ساعة آخر نص ساعة
كنا فين وبقينا فين
ش . ح
التعديل الأخير تم بواسطة شاعر الحب الحزين ; 01-10-2022 الساعة 02:27 AM |