[شاعر الحب الحزين]

حياتنا قضية فيها بنترافع

في محكمة الدنيا وبنتأمل

يبقى كلامنا ف شهادتنا شافع

ويبقى القاضي ليه متقبل

حقنا نعيش ولازم عن حقنا ندافع

ونحلم لحد الحلم ما يتأول

ليه يا دنيا مبقاش فيكي شيء نافع

كل ما ننتهي بتبتدي من الأول

بقينا محتاجين لأي سبب ودافع

عشان نقدر نعيش ونكمل

فيها إيه يعني لو تنصفينا إيه المانع

إحنا مش قادرين نتحمل



ساعات بيبقى الدافع كلمة حلوة

واهتمام من حد بعيد

تسعدنا الهدية حتى لو كانت غنوة

حاجة بسيطة تعمل تجديد

حضن حنين ينسينا كل حزن وقسوة

حتى ولو كان سلام بالإيد

الدنيا عشان نعيشها محتاجين القوة

الضعيف فيها بيصفي وحيد



ش . ح