〰️ ٥ حاجات ماينفعش تقولهم لحد بيعاني نفسيًا 〰️
١- خلي عندك ايمان بربنا .. ليه ايمانك ضعيف كدة .. اكيد مش بتصلي كفاية .. لو كنت قريب من ربنا اكيد مكنش ده يبقى حالك !!
الموضوع ملهوش علاقة بالايمان .. المعاناة النفسية مش بتفرق بين ضعيف وقوي الايمان ومش علامة على عدم الايمان او البعد عن ربنا .. كلنا في التجارب والمحن سواسية..
احيانا الشخص اللي بيعاني بيكون اقرب لربنا من السليم .. بس يمكن محتاج حد يسمعه او علاج دوائي او نفسي .. بلاش نحكم على ايمانه ونربط الصحة النفسية بتدين الشخص او ايمانه احنا بنزود وجعه باحساس بالذنب انه مقصر ..
٢- انت مكبر الموضوع ليه ؟؟ كل الناس تعبانة .. كلنا عدينا زيك بالمشاكل دي .. عادي .. انت بس اللي حساس زيادة.. بص فلان وعلان حصلهم كذا واهو زي الفل اهم.. اشمعنى انت اللي بتشتكي .. !!
ابشع حاجة هي تتفيه ألم الشخص التعبان نفسيا ومقارنته بآخرين .. ياريت نسكت احسن ما نقول الكلام ده..
٣- انت طول عمرك قوي .. محبش اشوفك ضعيف كدة ..!!
لا .. مش لازم يكون قوي علطول .. ليه تحسس الشخص التعبان انه خذلك لما شفته ضعيف ومتألم .. ليه ضعفه يضايقك ويخليك مهزوز.. ان الانسان يعترف بضعفه ومعاناته ده شيمة الشجعان وقمة الانسانية وافضل من الكبر والمئاوحة..
٤- قول الحمد لله وبلاش الشكوى والتذمر .. اشكر ربنا .. شوف بلاوي غيرك .. !!
الانسان لما يحب يشارك وجعه مش معناه انه بيتذمر.. ليه بنحاول ندخله في حالة الانكار ونحسسه بالذنب زيادة انه مش حامد ربه وناكر الجميل ..
٥- انت بتقول كدة اومال انا اعمل ايه .. اسمع بقى انا حصل معايا ايه!!!
ليه بنحب نستغل الفرصة عشان نعلي عليه في الوجع.. ليه مش قادر تطلع من دائرتك وتسمع بدون ما تدخل نفسك في الكلام ..
وقت الالم احنا محتاجين الشخص اللي بيسمع اكتر ما بيتكلم، بقلبه قبل ودانه من غير نقد ولا لوم ولا تهويل ويتقبلنا كدة زي ما احنا .. من غير نصايح ولا عظات ..
✔️اجمل حاجة ممكن نقدمها لانسان وقت ازمته اننا نكون شركاء له في الالم والوجع .. يعني احنا في ظهرك وهنعدي سوى ..
|