[بحر القمر]

كلنا بنتغير من غير ما نحس..
من غير ما نرتّب !!
يمكن عشان بنتحمل فوق طاقتنا..
يمكن عشان المسئوليات قطمت وسطنا..
يمكن عشان الدنيا طلعت قاسية اكتر ما كنا متخيلين..
يمكن عشان اللي حولينا نفسهم بيتغيروا..
يمكن عشان وقعنا كذا مرة و محدش مد ايده يقومنا..!
يمكن عشان لقينا الحب و الاهتمام من آخر حد افتكرناه هيهتم و اقرب حد عمل نفسه مش من هنا !
يمكن عشان اتكسرت حاجة جوانا فا قويت جوانا حاجات تاني..
يمكن عشان اكتشفنا كل حاجة علي حقيقتها
و مبقناش هبل و بيتضحك علي عقلنا زي زمان..
اكيد عشان نضجنا و كبرنا و عشان الايام و المواقف اللي عشناهم محدش بيعلم زيهم !
كلنا بنتغير سنه سنه ..و حتة حتة..
كلنا مشاعرنا بتتضرب في الخلاط كل فترة و بتطلع كوكتيل
يا حلو و بيحلي حياتنا يا مر و بيوجعنا ..
اللي فاكر انه مش بيتغير بيضحك علي نفسه ،
كلنا لازم نتغير للحلو او للوحش او نبقي حد تاني مش شبهنا اصلا و لا كنا نتخيل اننا هنوصله و كل ده مش بمزاجنا ..
ده لازم يحصل عشان نقدر نعيش و نعدي كل اللي بنشوفه و نقدر نقوم و ننفض التراب من كل وقعة بنوقعها و نكمل في حياتنا عشان الحياة ما بتستناش حد و لا بتوقف علي حد ..