[ahmed 22]

بسم الله

النهاردة عملت في دماغي سلسلة افكار لطيفة وعشوائية كدا وانا قاعد
في لحظة اندماج عاطفي مع الهبل العالمي ...
المهم اللحظة بدأت لما كنت بشوف فيديو عن حوار روسيا واوكرانيا
وان روسيا بتحشد جنودها علي الحدود عشان تهاجم اوكرانيا
وفي حرب هتقوم وحوار كدا يا فندم من 2014 قايم
من ساعة ما روسيا استولت علي منطقة شبه جزيرة القرم لاوكرانيا
الموضوع ابعاده وخلفياته كتيرة عامة وتاريخه قديم
وربنا يوفقهم بقا مع بعض .. احنا لسا هنشرح ونتوغل
يا عمي احنا مالنا

المهم جعت ... افتكرت علاقة العيش بالسيجارة ... قلت لاء ده مالنا ونص
ده الموضوع لازم نفهم تداعياته علينا
قلت يا نهار ابيض معقول الحكومة عندنا طلعت بتفكر ولا ايه
والموضوع قاريينه من بدري وحوار الحرب ده يكون
بوتين هو والريس قاعدين عالتليفون قعدة صفا ومرسيه عالليلة

اصلي عملت مرة تعليق كدا كنت حاسس اني هبقي من الثوار وعملت فيها سعد زغلول
بسبب حوار العيش ده لما قالوا هيلغوا الدعم بشكل كامل وبتاع ...

وبعدين انا شغال في تجارة المواد الغذائية وكدا
فالمهم افتكرت ان مصر اكبر مستورد قمح في العالم
واحنا ما شاء الله بنستورد بتاع 5.5 مليون طن سنويا
وغالبيتها من روسيا واوكرانيا

وشوف يا اخي سبحان الله
الاتنين هيولعوا في بعض ....
وانا اقول اخر فترة الدقيق سعره عمال يزيد ليه
اتاري روسيا عاملة ضريبة زيادة عالقمح
واصلا غير تداعيات الكورونا بقا وبتاع
وغير بقا التوترات والحرب
ويا سلام لو روسيا دخلت اوكرانيا بقا
شوف القمح هيرفع سعره اد ايه كمان ....
احتمال ينزلونا رغيف العيش بجنيه هنا ولا حاجة في التموين..

قلت يا نهار اسوح معقول سعادته يكون بعيدا النظر كدا
مايكونش عاوز يكرهنا في العيش
ويخلونا نركز في البطاطس والرز ولا ايه

اصل احنا شعب يحب الغموس كدا
بس في شعوب ثانية عندهم بديل لثقافة العيش
يعني مثلا الارز في الصين ..... والبطاطس في اوروبا
دول يعني اللي هما السلعة الاستراتيجية في البلد

انا ماسكتش دخلت جوجل وكدا
قالك ان مصر استيرادها للقمح عندنا قل في 2021 عن 2020
بس ده مش لأن مصر انتاجها من القمح زاد
ده لأن الشعب عندنا خفف من اكل العيش
والثقافة بتتغير

قلت بس هي الخطة ونجحت
البلد عندنا عاوزين ينوعوا ما بين العيش والبطاطس والارز
ما نكونش بتوع عيش بس .... نبقي شعب متنوع في اكله
متنوع في ثقافته ... بدل ما نفطر عيش وفلافل
نفطر رز وبيض ... اول ناكل البطاطس في قرطاس زي هولندا كدا ...
والقرطاس يتباع ب 10 جنيه ولا حاجة ..

يعني مثلا انا دخلت شفت استيرادنا من الارز
لاقيتنا بنستورد رز بسماتي اكتر
عشان الرز المصري عندنا اكتفاء شبه ذاتي بتاع 80 ولا 90 في المية

قلت اشوف البطاطس
لاقيتنا ما شاء الله بنستورد تقاوي البطاطس من اجود الانواع
ونزرعها وبنصدرها كمان ... يعني الدنيا في الخلاط

طيب كدا تمام ... فهمنا خطة الدولة من غير ما تقولنا
وهو مع سنة 2030 مثلا ومع شوية صوامع تتبني وكدا
يكون استيرادنا للقمح مليون ولا 2 مليون طن ولا حاجة
ده مع الزيادة السكنية كمان ...
يعني الخطة اننا بنزرع بطاطس في عقول الشباب
وده شئ كويس ...... الحمد الله

وده علي فكرة مهم نفكر فيه
لأن التغيير اللي جاي ده في تغيير ثقافة الاكل في مصر
هيترتب عليه انك تفكر خارج الصندوق في مشاريع
بجانب محلات الفول والفلافل ...

يعني مثلا هتلاقي المجال اكبر انك تفتح عربية بتبيع بطاطس الصبح
تزيد من محلات الشاينيز فود في البلد
زود من اي بدايل وافتكاسات بدايل للعيش
اصل بدل ما ما هتشتري الصبح ب 10 جنيه عيش
و10 جنيه طعميه ده علي امل ان قرص الطعمية الصغير ده
يخليه بجنيه لحد كام سنة جاية ...
انا مرة اشتريت قرص طعمية كبير من محل فول في طنطا
لاقيته ب 2.5 ....
ده غير 5 فول وشوية جبنه لاسرة 4 افراد
مرتب رب البيت بتاعها 2500 جنيه فرضا يعني ...
ده معناه انك هتصرف 1000 جنيه علي الفطار بس
والموضوع محتاج شوية حظ ...

لازم تكون كرييتيف في الرز والبطاطس او اي بديل توافره اكبر
يعني تخيل انك لما تعمل بكيلو رز كور زي الصينين كدا ب 15 ولا 20 جنيه
وممكن تفطر وتتغدا بيه كمان ...

من الاخر ان رغيش العيش يوصل نص جنيه ثم جنيه بعد سنة ولا اتنين
ده معناه ان لازم ثقافة الاكل تتغير في مصر كلها
لأن الاكيد ان الدخل مش هيزيد بنفس زيادة رفع الاسعار في كل حاجة


في النهاية
انا من الاخر اتحدي اي حد يدخل الموضوع ده وهيرد
يقولي انا بهزر ولا بكلم جد ....
لأن عليا النعمة احنا داخلين علي ايام سودا ...